ສະຖານທູດຈີນໃນນະຄອນຫລວງ Brazzaville ກ່າວໃນວັນຈັນມື້ນີ້ວ່າ ມີຄົນຈີນ 6 ຄົນເສຍຊີວິດແລະບາດເຈັບຕື່ມອີກຫລາຍສິບຄົນ ໃນເຫດລະເບີດຢູ່ສາງເກັບອາວຸດໃນວັນອາທິດວານນີ້ ທີ່ນະຄອນຫລວງຂອງສາທາລະນະລັດຄອງໂກນັ້ນ.
ອົງການຂ່າວຊິນຫົວຂອງທາງການຈີນອ້າງຄໍາເວົ້າຂອງບັນດາເຈົ້າໜ້າທີ່ຈີນ ທີ່ກ່າວວ່າ ພວກທີ່ໄດ້ຮັບເຄາະຮ້າຍຄັ້ງນີ້ເຮັດວຽກໃຫ້ກຸ່ມບໍລິສັດວິສະວະກໍາກໍ່ສ້າງປັກກິ່ງ. ມີພະນັກງານຈີນປະມານ 140 ຄົນເຮັດວຽກຢູ່ໃນບ່ອນກໍ່ສ້າງດັ່ງກ່າວ ເວລາເກີດລະເບີດຂຶ້ນນັ້ນ.
ສະຖານທູດຈີນກ່າວວ່າ ພວກພະນັກງານຈີນບາງຄົນໄດ້ຮັບບາດເຈັບສາຫັດ ແລະພະນັກ
ງານຄົນນຶ່ງ ຍັງຊອກຫາບໍ່ເຫັນ.
ພວກພະນັກງານຈີນເຫລົ່ານີ້ແມ່ນຮວມຢູ່ໃນຈໍານວນຄົນງານປະມານ 200 ຄົນທີ່ເສຍຊີວິດ ແລະອີກປະມານ 200 ຄົນທີ່ໄດ້ຮັບບາດເຈັບໃນເຫດລະເບີດຢູ່ສາງເກັບອາວຸດ ຕັ້ງຢູ່ແຄມແມ່ນໍ້າຄອງໂກນັ້ນ.
