ເຈົ້າໜ້າທີ່ລະດັບສູງຂອງກອງທັບ ສະຫະລັດ ທ່ານນຶ່ງ ແລະ ສະມາຊິກບາງຄົນຂອງລັດຖະສະພາ ໄດ້ຍົກຄວາມເປັນຫ່ວງຂຶ້ນມາວ່າ ສະຫະລັດ ອາໄສຜະລິດຕະພັນການຢາທີ່ເຮັດໃນ ຈີນ ຫຼາຍໂພດ ໃນຂະນະທີ່ການລະບາດຂອງໄວຣັສໂຄໂຣນາ ໄດ້ເນັ້ນໃຫ້ເຫັນຄວາມອ່ອນແອຂອງຫ່ວງໂສ້ສະໜອງສິນຄ້າ. ຄວາມເປັນຮ່ວງດັ່ງກ່າວໄດ້ມີຂຶ້ນໃນຂະນະທີ່ລັດຖະບານກາງ ສະຫະລັດ ໄດ້ລາຍງານການຂາດແຄນຢາຄັ້ງທຳອິດຂອງປະເທດ ຍ້ອນການລະບາດດັ່ງກ່າວ.
ປະທານຂອງເສນາທິການຮ່ວມ ທ່ານ ມາກ ມິລລີ ທີ່ເຂົ້າຮ່ວມໃນການໃຫ້ການຢູ່ສະພາໃນອາທິດທີ່ຜ່ານມາໄດ້ກ່າວວ່າ “ພວກເຮົາມີລະບົບການແພດຂອງກອງທັບ, ແລະ ພວກເຮົາກໍມີການເຂົ້າເຖິງຢາທຸກຊະນິດແບບດຽວກັນ ທີ່ມີຢູ່ໃນລະບົບການຄ້າຕ່າງໆ. ເຈົ້າໄດ້ຊີ້ໃຫ້ເຫັນຢ່າງຖືກຕ້ອງວ່າ ມັນມີຄວາມສ່ຽງຫຼາຍທີ່ຈະມີປະເທດນຶ່ງ ເຊັ່ນ ຈີນ ເປັນຜູ້ຜະລິດໃນເປີເຊັນທີ່ສູງ, ຂ້າພະເຈົ້າບໍ່ຮູ້ວ່າມັນແມ່ນ 97 ເປີເຊັນ, 98 ເປີເຊັນ ຫຼື 80 ເປີເຊັນ, ບໍ່ວ່າມັນຈະແມ່ນຫຍັງກໍຕາມ, ແຕ່ຂ້າພະເຈົ້າຮູ້ວ່າມັນແມ່ນເປີເຊັນທີ່ສູງ ຂອງອົງປະກອບໃນອຸສາຫະກຳການຢາທົ່ວປະເທດ ທັງໃນກອງທັບ ແລະ ພົນລະເຮືອນ. ສະນັ້ນມັນແມ່ນຄວາມສ່ຽງ. ໃນເວລາເກີດຄວາມຂັດແຍ້ງຕິດອາວຸດນັ້ນ, ຖ້າມັນໄດ້ເກີດຂຶ້ນ, ແລະ ຫວັງວ່າມັນຈະບໍ່ເກີດຂຶ້ນ, ມັນເຫັນໄດ້ຊັດວ່າ ຈະເປັນຄວາມສ່ຽງຢ່າງໃຫຍ່ຫຼວງຕໍ່ ສະຫະລັດ.”
ທ່ານ ມິລລີ ໄດ້ກ່າວຕື່ມວ່າ ສະຫະລັດ ຕ້ອງການແຜນຍຸດທະສາດແຫ່ງຊາດ ເພື່ອແກ້ໄຂບັນຫາດັ່ງກ່າວ.
ໃນການຕອບໂຕ້ຕໍ່ການລະບາດຂອງໄວຣັສໂຄໂຣນາ, ເຊິ່ງໄດ້ຖືກລາຍງານຄັ້ງທຳອິດຢູ່ໃນ ເມືອງ ວູຫານ, ປະເທດ ຈີນ ນັ້ນ, ລັດຖະບານໃນນະຄອນຫຼວງ ປັກກິ່ງ ໄດ້ຫ້າມການເຄື່ອນຍ້າຍຂອງຄົນຢ່າງກວ້າງຂວາງ ນັບຕັ້ງແຕ່ທ້າຍເດືອນມັງກອນເປັນຕົ້ນມາ ໃນຄວາມພະຍາຍາມທີ່ຈະຄວບຄຸມການແຜ່ລະບາດຂອງພະຍາດ, ເຊິ່ງຮູ້ຈັກຢ່າງເປັນທາງການດັ່ງກັບ COVID-19. ໂຮງຈັກໂຮງງານຫຼາຍແຫ່ງຍັງຖືກປິດໄວ້ ແລະ ຖະໜົນກໍຖືກອັດ. ການກຳຈັດຕໍ່ການຫຼັ່ງໄຫຼຂອງສິນຄ້າ ແລະ ຜະລິດຕະພັນທີ່ວ່ານີ້ ແມ່ນລວມມີຜະລິດພັນການຢາທີ່ສຳຄັນ ແລະ ວັດຖຸການແພດທີ່ ຈີນ ສົ່ງອອກໄປທົ່ວໂລກ.
ໃນການກ່າວຢ້ຳວ່າ ການລະບາດຂອງໄວຣັສໂຄໂຣນາໃນ ຈີນ ໄດ້ເຮັດໃຫ້ຕໍ່ໂສ້ອຸປະທານໃນທົ່ວໂລກອ່ອນນແອລົງນັ້ນ, ຜູ້ກວດກາອາຫານ ແລະ ຢາ ສະຫະລັດ ດຣ. ສເຕເຟັນ ຮານ ໄດ້ກ່າວໃນຖະແຫຼງການສະບັບນຶ່ງເມື່ອອາທິດທີ່ຜ່ານມາວ່າ “ການຂາດແຄນຢາຊະນິດນຶ່ງແມ່ນໄດ້ເກີດຂຶ້ນໃນ ສະຫະລັດ ແລ້ວ. ອົງການອາຫານ ແລະ ຢາບໍ່ໄດ້ເປີດເຜີຍຊື່ຂອງຢາ ຫຼື ຜູ້ຜະລິດມັນ.
ທ່ານ ຮານ ຍັງໄດ້ກ່າວວ່າ ປັດຈຸບັນນີ້, ຢາ 20 ຊະນິດແມ່ນໄດ້ມາຈາກປະເທດ ຈີນ ພຽງບ່ອນດຽວ. ອົງການອາຫານ ແລະ ຢາ ພິຈາລະນາມັນວ່າເປັນຢາທີ່ບໍ່ສຸກເສີນ.