ເຈົ້າໜ້າທີ່ຄົນນຶ່ງໃນກະຊວງສາທາລະນະສຸກຂອງໄທ ໄດ້ປະຕິເສດລາຍງານຂ່າວທີ່ເວົ້າວ່າ ລັດຖະບານໄດ້ສັ່ງໃຫ້ກັກກັນແບບບັງຄັບຕໍ່ພວກທີ່ເດີນທາງມາຈາກສີ່ປະເທດ ທີ່ຖືກກະທົບຢ່າງໜັກຈາກໄວຣັສໂຄໂຣນາສາຍພັນໃໝ່ ເຖິງແມ່ນວ່າເຂົາເຈົ້າໄດ້ຕິດ ຫຼືສະແດງວ່າມີອາການຕິດເຊື້ອໄວຣັສນັ້ນຫລືບໍ່ກໍຕາມ ໃນວັນວັນສຸກວານນີ້ ພາຍຫຼັງທີ່ມີການສົ່ງຖ້ອຍຄຳທີ່ສັບສົນມາໄດ້ຫລາຍມື້ແລ້ວ.
ລັດຖະບານໄດ້ປະກາດວ່າ ຈີນ, ອີຣ່ານ ອີຕາລີ ແລະເກົາຫຼີໃຕ້ ພ້ອມກັບຮົງກົງ ແລະມາກາວ “ເປັນເຂດທີ່ມີພະຍາດຕິດແປດທີ່ເປັນອັນຕະລາຍຮ້າຍແຮງ” ໃນວັນພະຫັດທີ່ຜ່ານມາ. ໃນວັນດຽວກັນ ອົງການຂ່າວຣອຍເຕີໄດ້ລາຍງານວ່າ ທຸກການເດີນທາງທີ່ມາຈາກບັນດາເຂດດັ່ງກ່າວ ຈະຕ້ອງທຳການກັກກັນຕົນເອງເປັນເວລາ 14 ມື້ ຢູ່ທີ່ເຮືອນ ຫຼືໂຮງແຮມ, ໂດຍໄດ້ອ້າງອີງຄຳເວົ້າຂອງໂຄສົກກະຊວງສາທາລະນະສຸກ, ທ່ານຣຸ້ງເຣືອງ ກິດພະໄທ.
ລັດຖະມົນຕີກະຊວງສາທາລະນະສຸກ, ທ່ານອານຸທິນ ຈັນວິຣະກຸນ ໄດ້ປະກາດໃຫ້ມີການກັກກັນແບບບັງຄັບຕໍ່ພວກທີ່ເດີນທາງມາຈາກບັນດາປະເທດ ແລະດິນແດນເຫລົ່ານັ້ນ ຢູ່ໃນໜ້າເຟັສບຸກໃນວັນອັງຄານທີ່ຜ່ານມາ ພ້ອມກັບຝຣັ່ງ ເຢຍຣະມັນ ຍີ່ປຸ່ນ ສິງກະໂປ ແລະໄຕ້ຫວັນ ແຕ່ວ່າກໍໄດ້ລຶບການປະກາດຂອງເພິ່ນໃນເວລາບໍ່ພໍເທົ່າໃດຫຼັງຈາກນັ້ນ ແລະໄດ້ປິດບັນຊີນັ້ນໄວ້ໃນວັນຕໍ່ມາ. ທ່ານໄດ້ກ່າວຕໍ່ສື່ມວນຊົນວ່າ ລາຍຊື່ປະເທດນັ້ນຕ້ອງໄດ້ມີການດັດແປງກ່ອນ.
ໃນຕອນທ່ຽງ ວັນສຸກວານນີ້, ດຣ. ທະນາຣັກ ພິພັດ, ຮອງຫົວໜ້າກົມຄວບຄຸມພະຍາດຂອງກະຊວງສາທາລະນະສຸກ ກ່າວຕໍ່ ວີໂອເອ ວ່າ ບໍ່ໄດ້ມີການສັ່ງໃຫ້ກັກກັນພວກເດີນທາງມາເຖິງຈາກປະເທດໃດທັງນັ້ນໃນເວລານີ້.
ທ່ານກ່າວວ່າ “ບໍ່ ຍັງເທື່ອ, ພວກເຮົາບໍ່ໄດ້ມີການກັກກັນພວກເດີນທາງມາ.”
ເມື່ອຖືກຖາມວ່າລັດຖະບານອາດຈະວາງມາດຕະການກັກກັນແບບບັງຄັບພວກເດີນທາງມາຈາກປະເທດໃດບໍ່, ດຣ. ທະນາຣັກ ຕອບວ່າ “ອາດຈະ, ມີພຽງແຕ່ອາດຈະເທົ່ານັ້ນ.”
ອົງການຂ່າວ APF ໄດ້ລາຍງານວ່າ ເຖິງຢ່າງໃດກໍດີ ລັດຖະບານໄດ້ “ແນະນຳ” ວ່າພວກເດີນທາງມາຈາກບັນດາສີ່ປະເທດເຫລົ່ານັ້ນໃຫ້ກັກກັນຕົນເອງ ແລະໄດ້ເນັ້ນຢ້ຳວ່າ ເໃຫ້ຂົາເຈົ້າລາຍງານຕໍ່ພວກເຈົ້າໜ້າທີ່ກ່ຽວກັບສະພາບສຸກຂະພາບຂອງເຂົາເຈົ້າໃນແຕ່ລະມື້.
ປະເທດໄທຍັງໄດ້ກ້າວໄປດຳເນີນຄວາມພະຍາຍາມເປັນການຊົ່ວຄາວໃນບອກໃຫ້ “ຄົນຢູ່ຫ່າງກັນ” ເພື່ອຫລຸດຜ່ອນສະພາບການແອອັດຊຶ່ງຈະເຮັດໃຫ້ມີໄວຣັສອາດສາມາດແຜ່ຜາຍຜ່ານໄດ້ນັ້ນ. ພວກເຈົ້າໜ້າທີ່ໄດ້ເລື່ອນການແຂ່ງຂັນກິລາທີ່ໃຫຍ່ສຸດຂອງປະເທດບັ້ນນຶ່ງ ຊຶ່ງກໍຄື MotoGP 2020 ທີ່ມີກຳນົດຈັດຂຶ້ນໃນທ້າຍເດືອນນີ້ ຍ້ອນຢ້ານກົວຕໍ່ການແຜ່ລະບາດ ແລະໄດ້ຍົກເລີກງານພະຈັນເຕັມດວງຢູ່ເກາະ ພານງານ ທີ່ດຶງດູດເອົາຄົນຫລາຍພັນຄົນທີ່ມັກການສະເຫລີມສະຫລອງເປັນເວລານານນຶ່ງເດືອນ ຈົນກວ່າວ່າຈະມີການປະກາດໃໝ່ອອກມາ.
