ບັນດາເຈົ້າໜ້າທີ່ສາທາລະນະສຸກ ຈີນ ໄດ້ລາຍງານໃນວັນຈັນມື້ນີ້ວ່າ ຈຳນວນກໍລະນີທີ່ໄດ້ຮັບການຢືນຢັນຈາກການແຜ່ລະບາດຂອງໄວຣັສໂຄໂຣນາ ແມ່ນໄດ້ກາຍ 70,000 ຄົນ, ພ້ອມກັບຜູ້ເສຍຊີວິດສູງສຸດໄດ້ເພີ່ມຂຶ້ນເຖິງເກືອບ 1,800 ຄົນ.
ຜູ້ທີ່ຕິດໄວຣັສປະມານ 11,000 ແມ່ນໄດ້ຫາຍດີຈາກໄວຣັສນັ້ນແລ້ວ.
ແຂວງ ຮູເບ ຂອງ ຈີນ, ເຊິ່ງແມ່ນສູນກາງຂອງການແຜ່ລະບາດນັ້ນ, ລາຍງານການເສຍຊີວິດຕື່ມ 100 ກໍລະນີໃນວັນຈັນມື້ນີ້ ໃນຂະນະທີ່ບັນດາພະນັກງານຮັກສາສຸຂະພາບໄດ້ເດີນທາງໄປຮອດເພີ່ມເຕີມ ເພື່ອຊ່ວຍເຫຼືອລະບົບການແພດທີ່ໄດ້ຕົກຢູ່ພາຍໃຕ້ຄວາມກົດດັນ ນັບຕັ້ງແຕ່ກໍລະນີທຳອິດໄດ້ຖືກຄົ້ນພົບເມື່ອທ້າຍເດືອນທັນວາປີກາຍນີ້.
ກໍລະນີສ່ວນຫຼາຍທີ່ຖືກກວດພົບຢູ່ນອກປະເທດ ຈີນ ແມ່ນຜູ້ໂດຍສາຍເທິງກຳປັ່ນສຳລານທີ່ຖືກກັກກວດໂຣກໃນແຂວງ ໂຢໂກຮາມາ ປະເທດ ຍີ່ປຸ່ນ.
ສະຫະລັດ ໄດ້ກ່າວໃນວັນຈັນມື້ນີ້ວ່າ ເຂົາເຈົ້າໄດ້ຍົກຍ້າຍປະຊາຊົນຂອງເຂົາເຈົ້າຫຼາຍກວ່າ 300 ຄົນ ແລະ ສະມາຊິກຄອບຄົວຂອງເຂົາເຈົ້າຜູ້ທີ່ຢູ່ເທິງກຳປັ່ນ Diamond Princess. ເຮືອບິນຖ້ຽວນຶ່ງທີ່ນຳພາຜູ້ໂດຍສານທັງຫຼາຍໄດ້ເດີນທາງຮອດຖານທັບອາກາດ ທຣາວິສ (Travis) ທີ່ລັດຄາລິຟໍເນຍ ໃນວັນຈັນມື້ນີ້, ໃນຂະນະທີ່ຖ້ຽວບິນອື່ນໆໄດ້ເດີນທາງຮອດຫຼາຍຊົ່ວໂມງຕໍ່ມາ ທີ່ຖານທັບອາກາດ ແລັກແລນ ໃນລັດເທັກຊັສ.
ກຸ່ມນຶ່ງທີ່ມີ 14 ຄົນຜູ້ທີ່ບໍ່ໄດ້ສະແດງອາການ, ແຕ່ຖືກກວດມີຜົນບວກສຳລັບໄວຣັສດັ່ງກ່າວ ແມ່ນໄດ້ຮັບອະນຸຍາດໃຫ້ຂຶ້ນເຮືອບິນລຳຕ່າງໆ ໃນເຂດທີ່ຖືກແຍກຢູ່ໂດດດ່ຽວຈາກຜູ້ໂດຍສານຄົນອື່ນໆ. ຜູ້ທີ່ຖືກຍົກຍ້າຍໝົດທຸກຄົນຈະຖືກກັກກວດພະຍາດເປັນເວລາ 14 ວັນ.
ດ້ວຍກໍລະນີໃໝ່ 99 ກໍລະນີຖືກລາຍງານໂດຍບັນດາເຈົ້າໜ້າທີ່ ຍີ່ປຸ່ນ ໃນວັນຈັນມື້ນີ້, ຈຳນວນປະຊາຊົນ 454 ຄົນຈາກ 3,700 ຢູ່ເທິງກຳປັ່ນສຳລານນັ້ນ ໄດ້ຖືກກວດມີຜົນບວກສຳລັບໄວຣັສໂຄໂຣນາ.
ອອສເຕຣເລຍ ໄດ້ປະກາດໃນວັນຈັນມື້ນີ້ວ່າ ເຂົາເຈົ້າກໍຈະຍົກຍ້າຍປະຊາຊົນຂອງເຂົາເຈົ້າຈາກປັ່ນລຳດັ່ງກ່າວເຊັ່ນກັນ. ການາດາ, ອິຕາລີ, ເກົາຫຼີໃຕ້ ແລະ ຮົງກົງ ກໍມີແຜນທຳການປະຕິບັດການຍົກຍ້າຍຄົນຂອງເຂົາເຈົ້າດ້ວຍ.
ກະຊວງການຕ່າງປະເທດ ສະຫະລັດ ກໍກຳລັງທຳການສອບສວນໃນກໍລະນີຄົນ ອາເມຣິກັນ ຜູ້ທີ່ຖືກກວດພົບຕິດໄວຣັສໂຄໂຣນາ ຫຼັງຈາກໄດ້ຂຶ້ນກຳປັ່ນສຳລານອີກລຳນຶ່ງຊື່ວ່າ, The Westerdam, ເຊິ່ງຜູ້ໂດຍສານຂອງເຂົາເຈົ້າໄດ້ຖືກກວດບໍ່ພົບໄວຣັສ ກ່ອນລົງຈາກກຳປັ່ນໃນປະເທດ ກຳປູເຈຍ.
ບັນດາເຈົ້າໜ້າທີ່ການແພດ ມາເລເຊຍ ໄດ້ກ່າວວ່າ ຜູ້ໂດຍສານຄົນນັ້ນ, ເຊິ່ງແມ່ນແມ່ຍິງອາຍຸ 83 ປີ, ໄດ້ຖືກກວດພົບໄວຣັສສອງຄັ້ງ ໃນເວລາເດີນທາງຮອດ ມາເລເຊຍ ຫຼັງຈາກໄດ້ສະແດງໃຫ້ເຫັນສັນຍານຂອງການຕິດເຊື້ອໄວຣັສ, ອີງຕາມການກ່າວຂອງໂຄສົກກະຊວງການຕ່າງປະເທດໃນວັນອາທິດວານນີ້. ລາວແມ່ນຄົນທຳອິດຈາກກຳປັ່ນ The Westerdam ທີ່ຖືກກວດມີຜົນບວກ. ແຕ່ສາມີຂອງລາວຖືກກວດບໍ່ພົບໄວຣັສ.
