ລິ້ງ ສຳຫລັບເຂົ້າຫາ

ວັນພຸດ, 29 ມິຖຸນາ 2022

ຄອບຄົວລາວ ອາເມຣິກັນ ໃນລັດອາແຄນຊໍ ພາກັນຕິດໂຄວິດ ທັງໝົດ 9 ຄົນ ລວມທັງ ພໍ່ແລະແມ່


ຍານາງໄພວັນ ປະເສີດສັກ ພ້ອມກັບແມ່ແລະພໍ່ ຢູ່ທີ່ເມືອງຣໍເຈີ ລັດອາແຄນຊໍ ຂອງສະຫະລັດ.

ໃນວັນເສົາທ້າຍອາທິດ ກ່ອນໜ້າວັນພັກບຸນຂອບຄຸນພະເຈົ້າ ຫຼື Thanksgiving Holiday ນ້ອງຊາຍຂອງຍານາງໄພວັນ ປະເສີດສັກ ຢູ່ທີ່ເມືອງເຊັນເຕີຕັນ ລັດອາແຄນຊໍ ໄດ້ຈັດງານວັນເກີດຢູ່ບ້ານຂອງລາວ ຕໍ່ມາສາມວັນ ຄອບຄົວທັງໝົດຂອງນ້ອງຊາຍ ນ້ອງສາວແລະຜົວ ກໍໄດ້ກວດພົບວ່າ ເປັນບວກຕິດເຊື້ອໄວຣັສ ລວມທັງໝົດ 9 ຄົນ ອີງຕາມການບອກເລົ່າຂອງຍານາງ ໄພວັນ ຜູ້ເປັນເອື້ອຍຄົນທີສາມ ທີ່ອາໄສຢູ່ເມືອງຣໍເຈີ ລັດອາແຄນຊໍ ເຊັ່ນກັນ ກ່າວຕໍ່ວີໂອເອ ລາວ.

ນອກນັ້ນ ແມ່ຂອງຍານາງ ກໍມີອາການໄອຮຸນແຮງ ແລະກວດພົບວ່າ ມີເຊື້ອໂຄວິດ ແຕ່ເພິ່ນບໍ່ໄດ້ເຂົ້າໂຮງໝໍ. ຍານາງຍັງກ່າວອີກວ່າ ພໍ່ຂອງລາວ ອາຍຸ 90 ປີ ໄດ້ສັກຢາວັກຊີນ 2 ເຂັມແລ້ວ ທີ່ອາໄສຢູ່ກັບລາວ ຮູ້ສຶກອ່ອນເພຍ ແລະເມື່ອຍຫຼາຍ ໃນວັນອາທິດ ແລ້ວຢາກນອນຢູ່ສະເໝີ ສະນັ້ນ ລາວຈຶ່ງເປັນຫ່ວງ ແລະຢາກພາພໍ່ໄປໂຮງໝໍໃນວັນຈັນ ແຕ່ລາວເລົ່າເຖິງວັນນັ້ນວ່າ

“ນອນບໍ່ຢາກລຸກມາກິນເຂົ້າກິນນ້າຫັ້ນແຫລະ ຂ້ອຍປຸກເພິ່ນຂຶ້ນມາກິນເຂົ້າກິນນ້ຳ ແຕ່ເພິ່ນກໍເພຍຫຼາຍ ເພິ່ນຮູ້ສຶກວ່າເພຍຫຼາຍ ຕອນເປັນແມ່ນທ້າຍອາທິດ ແລ້ວວ່າສິພາໄປໂຮງໝໍໃນມື້ວັນຈັນຫັ້ນຫນະ ບັດນີ້ເພິ່ນຕື່ນຂຶ້ນມາວັນຈັນ ເອົາລຸກຂຶ້ນມາອາບນ້ຳກິນເຂົ້າ ແຕ່ບໍ່ທັນໄດ້ກິນເຂົ້າເທື່ອ ອາບນ້ຳກ່ອນ ລະອາບນ້ຳແລ້ວ ລາວລຸກຂຶ້ນນັ່ງ ນຸ່ງເຄື່ອງໃຫ້ລາວ ຫນ້າຕາຂອງລາວຊີດເຢັນໝົດເລີຍ ຂ້ອຍຈຶ່ງໂທຫາ 911 ມາເອົາລາວ.”

ເພິ່ນໄດ້ຖືກກວດພົບວ່າເປັນພະຍາດ Covid-19 ແຕ່ອາການຂອງເພິ່ນບໍ່ຮຸນແຮງ, ຫຼັງຈາກທ່ານໝໍກວດເບິ່ງອາການຂອງເພິ່ນທຸກຢ່າງແລ້ວ ຈຶ່ງໄດ້ຖືກສົ່ງໄປພະແນກຟື້ນຟູເປັນເວລາສອງອາທິດ. ໃນຂະນະ​ທີ່​ຢູ່​ໃນ​ພະແນກ​ຟື້ນ​ຟູ​ຢູ່ນັ້ນ ພວກລູກເຕົ້າຂອງທ່ານບົວລຽນ ຈັນທະລັງສີ ໝົດ​ທຸກ​ຄົນ​ຈາກຕ່າງລັດ ​ກໍ​ໄດ້​ພາ​ກັນເດີນທາງມາຢ້ຽມ​ຢາມ​ພໍ່ ດັ່ງ​ທີ່​ຍານາງ​ໄພ​ວັນ​ກ່າວ​ວ່າ:

“ອ້າຍ​ນ້ອງ​ທັງ​ໝົດກໍຂ້ຽວໄປຫາລາວຢູ່ໂຮງໝໍ ​ປ່ຽນຜຽນກັນໄປຈອບເບິ່ງ​ລາວ ລະປຸ້ມລຸມກັນ ບັດນີ້ຄົນຢູ່ຕ່າງລັດ ຄືນ້ອງສາວຜູ້ນຶ່ງຢູ່ ຢູທາ ນາງແກ ເພິ່ນກະຂ້ຽວມາ ນ້ອງສາວອີກ ຢູ່ຄາລີຟໍເນຍ ເພິ່ນກໍຂ້ຽວມາຫາພໍ່ ສ່ວນຫຼາຍຫັ້ນ ແມ່ນຢູ່ອາແຄນຊໍ ໝົດ​ ແລະມີແຕ່ສອງຄົນນີ້ຢູ່ຕ່າງລັດ​ ແຕ່ວ່າ ມາຄົບໝົດ.” ຍານາງກ່າວຕື່ມວ່າ “ເພິ່ນກໍຈະຍິ້ມແຍ້ມເມື່ອເຫັນພວກເຮົາ. ມັນເຮັດໃຫ້ເພິ່ນມີກຳລັງໃຈ ກຳລັງໃຈກໍເປັນຢາວິເສດ."

ຄອບຄົວຂອງທ່ານບົວລຽນ ຈັນທະລັງສີ ຢູ່ທີ່ເມືອງຣໍເຈີ ລັດອາແຄນຊໍ ຂອງສະຫະລັດ.
ຄອບຄົວຂອງທ່ານບົວລຽນ ຈັນທະລັງສີ ຢູ່ທີ່ເມືອງຣໍເຈີ ລັດອາແຄນຊໍ ຂອງສະຫະລັດ.

ປັດຈຸບັນນີ້ ຄອບຄົວຂອງທ່ານບົວລຽນໄດ້ໄປເຕົ້າໂຮມກັນຢູ່ໃນເມືອງຣໍເຈີ ລັດອາແຄນຊໍ ຮ່ວມກັນສະເຫຼີມສະຫຼອງຂ່າວດີຂອງການຫາຍຈາກໂຄວິດຂອງພໍ່ແລະແມ່ ພ້ອມທັງບຸນວັນຄຣິສມັສ ແລະປີໃໝ່ສາກົນທີ່ໃກ້ຈະມາເຖິງນີ້ນຳດ້ວຍ.

ທ່ານອາດຈະມັກເລື້ອງນີ້ຄືກັນ

XS
SM
MD
LG