ຜູ້ນຳສະພາສູງຈາກພັກເດໂມແຄຣັດ ໄດ້ກ່າວເຕືອນປະທານາທິບໍດີ ດໍໂນລ ທຣຳ ໃນວັນອັງຄານວານນີ້ວ່າ ພວກເຂົາເຈົ້າຈະນໍາໃຊ້ການໂອ້ລົມກ່ຽວກັບເງິນທຶນຂອງລັດຖະບານທີ່ກຳລັງຈະມີຂຶ້ນນີ້ ເປັນແຮງຜັກດັນເພື່ອຕໍ່ສູ້ກັບການປ່ຽນແປງຂອງລັດຖະບານ ໃນໜ່ວຍງານຕ່າງໆຂອງລັດຖະບານສະຫະລັດ.
ຄໍາເຕືອນຂອງພັກເດໂມແຄຣັດ ມີຂຶ້ນໃນຂະນະທີ່ກະຊວງປະສິດທິພາບຂອງລັດຖະບານ ຫຼື DOGE, ເຊິ່ງນໍາໂດຍ ທ່ານ ອີລອນ ມັສກ໌, ໄດ້ຍ້າຍອົງການເພື່ອການພັດທະນາລະຫວ່າງປະເທດຂອງສະຫະລັດ ຫຼື USAID ໄປຢູ່ພາຍໃຕ້ການຄວບຄຸມຂອງກະຊວງການຕ່າງປະເທດສະຫະລັດໃນຕົ້ນອາທິດນີ້. ຝ່າຍບໍລິຫານກ່າວວ່າ ພວກເຂົາເຈົ້າກຳລັງທົບທວນຄືນກ່ຽວກັບກິດຈະກຳການຊ່ວຍເຫຼືອຕ່າງປະເທດຂອງອົງການ USAID ເພື່ອ “ໃຫ້ໝັ້ນໃຈວ່າ ສອດຄ່ອງກັບວາລະ ອາເມຣິກາຕ້ອງມາກ່ອນ.”
ທ່ານ ຊັກ ຊູມເມີ ຜູ້ນໍາສຽງສ່ວນນ້ອຍຢູ່ໃນສະພາສູງກ່າວຕໍ່ບັນດານັກຂ່າວໃນວັນອັງຄານວານນີ້ວ່າ “ບໍ່ວ່າ DOGE ຈະເຮັດວຽກແບບໃດກໍຕາມ, ມັນບໍ່ແມ່ນປະຊາທິປະໄຕ. ພວກເຮົາຮູ້ວ່າ ປະຊາທິປະໄຕມີລັກສະນະເປັນແນວໃດ. ມັນເປັນການເປີດເຜີຍ. ມັນບໍ່ແມ່ນຄວາມລັບ.”
ພັກເດໂມແຄຣັດ ສາມາດຜັກດັນການປ່ຽນແປງຫຼ້າສຸດບາງສິ່ງຂອງລັດຖະບານສະຫະລັດ ດ້ວຍການຍຸຕິລົງຄະແນນສຽງຕໍ່ຮ່າງກົດໝາຍການໃຊ້ຈ່າຍສະບັບໃໝ່, ໂດຍມະຕິໄລຍະສັ້ນ ທີ່ຍັງຄົງໃຫ້ລັດຖະບານດໍາເນີນວຽກງານສືບຕໍ່ໄປ ຈະສິ້ນສຸດລົງໃນວັນທີ 14 ມີນານີ້.
ໃນວັນຈັນແລ້ວນີ້, ບັນດາສະມາຊິກລັດຖະສະພາຈາກພັກເດໂມແຄຣັດ ໄດ້ທໍາການປະທ້ວງຢູ່ນອກຫ້ອງການ USAID ທີ່ຖືກປິດລົງ, ໂດຍກ່າວວ່າ ລັດຖະບານຂອງ ທ່ານ ທຣໍາ ໃຊ້ອຳນາດເກີນຂອບເຂດ.
ສະມາຊິກສະພາສູງຈາກພັກເດໂມແຄຣັດ ທ່ານ ບຣາຍອັນ ຊວາດສ໌ (Brian Schatz) ກ່າວວ່າ “ຖ້າພວກທ່ານຕ້ອງການປ່ຽນແປງອົງການຕ່າງໆ, ຄວນສະເໜີບັນຊີລາຍຊື່ ແລະຮັບຜ່ານຮ່າງກົດຫມາຍ. ທ່ານບໍ່ສາມາດຍຸຕິອົງການໃດໆທີ່ທ່ານບໍ່ມັກ ຫຼືວ່າທ່ານບໍ່ເຫັນດີ ດ້ວຍການອອກຄໍາສັ່ງຝ່າຍບໍລິຫານ, ຫຼື ທໍາການບຸກເຂົ້າໄປໃນອາຄານ ແລະຍຶດເອົາເຄື່ອງບໍລິການ. ນັ້ນ, ມັນບໍ່ແມ່ນວິທີການເຮັດວຽກຂອງລັດຖະບານອາເມຣິກາ.”
ອົງການ USAID ຄຸ້ມຄອງບໍລິຫານບັນດາໂຄງການຊ່ວຍເຫຼືອຕ່າງປະເທດຂອງສະຫະລັດ ຈໍານວນຫຼາຍສິບຕື້ໂດລາ.
ທ່ານ ຮາຄີມ ແຈັຟຟຣີສ໌, ຜູ້ນໍາສະພາຕໍ່າຈາກພັກເດໂມແຄຣັດກ່າວໃນວັນອັງຄານວານນີ້ວ່າ “ລັດຖະທຳມະນູນ ກໍານົດໃຫ້ປະທານາທິບໍດີ ແລະຝ່າຍບໍລິຫານ ເປັນຜູ້ຈັດສັນງົບປະມານ, ລັດຖະທຳມະນູນ ກໍານົດໃຫ້ປະທານາທິບໍດີມີຄວາມຮັບຜິດຊອບ ໃນການເອົາໃຈໃສ່ໃຫ້ມີການບັງຄັບໃຊ້ກົດໝາຍຢ່າງຊື່ສັດ, ຂໍ້ຕົກລົງການໃຊ້ຈ່າຍ ຕ້ອງຜ່ານຂັ້ນຕອນການຈັດສັນງົບປະມານ.
ຟໍຣັມສະແດງຄວາມຄິດເຫັນ