ເກົາຫລີເໜືອສືບຕໍ່ຢືນຢັດວ່າບໍ່ມີການຕິດເຊື້ອໄວຣັສໂຄໂຣນາ ຢູ່ພາຍໃນຊາຍແດນຂອງຕົນ ເຖິງແມ່ນວ່າປະເທດທີ່ທຸກຈົນແຫ່ງນັ້ນ ໄດ້ຂໍຮ້ອງໃຫ້ອົງການຊ່ວຍເຫລືອສາກົນຊ່ວຍໃນການປ້ອງກັນການລະບາດຂອງເຊື້ອພະຍາດດັ່ງກ່າວກໍຕາມ.
ບໍ່ມີ "ກໍລະນີທີ່ໄດ້ຮັບການຢືນຢັນ" ວ່າຕິດເຊື້ອໄວຣັສໂຄໂຣນາແຕ່ຢ່າງໃດ, ອີງຕາມຄຳເວົ້າຂອງເຈົ້າໜ້າທີ່ການແພດເກົາຫລີເໜືອທ່ານນຶ່ງ ທີ່ຖືກກ່າວອ້າງຢູ່ໃນໜັງສືພິມໂຣດອງ ຊິນມູນ (Rodong Sinmun), ຊຶ່ງເປັນໜັງສືພິມທາງການຂອງພັກກຳມະກອນທີ່ປົກຄອງເກົາຫລີເໜືອຢູ່ນັ້ນ ໃນວັນອັງຄານມື້ນີ້.
ເຈົ້າໜ້າທີ່ເກົາຫລີເໜືອທ່ານນຶ່ງກ່າວວ່າ ມາດຕະການປ້ອງກັນທົ່ວປະເທດລວມທັງລະບົບກັກກັນຄົນໄວ້ນັ້ນ ໄດ້ສະກັດກັ້ນເຊື້ອໄວຣັສດັ່ງກ່າວໄວ້ຢ່າງມີຜົນສຳເລັດດີ, ອີງຕາມອົງການຂ່າວຢອນຮັບຂອງເກົາຫລີໃຕ້.
ເຊື້ອໄວຣັສທີ່ເຮັດໃຫ້ມີອາການປ່ວຍຄ້າຍຄືກັບການເປັນໂຣກປອດບວມ ທີ່ຊື່ວ່າ ໂຄວິດ (COVID)-19 ນັ້ນ ໄດ້ເຮັດໃຫ້ເກືອບຮອດ 2,000 ເສຍຊີວິດ ແລະເຮັດໃຫ້ຫລາຍກວ່າ 73,000 ຄົນຖືກຕິດເຊື້ອ. ຄົນຕິດເຊື້ອໄວຣັສນີ້ເກືອບໝົດ ທຸກຄົນແມ່ນຢູ່ໃນຈີນ ຊຶ່ງເປັນປະເທດໃກ້ຄຽງຂອງເກົາຫລີເໜືອນັ້ນ.
ການລະບາດຂອງເຊື້ອໄວຣັສໂຄໂຣນາ ອາດຈະກັບກາຍເປັນໄພຫາຍະນະທາງດ້ານມະນຸດສະທຳ ຢູ່ໃນເກົາຫລີເໜືອທີ່ມີຫລາຍພາກໃນນັ້ນ ມີຄວາມທຸກຍາກ ຫລາຍນັ້ນ ກໍເປັນໄດ້. ບັນດານັກຊ່ຽວຊານເຕືອນວ່າ ປະເທດດັ່ງກ່າວ ບໍ່ມີໂຄງຫລ່າງພື້ນຖານ ຫລືອຸປະກອນການແພດພຽງພໍທີ່ຈະສູ້ກັບເຊື້ອໄວຣັສນີ້ໄດ້.
ພາຍຫລັງທີ່ເຊື້ອໄວຣັສນີ້ ໄດ້ປາກົດໂຕຂຶ້ນມາ ໃນເດືອນແລ້ວນີ້ ຢູ່ເຂດພາກກາງຂອງຈີນ ເກົາຫລືເໜືອກໍໄດ້ເອົາບາດກ້າວຢ່າງວ່ອງໄວເພື່ອປິດຊາຍແດນຂອງຕົນ. ແຕ່ວ່າ ການເຮັດແນວນັ້ນ ເປັນເລື້ອງຫຍຸ້ງຍາກເພາະວ່າ ເກົາຫລີເໜືອແມ່ນອີງອາໄສຕໍ່ການເຮັດການຄ້າທັງຢ່າງເປັນທາງການ ແລະບໍ່ເປັນທາງການກັບຈີນ. ມີລາຍງານຫລາຍອັນທີ່ບໍ່ໄດ້ຮັບການຢືນຢັນ ສະແດງໃຫ້ເຫັນວ່າ ເຊື້ອໄວຣັສໂຄໂຣນາ ໄດ້ແຜ່ຜາຍໄປເຖິງປະເທດນັ້ນແລ້ວ.
ເກົາຫລີເໜືອ ທີ່ເອີ້ນການຄຳເນີນຄວາມພະຍາຍາມໃນການປ້ອງກັນເຊື້ອໄວຣັສ ເປັນເລື້ອງທີ່ "ເຮັດໃຫ້ປະເທດຊາດຢູ່ລອດໄດ້," ນັ້ນ ໄດ້ຮ້ອງຂໍການຊ່ວຍເຫລືອຈາກກຸ່ມບັນເທົາທຸກສາກົນຈຳນວນນນຶ່ງ.
