ສາພາສູງສະຫະລັດ ໄດ້ເລື່ອນການລົງຄະແນນສຽງອອກໄປ ໃນ
ຕອນເດິກວັນສຸກວານນີ້ ກ່ຽວກັບງົບປະມານ ຈຳນວນມະຫາສານ
ຂອງລັດຖະບານ ຊຶ່ງຈະສະໜອງທຶນໃຊ້ຈ່າຍ ໃຫ້ສ່ວນໃຫຍ່ ຂອງ
ລັດຖະບານກາງສະຫະລັດ ໄປຮອດເດືອນກັນຍາປີ 2015 ນັ້ນ.
ຄາດກັນວ່າ ບັນດາຜູ້ແທນສະພາສູງ ຈະລົງຄະແນນສຽງ ກ່ຽວກັບ
ຮ່າງງົບປະມານ ມູນຄ່າ 1100 ຕື້ດອລລ່າ ໃນວັນຈັນຈະມາເຖິງນີ້.
ແລະ ຄາດກັນວ່າ ສະພາສູງຈະຮັບຜ່ານ ຮ່າງກົດໝາຍຢຸດຊ່ອງ
ຫວ່າງ ໃນວັນເສົາມື້ນີ້ ເພື່ອຈະສະໜອງທຶນ ໃຫ້ລັດຖະບານມີເງິນ
ໃຊ້ຈ່າຍ ຊົ່ວຄາວ ໄປຈົນເຖິງວັນພຸດອາທິດໜ້າ.
ສະພາຕ່ຳໄດ້ຜ່ານງົບປະມານໃຊ້ຈ່າຍຊຸດໃຫຍ່ນັ້ນໄປແລ້ວ ແລະໄດ້ຮັບຜ່ານຮ່າງງົບປະມານ ແກ້ໄຂຕໍ່ເນື່ອງ ຫລືຊົ່ວຄາວນັ້ນ ເພື່ອອຳນວຍໃຫ້ລັດຖະບານມີເງິນບໍລິຫານງານຕໍ່ໄປ ແລະ ອຳນວຍໃຫ້ ບັນດາຜູ້ແທນ ສະພາສູງ ຈາກທັງສອງພັກຄື ພັກຣີພັບບລີກັນຫົວອະນຸລັກ ນິຍົມ ແລະ ພັກເດໂມແຄຣັດຫົວເສລີນິຍົມ ແກ້ໄຂຄວາມກັງວົນຕ່າງໆ.
ປະທານາທິບໍດີ ບາຣັກ ໂອບາມາ ກ່າວຖະແຫລງໃນວັນສຸກວານນີ້ ຢູ່ທີ່ທຳນຽບຂ່າວ ວ່າ
ທ່ານມີຄວາມຫວັງວ່າ ຮ່າງກົດໝາຍງົບປະມານໃຊ້ຈ່າຍສຳຫລັບລັດຖະບານ ຈະຜ່ານ
ສະພາສູງ. ປະທານາທິບໍດີ ກ່າວອີກວ່າ ຮ່າງກົດໝາຍນີ້ເປັນການປານີປານອມກັນ
ລະຫວ່າງທັງສອງພັກການເມືອງ.
