ຄະນະກຳມະການສອບສວນຂອງລັດຖະບານກາງສະຫະລັດ ທີ່
ລັດ Missouri ທາງພາກກາງຂອງປະເທດ ຈະຮັບຟັງແລະພິຈາ
ລະນາຫລັກຖານ ກ່ຽວກັບເຫດການຍິງໄວລຸ້ນຜິວດຳບໍ່ມີອາວຸດ
ຄົນນຶ່ງຕາຍ ຢູ່ເມືອງ Ferguson. Chris Simkins ນັກຂ່າວວີ
ໂອເອ ມີລາຍງານກ່ຽວກັບການສອບສວນ ຄວາມຈິງກ່ຽວກັບ
ເຫດການຍິງກັນດັ່ງກ່າວ ທີ່ໄດ້ກະຕຸ້ນໃຫ້ມີການປະທ້ວງຢ່າງຮຸນ
ແຮງ ມາເປັນເວລາຫລາຍມື້ແລ້ວ ໃນເມືອງ Ferguson ເຂດຊານ
ນະຄອນ Saint Louis ເມືອງຫລວງ ແລະເມືອງໃຫຍ່ສຸດຂອງລັດ
Missouri ຊຶ່ງດາຣາຈະນຳມາສະເໜີທ່ານ.
ບັນດາໄອຍະການກຳລັງພິຈາລະນາເບິ່ງຫລັກຖານ ໃນເຫດການຍິງທ້າວ Michael
Brown ໄວ 18 ປີ ຕາຍ ໂດຍທ້າວ Darren Wilson ຕຳຫລວດເມືອງ Ferguson ລັດ Missouri.
ນັບແຕ່ເກີດເຫດການດັ່ງກ່າວເປັນຕົ້ນມາ ຊາວເມືອງ Ferguson ຊຶ່ງເປັນຄົນຜິວດຳ
ໂດຍສ່ວນໃຫຍ່ນັ້ນ ໄດ້ພາກັນທວງເອົາຄຳຕອບ ກ່ຽວກັບສິ່ງທີ່ໄດ້ເກີດຂຶ້ນ.
ນາງ Lesley McSpadden ແມ່ຂອງທ້າວ Brown ກ່າວວ່າ ລູກຊາຍຂອງລາວ ຖືກຄາດ
ຕະກຳ ແລະຕ້ອງການໃຫ້ມີການສືບສວນສອບສວນ ຢ່າງລະອຽດຖີ່ຖ້ວນ.
ນາງ Lesley McSpadden ເວົ້າວ່າ “ຢາກໃຫ້ມີຄວາມຍຸດຕິທຳ ແລະຈັບຜູ້ຊາຍ
ຄົນນີ້ ແລະເຮັດໃຫ້ລາວຮັບຜິດຊອບ ຕໍ່ສິ່ງທີ່ລາວໄດ້ກະທຳ.”
ມີຄຳບອກເລົ່າທີ່ຂັດແຍ້ງກັນ ກ່ຽວກັບສະຖານະການທີ່ນຳໄປສູ່ການເສຍຊີວິດ ຂອງທ້າວ Michael Brown ນັ້ນ.
ຕຳຫລວດໄດ້ເອົາພາບຈາກກ້ອງວົງຈອນປິດອອກເຜີຍແຜ່ ທີ່ກ່າວກັນວ່າ ສະແດງໃຫ້
ເຫັນທ້າວ Michael Brown ລັກເອົາຢາສູບຊີກາຣ໌ ຢູ່ຮ້ານສະດວກຊື້ແຫ່ງນຶ່ງ ບໍ່ດົນກ່ອນ
ຖືກຍິງຕາຍ. ແຕ່ພວກເຈົ້າໜ້າທີ່ສືບສວນເວົ້າວ່າ ນັ້ນບໍ່ແມ່ນເຫດຜົນທີ່ນາຍຕຳຫລວດ
Wilson ຊຶ່ງກຳລັງປະຕິບັດໜ້າທີ່ລາດຕະເວນຢູ່ນັ້ນ ຢຸດລົດ ແລ້ວລົງໄປຫາທ້າວ Michael
ເວລາລາວເຫັນຜູ້ກ່ຽວ ຍ່າງຢູ່ຫົນທາງ.
ພາບຫຼ້າສຸດ ຈາກ ມ. Ferguson
ພວກສືບສວນເວົ້າວ່າ ໃນຈຸດໃດຈຸດນຶ່ງ ທ້າວ Michael ໄດ້ຍູ້ນາຍຕຳຫລວດ Wilson
ເຂົ້າໄປໃນລົດລາດຕະເວນຂອງລາວ ແລະທຳຮ້າຍຮ່າງກາຍລາວ ໃນລະຫວ່າງການຕໍ່ສູ້
ກັນ. ຕໍ່ມາ ໄດ້ມີສຽງປືນ ຢ່າງນ້ອຍນັດນຶ່ງ ດັງຂຶ້ນຢູ່ໃນລົດ. ທ່ານ Jon Belmar ຫົວໜ້າ
ຕຳຫລວດ ເຂດ Saint Louis County ກ່າວດັ່ງນີ້:
“ພວກເຮົາເຂົ້າໃຈວ່າ ໃນຈຸດນີ້ຂອງການສວບສວນນັ້ນ ໄດ້ມີການຍາດແຍ່ງກັນ
ເອົາປືນຂອງຕຳຫລວດ ຢູ່ທາງໃນລົດ.”
ຕຳຫລວດເວົ້າວ່າ ທ້າວ Wilson ມີຮອຍຊ້ຳຂອງການຖືກຊົກຕີ ຢູ່ໜ້າຂອງລາວ ແຕ່ພວກ
ທີ່ເຫັນເຫດການກັບບັນລະຍາຍພາບ ທີ່ແຕກຕ່າງໄປ.
ນາງ Tiffany Mitchell ເວົ້າວ່າ: “ເດັກຊາຍຄົນນັ້ນ ພະຍາຍາມຈະເອົາໂຕເອງ
ອອກມາຈາກນາຍຕຳຫລວດ ແຕ່ນາຍຕຳຫລວດພະຍາຍາມຈະດຶງລາວ ເຂົ້າ
ໄປໃນລົດ.”
ບໍ່ເປັນທີ່ແຈ້ງຂາວວ່າ ແມ່ນຫຍັງເກີດຂຶ້ນໃນເວລາຕໍ່ມາ ແຕ່ພິຍານຄົນອື່ນໆເວົ້າວ່າ ທ້າວ
Michael Brown ໄດ້ແລ່ນໜີຈາກນາຍຕຳຫລວດ ຫລັງຈາກຖືກຍິງແລ້ວ.
ນາງ Piaget Crenshaw ເວົ້າວ່າ: “ລາວແລ່ນໜີ ແລ້ວລາວກໍຢຸດ ຫັນໜ້າກັບຄືນມາ
ແລະຍົກແຂນຂຶ້ນ. ລາວມີແຕ່ຢຸດ ແລະຍົກມືຂຶ້ນ ຫລັງຈາກຖືກຍິງຊ້ຳແລ້ວຊ້ຳອີກ.”
ບັນດາທະນາຍຄວາມຂອງຄອບຄົວທ້າວ Michael Brown ໄດ້ເປີດເຜີຍ ຜົນຂອງການ
ສັນນະສູດສົບ ໂດຍພວກສັນນະສູດທີ່ເປັນອິດສະລະ ທີ່ຊີ້ບອກວ່າ ທ້າວ Michael ຊຶ່ງບໍ່
ມີອາວຸດຕິດຕົວນັ້ນ ໄດ້ຖືກຍິງ ຫລາຍໆນັດ ຈາກທາງໜ້າ ຮວມທັງສອງນັດຢູ່ທີ່ຫົວ. ການ
ສັນນະສູດບໍ່ພົບເຫັນຮ່ອງຮອຍຂອງການຕໍ່ສູ້ໃດໆ ລະຫວ່າງທ້າວ Michael ກັບຕຳຫລວດ Wilson. ທະນາຍຄວາມຂອງຄອບຄົວ Brown ທ່ານ Benjamin Crump ກ່າວວ່າ:
“ນີ້ແມ່ນພິສູດໃຫ້ເຫັນວ່າ ຄຳບອກເລົ່າຂອງພວກພິຍານນັ້ນ ເປັນຄວາມຈິງທີ່ວ່າ
ລາວ ກໍຄືທ້າວ Michael Brown ຖືກຍິງຫລາຍໆນັດ.”
ໄດ້ມີການສັນນະສູດສົບຂອງທ້າວ Michael ອີກສອງຄັ້ງຕ່າງກັນ ໂດຍບັນດາເຈົ້າໜ້າ
ທີ່ສືບສວນສອບສວນຂອງອຳນາດປົກຄອງທ້ອງຖິ່ນ ແລະຂອງລັດຖະບານກາງ.
ໃນຂະນະດຽວກັນ ພວກໝູ່ເພື່ອນຂອງນາຍຕຳຫລວດ Darren Wilson ເວົ້າວ່າ ລາວ
ໄດ້ບອກເຂົາເຈົ້າ ຊ້ຳແລ້ວຊ້ຳອີກວ່າ ລາວຍິງພວກກະສູນນັດສຸດທ້າຍນັ້ນອອກໄປ ໃນ
ຂະນະທີ່ທ້າວ Michael ກຳລັງຈະກະໂດດເຂົ້າໃສ່ລາວ. ແຕ່ວ່າພວກເຈົ້າໜ້າທີ່ສອບ
ສວນບໍ່ໄດ້ ຢືນຢັນຂໍ້ນີ້.
ບັນດານັກວິເຄາະດ້ານກົດໝາຍກ່າວວ່າ ຫລັກຖານທີ່ພວກໄອຍະການນຳສະເໜີ ຕໍ່
ຄະນະກຳມະການສອບສວນຂອງລັດະບານກາງນັ້ນ ຈະເປັນປັດໃຈສຳຄັນໃນການລົງ
ຄວາມເຫັນວ່າ ນາຍຕຳຫລວດ Darren Wilson ສົມຄວນຈະຖືກກ່າວຫາ ແລະຟ້ອງ
ຮ້ອງ ໃນຂໍ້ຫາກະທຳຄວາມຜິດອາຍາ ໃນການຍິງທ້າວ Michael Brown ຕາຍຫລືບໍ່.
