ໂຄຣເອເຊຍ ກ່າວວ່າ ອົບພະຍົບຈຳນວນ 5600 ກວ່າຄົນໄດ້ເຂົ້າໄປໃນປະເທດຂອງຕົນ ຕັ້ງແຕ່ ຮັງກາຣີ ໄດ້ປິດເຂດຊາຍແດນຂອງພວກເຂົາເຈົ້າກັບ ເຊີເບຍ, ໃນຂະນະທີ່ອົງການ ສະຫະປະຊາຊາດ ປະນາມການກະທຳຂອງ ຮັງກາຣີ ຕໍ່ຜູ້ຂໍລີ້ໄພວ່າ “ເປັນທີ່ຮັບເອົາ “ບໍ່ໄດ້.”
ຕຳຫຼວດໄດ້ເປີດເຜີຍຈຳນວນຕົວເລກ ໃນວັນພະຫັດມື້ນີ້, ຫຼັງຈາກປະມານ 24 ຊົ່ວໂມງທີ່ຜູ້ຄົນໄດ້ລັ່ງໄຫຼເຂົ້າໄປໃນເຂດຊາຍແດນທາງພາກຕາເວັນອອກຂອງພວກເຂົາເຈົ້າ, ເຮັດໃຫ້ ໂຄຣເອເຊຍ ກາຍເປັນເສັ້ນທາງໃໝ່ ສຳລັບການລັ່ງໄຫຼຂອງຜູ້ຄົນທີ່ພະຍາຍາມຫຼົບໜີຄວາມ ຮຸນແຮງໃນປະເທດ ທີ່ໄດ້ປະສົບກັບໄພສົງຄາມ ເຊັ່ນ ຊີເຣຍ, ອີຣັກ ແລະ ອັຟ
ການິສຖານ.
ນາຍົກລັດຖະມົນຕີ ໂຄຣເອເຊຍ ທ່ານ Zoran Milanovic ແມ່ນກຳລັງປຶກສາຫາລືກັບຄູ່ຮ່ວມຕຳແໜ່ງຂອງທ່ານຈາກປະເທດ Austria, ທ່ານ Werner Faymann ໃນວັນພະຫັດ
ມື້ນີ້ ທີ່ນະຄອນຫຼວງ Zagreb. ທ່ານ Milanovic ໄດ້ໃຫ້ຄຳສັນຍາວ່າ ຈະອະນຸຍາດໃຫ້ພວກ ອົບພະຍົບ ຜ່ານປະເທດຢ່າງເປັນອິດສະຫຼະ.
ລັດຖະມົນຕີການຕ່າງປະເທດຂອງ ໂຄຣເອເຊຍ ທ່ານນາງ Vesna Pusic ໄດ້ກ່າວໃນຕອນແລງຂອງວັນພຸດວານນີ້ວ່າ ໂຄຣເອເຊຍ ມີຄວາມພ້ອມ ໃນການຮັບມືກັບການມາຮອດຂອງພວກອົບພະຍົບຫຼາຍພັນຄົນ, ແຕ່ວ່າຈະບໍ່ສາມາດຮັບມືກັບອົບພະຍົບຫຼາຍສິບພັນຄົນໄດ້.
ໃນວັນພຸດວານນີ້ ຫົວໜ້າອົງການສະຫະປະຊາຊາດ ທ່ານ Ban Ki-moon ໄດ້ປະນາມ
ຮັງກາຣີ ສຳລັບການກະທຳຂອງພວກເຂົາຕໍ່ພວກອົບພະຍົບ, ຫຼັງຈາກຕຳຫຼວດໄດ້ຍິງ ແກ໊ສນ້ຳຕາ ແລະ ສີດນ້ຳໃສ່ຜູ້ຂໍລີ້ໄພຫຼາຍຮ້ອຍຄົນ ຢູ່ເຂດຊາຍແດນຂອງປະເທດຕິດກັບ
ເຊີເບຍ.
ວິກິດການ ອົບພະຍົບ ຢູໂຣບ, 17 ກັນຍາ 2015
ເລຂາທິການໃຫຍ່ ສະຫະປະຊາຊາດ ໄດ້ກ່າວວ່າ ພວກອົບພະຍົບ “ແມ່ນຜູ້ທີ່ຫຼົບໜີຈາກສົງຄາມ ແລະ ຄວາມບຽດບຽນ” ແລະ ວ່າ “ພວກເຂົາຕ້ອງຖືກປະຕິບັດນຳຢ່າງມີກຽດສັກສີຂອງມະນຸດ.”
ນາຍົກລັດຖະມົນຕີ ເຊີເບຍ ທ່ານ Aleksandar Vucic ໄດ້ກ່າວປະນາມຕໍ່ສິ່ງທີ່ທ່ານກ່າວວ່າແມ່ນ “ການກະທຳທີ່ໂຫດຮ້າຍ” ຂອງ ຮັງກາຣີ ຕໍ່ພວກອົບພະຍົບ. ຕຳຫຼວດໄດ້ປະທະກັນກັບພວກອົບພະຍົບຫຼາຍຊົ່ວໂມງ ຫຼັງຈາກໄດ້ມີການປິດທາງເຂົ້າທີ່ໃຫຍ່ທີ່ສຸດແຫ່ງນຶ່ງສູ່ ສະຫະພາບ ຢູໂຣບ.
ຮັງກາຣີ ໄດ້ກ່າວວ່າ ພວກອົບພະຍົບໄດ້ພະຍາຍາມທີ່ຈະບຸກຜ່ານຮົ້ວເຂດຊາຍແດນ ແລະ ໄດ້ສະແດງໃຫ້ເຫັນວ່າເປັນອັນຕະລາຍຕໍ່ປະເທດ.
