ລິ້ງ ສຳຫລັບເຂົ້າຫາ

logo-print

ໂຄວິດ-19 ມີຜົນກະທົບ ຢ່າງໜັກໜ່ວງ ເປັນພິເສດ ຕໍ່ຊີວິດການເປັນຢູ່ ຂອງຄົນພິການ ໃນລາວ


ສູນການແພດຟື້ນຟູໜ້າທີ່ການ

ການລະບາດຂອງໂຄວິດ-19 ທີ່ສົ່ງຜົນກະທົບແກ່ຄົນລາວ ແລະ ປະຊາຊົນພົນລະເມືອງ ເກືອບໝົດທຸກຄົນຢູ່ທົ່ວໂລກນັ້ນ ແມ່ນມີຜົນກະທົບໜັກເປັນພິເສດ ແກ່ຄົນພິການຢູ່ໃນລາວ ໂດຍສະເພາະແມ່ນຄົນພິການຕາ ທີ່ອາໃສຢູ່ໃນຕົວເມືອງໃຫຍ່ຕ່າງໆຂອງລາວ ທີ່ມີລາຍຮັບຕົ້ນຕໍມາຈາກການໃຫ້ບໍລິການນວດແກ່ລູກຄ້າເມື່ອມີຄໍາສັ່ງຈາກທາງການສັ່ງໃຫ້ປິດເມືອງ ແລະທຸລະກິດທີ່ບໍ່ສາມາດໃຫ້ຄົນຢູ່ຫ່າງກັນຢ່າງໜ້ອຍ 2 ແມັດ ໄດ້. ນັກຂ່າວຂອງພວກເຮົາ ມີລາຍງານ ກ່ຽວກັບເລື້ອງນີ້ ຊຶ່ງໄພສານຈະນຳລາຍລະອຽດ ມາສະເໜີທ່ານ ໃນອັນດັບຕໍ່ໄປ.

ທ້າມກາງການແຜ່ລະບາດຂອງພະຍາດໂຄວິດ-19 ຢ່າງໜັກ ຢູ່ໃນທົ່ວໂລກກໍຄື ຢູ່ໃນບັນດາປະເທດເພື່ອນບ້ານຂອງລາວນັ້ນ ໄດ້ເຮັດໃຫ້ລັດຖະບານລາວຕ້ອງຕັດ ສິນໃຈອອກຄໍາສັ່ງປິດປະເທດ, ປິດເມືອງ ແລະກິດຈະການຕ່າງໆ ທີ່ບໍ່ສາມາດໃຫ້ຄົນຢູ່ຫ່າງກັນ 2 ແມັດຂຶ້ນເມືອນັ້ນ ໄວ້ເປັນ 2 ໄລຍະ. ໄລຍະທີ 1 ກໍຄືແຕ່ວັນທີ 1 ເມສາ ຮອດທ້າຍເດືອນພຶດສະພາ ຊຶ່ງໃນຕອນນັ້ນກໍມີຄົນລາວຕິດເຊື້ອ ພະຍາດນີ້ ຢູ່ 19 ຄົນ ແລະກໍສາມາດປິ່ນປົວຫາຍດີໝົດທຸກຄົນ. ໄລຍະທີ 2 ກໍແມ່ນນັບແຕ່ວັນທີ 1 ສິງຫາ ກໍຄືເດືອນນີ້ ຈົນຮອດທ້າຍເດືອນ. ສະພາບການດັ່ງກ່າວແມ່ນໄດ້ສົ່ງຜົນກະທົບ ໃຫ້ແກ່ເກືອບໝົດທຸກກຸ່ມຄົນທົ່ວປະເທດ ແຕ່ວ່າມັນກະທົບຕໍ່ຄົນລາວ ທີ່ພິການຫລາຍທີ່ສຸດ, ອີງຕາມທ່ານແກ້ວ ຫົວໜ້າສູນບໍລິ ການຄົນພິການ ທີ່ນະຄອນຫລວງວຽງຈັນ. ທ່ານແກ້ວບອກວ່າ ອີງຕາມການສໍາຫລວດໃນ ປີ 2015 ຄົນພິການ ໃນປະເພດຕ່າງໆ ກວາມເອົາ 2.8% ເປີເຊັນ ຂອງພົນລະເມືອງລາວທັງໝົດ ຫລື ປະມານກວ່າ 1 ແສນ 60 ພັນຄົນ ແລະຫລາຍໆຄົນໃນນີ້ ກໍພະຍາຍາມຫາລ້ຽງຊີບຕົນເອງ ໃນຫລາຍຂະແໜງວິຊາຊີບເທົ່າທີ່ຈະເຮັດໄດ້ ແຕ່ເມື່ອ ມີການລະບາດ ຂອງພະຍາດດັ່ງທີ່ເປັນຢູ່ໃນທຸກມື້ນີ້ເຂົາເຈົ້າກໍຂາດລາຍໄດ້ ດັ່ງການໃຫ້ສໍາພາດ ຂອງທ່ານແກ້ວ ກ່ຽວກັບບັນຫານີ້ວ່າ:

“ວິຊາຊີບສ່ວນຫລາຍ ປະກອບມີ ກະສ່ວນຈໍານວນນຶ່ງ ທີ່ມີອາຊີບຕັດຫຍິບ. ຈໍານວນນຶ່ງກະເຮັດພວກໄອທີຄອມພິວເຕີ. ຄົນພິການຈໍານວນນຶ່ງແມ່ນເປັນໝໍນວດເນາະ. ອາຊີບກະຈັ່ງຊີ້ເນາະ ອາຊີບຄົນພິການນະ. ກະບໍ່ມີຂໍ້ມູນ ເພາະບໍ່ໄດ້ສໍາຫລວດເປັນຈິງເປັນຈັງ ກະມີແຕ່ສໍາຫລວດ ແຕ່ປະລິມານ, ກະຊ່ວງໂຄວິດກະຄືກັນໝົດທຸກຄົນພິການຫລືືບໍ່ພິການ ຕ່າງແຕ່ວ່າ ຄົນພິການກະລໍາບາກຕື່ມໜ້ອຍນຶ່ງ ເພາະເຂົາເຈົ້າໄດ້ໃຊ້ເງິນຫລາຍ ເຊັ່ນຕ້ອງໄດ້ຈ້າງຄົນມາເບິ່ງ ຫລື ວ່າຕ້ອງໄດ້ໃຊ້ຍວດຍານພາຫະນະເນາະມັນກະດີຂຶ້ນແລ້ວເດ ເສດຖະກິດກະເລີ້ມຈະໃກ້ ຈະກັບມາປົກກະຕິ ໃນທີ່ສຸດກະລໍາບາກ ບໍ່ມີຄົນໃຊ້ບໍລິການ ບໍ່ມີຄົນຈ້າງງານ.”

ບໍລິການບີບເສັ້ນແຜນໂບຮານ
ບໍລິການບີບເສັ້ນແຜນໂບຮານ

ຂະນະທີ່ການລະບາດຂອງພະຍາດໂຄວິດ-19 ຕໍ່ເສດຖະກິດຂອງປະເທດ ກໍຄືທຸກໆ ຂະແໜງການຢູ່ນີ້ ຂະແໜງການບໍລິການນວດ ທີ່ລູກຄ້າ ແລະຜູ້ໃຫ້ບໍລິ ການຕ້ອງໄດ້ໃຊ້ເວລາ ຢູ່ນໍາກັນເປັນຊົ່ວໂມງ ຫລືຫລາຍຊົ່ວໂມງນັ້ນ ແມ່ນ ຖືກກະທົບໜັກທີ່ສຸດ ເມື່ອມີລະບຽບການ ໃຫ້ຮັກສາໄລຍະຢູ່ຫ່າງກັນ 2 ແມັດ ຂຶ້ນເມືອ. ສະນັ້ນຄົນພິການຕາ ຜູ້ທີ່ມີເງື່ອນໄຂ ທີ່ສາມາດເຮັດວີຊາຊີບດ້ານນີ້ ໄດ້ແມ່ນປະສົບຄວາມຫຍຸ້ງຍາກຫລາຍເມື່ອຂາດລາຍຮັບ ແລະບໍ່ມີເງິນທ້ອນຫອມຮິບໂຮມເອົາໄວ້ຫລາຍມາແຕ່ກ່ອນ ດັ່ງທີ່ໝໍນວດທີ່ເປັນຄົນພິການຕາ ຢູ່ໃນສະ ຖານທີ່ນວດແຫ່ງນຶ່ງ ໃນນະຄອນຫລວງວຽງຈັນເລົ່າສູ່ຟັງວ່າ:

“ຊ່ວງໂຄວິດມານີ້ພວກເຮົາກະຫຍຸ້ງຍາກທໍາມາຫາກິນຕ່າງໆເນາະ ຕົວຢ່າງແຕ່ກ່ອນມີລູກຄ້າມານວດ ດຽວນີ້ກະຫຼຸດລົງຫລາຍ ມື້ລະຄົນສອງຄົນຊື້ກິນກະບໍ່ພໍ ແຕ່ຄ່ານໍ້າ ຄ່າໄຟ ຮູ້ສຶກວ່າສູງເນາະ ເຮົາກະເລີຍບໍ່ມີເງິນຊິລ້ຽງກັນເນາະ ກະເລີຍຈູນເຈືອກັນໄປ ຊິວ່າຈັ່ງໃດກະຈູນເຈືອໄປນີ້ລະ ເຮົາກະວ່າຫຍຸ້ງຍາກນະ ຊ່ວງນີ້ ລັດຖະບານເພິ່ນກະສັ່ງປິດ ແຕ່ວ່າຖ້າຜູ້ໃດເປີດກະຮັບຜິດຊອບເອົາເອງ ລ້າງໄມ້ລ້າງມື ລະມັດລະວັງຕົວເອງສໍາລັບລູກຄ້າ ເລື່ອງປິດເພິ່ນກະສັ່ງປິດ ຫັ້ນແລ້ວແນວເພິ່ນປະກາດແລ້ວ.”

ບໍລິການບີບເສັ້ນແຜນໂບຮານ
ບໍລິການບີບເສັ້ນແຜນໂບຮານ

ເມື່ອຖາມເຖິງແຜນການໃນການຮັບມືກັບຜົນກະທົບຂອງພະຍາດໂຄວິດນັ້ນ ພະ ນັກງານທີ່ຄວບຄຸມການນວດ ການໃຫ້ບໍລິການລູກຄ້າ ຂອງຄົນພິການຕອບວ່າ:

“ແຜນຂອງເຮົາເນາະໃນອະນາຄົດ ຄັນວ່າໂຄວິດຍັງຄືຈັ່ງຊີ້ ໜ້າຈະປິດກິດຈະ ການໄວ້ກ່ອນ ຊິເມືອຢູ່ໃຜຢູ່ມັນກ່ອນ ເພາະວ່າມັນບໍ່ໄຫວລ້ຽງເຂົ້າກັນບໍ່ໄຫວ ກະຜູ້ໃດໃຈດີ ມີໃຈໃສສັດທາກະມາຊ່ວຍ ຄັນມາຊ່ວຍກະຊິໄດ້ຢູ່ນໍາກັນຕໍ່ເດ ໃຜກະຢູ່ຕ່າງແຂວງ ພໍ່ແມ່ກະບໍ່ມີ ໃຜກະບ້ານໄກເດ ຖ້າມີຜູ້ມາຊ່ວຍຄັນເປັນໄປໄດ້ກະຢາກໃຫ້ຢູ່ນໍາກັນຫັ້ນລະ.”

ພ້ອມກັນນັ້ນ ທ່ານກໍໄດ້ຮ້ອງຂໍໃຫ້ສັງຄົມຄົນລາວທັງຢູ່ໃກ້ ແລະຢູ່ໄກທີ່ມີນໍ້າໃຈ ໃຫ້ຊ່ວຍເຫລືອຄົນພິການພໍໃຫ້ຜ່ານພົ້ນວິກິດການອັນນັ້ນໄປດ້ວຍກັນ ຊຶ່ງ ທ່ານກ່າວຂໍຮ້ອງດັ່ງນີ້.

“ໃນຂະນະກໍາລັງພົບພໍ້ບັນຫານີ້ ກະມີຝາກຂໍຊ່ວຍເຫລືອຊຶ່ງກັນ ແລະກັນ ມີແຕ່ຝາກໃຫ້ສັງຄົມຊ່ວຍເຫລືອ ຊ່ວຍເບິ່ງຄົນພິການຕື່ມ.”

Disability Massage Clinic
please wait

No media source currently available

0:00 0:00:51 0:00
ລິງໂດຍກົງ

ສະຫລຸບແລ້ວ ສະພາບລະບາດຢ່າງໜັກຂອງພະຍາດໂຄວິດ-19 ທີ່ມີຜົນກະທົບຢ່າງໜັກຕໍ່ທຸກຂະແໜງການເສດຖະກິດ ແລະເກືອບໝົດທຸກຄົນ ໃນທົ່ວປະເທດນັ້ນ ກຸ່ມຄົນພິການທີ່ຕາມປົກກະຕິກໍພົບຄວາມຫຍຸ້ງຍາກໃນການທໍາມາຫາລ້ຽງຊີບຕົນເອງຢູ່ແລ້ວ ແມ່ນໄດ້ຮັບຜົນກະທົບໜັກໜ່ວງຫລາຍເປັນພິເສດໂດຍ ສະເພາະພວກທີ່ໃຫ້ບໍລິການນວດທີ່ເຄີຍມີລາຍໄດ້ເປັນປະຈໍານັ້ນ ເມື່ອກິດຈະການ ຖືກສັ່ງປິດໄວ້ເພື່ອສະກັດກັ້ນການແຜ່ລະບາດຂອງພະຍາດໂຄວິດ- 19 ດັ່ງກ່າວ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ
XS
SM
MD
LG