ໃນເອເຊຍຕາເວັນອອສຽງໃຕ້, ພາກພື້ນດັ່ງກ່າວ ແມ່ນເປັນທີ່ຮູ້ຈັກສຳລັບວຽກໂຮງຈັກໂຮງງານທີ່ມີລາຄາຖືກ ແລະ ມີການໃຊ້ຈ່າຍຂອງຜູ້ບໍລິໂພກ ທີ່ເຂັ້ມແຂງ, ບັນດາປະເທດຕ່າງໆນັບຈາກ ມຽນມາ ຫາ ຟີລິບປິນ ໄດ້ທຳນາຍການເຕີບໂຕດ້ານເສດຖະກິດປີ 2020 ຢູ່ລະດັບສູງກວ່າ 6 ເປີເຊັນ. ແຕ່ໃນຕອນນີ້, ພຽງຫົກເດືອນເຂົ້າໃນປີໃໝ່, ບໍ່ມີຜູ້ໃດມີຄວາມແນ່ໃຈປານໃດ.
ການແຜ່ລະບາດຂອງ ໄວຣັສໂຄໂຣນາ ທີ່ຮ້າຍແຮງໃນ ຈີນ ໄດ້ເຮັດໃຫ້ການທ່ອງທ່ຽວໃນ ມາເລເຊຍ, ສິງກະໂປ ແລະ ໄທ ຫຼຸດລົງ ໃນຂະນະທີ່ປະເທດເຫຼົ່ານີ້ໄດ້ຫ້າມການເຂົ້າປະເທດ ເພື່ອຄວບຄຸມການແຜ່ລາມຂອງໄວຣັສດັ່ງກ່າວ. ຕາມດ້ວຍສາຍການບິນຕ່າງໆໃນທົ່ວໂລກ ແມ່ນໄດ້ຍົກເລີກຖ້ຽວບິນ 25,000 ຖ້ຽວ. ຜູ້ຜະລິດສິນຄ້າສົ່ງອອກໃນປະເທດ ຫວຽດນາມ ທີ່ເປັນສູນກາງໂຮງຈັກໂຮງງານຂອງ ເອເຊຍຕາເວັນອອກສຽງໃຕ້ນັ້ນ ແມ່ນບໍ່ສາມາດຮັບເອົາວັດຖຸດິບຈາກ ຈີນ ໄດ້ຕະຫຼອດເວລາໃນເດືອນນີ້ ເພາະວ່າການແຜ່ລະບາດໄດ້ເຮັດໃຫ້ວຽກງານຕ່າງໆຢຸດ.
ແລະ ປະຊາຊົນທີ່ຢ້ານກົວໄວຣັສປະມານ 630 ລ້ານຄົນໃນພາກພື້ນດັ່ງກ່າວແມ່ນໄດ້ອາໄສຢູ່ໃນບ້ານ ແທນທີ່ຈະອອກໄປຊື້ເຄື່ອງ.
ຢູ່ນອກປະເທດ ຈີນ, ຜົນຕາມມາທາງເສດຖະກິດໃນທັນທີທີ່ສຸດ ຈະສະແດງໃຫ້ເຫັນຜ່ານການຫຼຸດລົງຂອງຈຳນວນນັກທ່ອງທ່ຽວ ແລະ ການສົ່ງອອກສິນຄ້າທີ່ອ່ອນແອລົງຫາ ຈີນ, ແລະ ການສົ່ງຕໍ່ຫາ ແລະ ຜ່ານເສດຖະກິດຕ່າງໆທີ່ໄດ້ລວມເຂົ້າໃນຕ່ອງໂສ້ອຸທານຂອງ ຈີນ.”
ພະຍາດປອດອັກເສບ ໄວຣັສໂຄໂຣນາສາຍພັນໃໝ່ ໄດ້ຖືກກວດພົບໃນເດືອນທັນວາປີກາຍນີ້ ທີ່ເມືອງ ວູຮານ ຂອງ ຈີນ. ປັດຈຸບັນນີ້, ມີປະຊາຊົນປະມານ 43,143 ຄົນໄດ້ລົ້ມປ່ວຍ ແລະ 1,018 ຄົນໄດ້ເສຍຊີວິດ, ສ່ວນໃຫຍ່ແມ່ນຄົນໃນ ຈີນ. ຈີນ ໄດ້ປິດເມືອງທີ່ຖືກຜົນກະທົບໜັກສຸດ ແລະ ຂະຫຍາຍວັນພັກກຸດຈີນອອກໄປນຶ່ງອາທິດ ເພື່ອກັນໂຣກດັ່ງກ່າວອອກຈາກໂຮງຮຽນ ແລະ ສະຖານທີ່ເຮັດວຽກຕ່າງໆ. ພະນັກງານສ່ວນໃຫຍ່ໄດ້ກັບຄືນໄປເຮັດວຽກຂອງເຂົາເຈົ້າໃນວັນຈັນທີ່ຜ່ານມາ.
