ພວກຜູ້ນຳລັດຖະສະພາສະຫະລັດໄດ້ບັນລຸຂໍ້ຕົກລົງຊົ່ວຄາວກັບລັດຖະ ບານ ທ່ານໂອບາມາ ກ່ຽວກັບແຜນການການໃຊ້ຈ່າຍຂອງລັດຖະບານ ທີ່ສາມາດຫຼີກລ້ຽງການປະເຊີນໜ້າດ້ານງົບ ປະມານອີກຄັ້ງໜຶ່ງລະຫວ່າງ ທຳນຽບຂາວ ແລະ ສະມາຊິກ ອະນຸລັກນິຍົມຈັດຂອງ ພັກຣີພັບບລີກັນ.
ຂໍ້ຕົກລົງນີ້ ແມ່ນຜົນຂອງການເຈລະຈາກັນ ເປັນເວລາຫຼາຍສັບ ປະດານຳໂດຍປະທານສະພາຕ່ຳທ່ານ John Boehner ແລະ ຜູ້ນຳສຽງສ່ວນຫລາຍໃນສະພາສູງຂອງພັກຣີພັບ ບລີກັນທ່ານ Mitch McConnell, ບັນດາຜູ້ນຳຂອງສະພາຕ່ຳ ແລະ ສະພາສູູງ ພາຍໃຕ້ ການນຳພາໂດຍພັກຣີພັບບລີກັນ, ພ້ອມກັບຜູ້ນຳສະພາຕ່ຳພັກເດໂມແຄຣັດ ທ່ານນາງ Nancy Pelosi ແລະຜູ້ນຳຂອງພັກເດໂມແຄຣັດ ໃນສະພາ ສູງທ່ານ Harry Reid.
ແຜນການດັ່ງກ່າວຈະເປັນການໃຫ້ເງິນສະໜັບສະໜຸນຢ່າງເຕັມທີ່ຕໍ່ລັດຖະບານກາງ ແລະ ເພີ່ມລະດັບໜີ້ສິນໃນກູ້ຢືມເງິນຂອງລັດຖະບານໄປ ຈົນຮອດເດືອນມີນາ 2017, 2 ເດືອນ ຫຼັງຈາກທ່ານ ໂອບາມາ ອອກຈາກການດຳລົງຕຳແໜ່ງ. ແຜນດັ່ງກ່າວຈະເພີ່ມການໃຊ້ຈ່າຍ ທັງໃນທະຫານ ແລະ ໂຄງການພາຍໃນປະເທດປະມານ 50 ຕື້ໃນປີ 2016, ແລະ ອີກ 30 ຕື້ໂດລາໃນປີ 2017, ພ້ອມກັບອີກ 16 ຕື້ໂດລາ ຕໍ່ປີສຳລັບງົບປະມານໃນການຕໍ່ສູ້ຢູ່ຕ່າງປະເທດຂອງທຳນຽບຫ້າແຈ. ການໃຫ້ເງິນທຶນເພີ່ມເຕີມຈະຍົກເລີກການຈຳກັດການໃຊ້ຈ່າຍແບບອັດຕະໂນມັດ ທີ່ກຳນົດໂດຍລັດຖະສະພາພາຍໃຕ້ຂໍ້ຕົກລົງງົບປະມານ 2011.
ການໃຊ້ຈ່າຍເພີ່ມເຕີມອາດຈະຖືກຊົດເຊີຍໂດຍການເກັບເງິນໄລຍະຍາວຈາກໂຄງການປະກັນໄພ ສະຫວັດດີການສັງຄົມ ຄົນພິການ ແລະ ກຳນົດໃນການໃຊ້ຈ່າຍກ່ຽວກັບການເບິ່ງແຍງສຸກຂະພາບໂດຍໂຄງການປະກັນໄພ Medicare.
ແຜນການດັ່ງກ່າວຕ້ອງຖືກຮັບຮອງໂດຍສະພາຕ່ຳ ແລະ ສະພາສູງ ແລະ ລົງນາມໂດຍ ປະທານາທິບໍດີ ກ່ອນວັນອັງຄານສັບປະດາໜ້າ, ວັນທີ 3 ພະຈິກ, ເມື່ອອຳນາດໃນການກູ້ຢືມຂອງລັດຖະບານໃນປະຈຸບັນຈະໝົດອາຍຸລົງ ແລະ ປະເທດກໍຈະໄດ້ປະເຊີນໜ້າກັບພັນ ທະໃນການຊຳລະໜີ້ເປັນຄັ້ງທຳອິດເທົ່າທີ່ເຄີຍມີມາ.
