ການສະແດງຄວາມເສົ້າສະຫລົດໃຈ ແລະການປະນາມພວກກໍ່ການຮ້າຍ ກຳລັງຫລັ່ງໄຫລມາຈາກທົ່ວໂລກ ຫລັງຈາກການໂຈມຕີທີ່ໄດ້ເຮັດໃຫ້ມີຜູ້ເສຍຊີວິດ 41 ຄົນໃນເທິກີ.
ທຳນຽບຂາວໄດ້ປະນາມໂດຍທັນທີ ໃນອັນທີ່ຮ້ອງວ່າ “ການໂຈມຕີກໍ່ການຮ້າຍທີ່ໂຫດ ຫ້ຽມ” ຢູ່ສະໜາມບິນນາໆຊາດ Ataturk ໃນນະຄອນ Istanbul ໃນວັນອັງຄານວານນີ້ ທີ່ຍັງໄດ້ເຮັດໃຫ້ 200 ກວ່່າຄົນໄດ້ຮັບບາດເຈັບ.
ຜູ້ທີ່ຄາດວ່າຈະຖືກສະເໜີເປັນຜູ້ສະໝັກປະທານາທິບໍດີສະຫະລັດ ຂອງພັກຣີພັບບລິກັນ ທ່ານ Donald Trump ກ່າວວ່າ ການໂຈມຕີໄດ້ເປັນ “ທີ່ໜ້າເສົ້າເສຍ ໃຈຫລາຍ.” ໂດຍໄດ້ກ່າວເນັ້ນໜັກ ຢູ່ໃນຂໍ້ຄວາມທາງ Tweeter ຂອງທ່ານວ່າ “ພວກເຮົາຕ້ອງທຳທຸກວິທີ ທາງທີ່ເປັນໄປໄດ້ ເພື່ອປ້ອງກັນບໍ່ໃຫ້ການກໍ່ການຮ້າຍທີ່ໜ້າຢ້ານກົວນີ້ ເຂົ້າມາໃນສະຫະ ລັດ.” ທ່ານ Trump ໄດ້ຮຽກຮ້ອງໃຫ້ມີການ ຫ້າມ ບໍ່ໃຫ້ຊາວມຸສລິມທັງໝົດ ເຂົ້າມາສະຫະລັດ ແຕ່ຫວ່າງມໍ່ໆມານີ້ທ່ານໄດ້ຫລຸດຜ່ອນຂໍ້ສະເໜີຂອງທ່ານລົງ ຈຳກັດແຕ່ພວກທີ່ີມາຈາກບັນດາປະເທດທີ່ໄດ້ຮັບຜົນກະທົບຈາກການກໍ່ການຮ້າຍ.
ຜູ້ສະໝັກເປັນປະທານາທິບໍດີພັກເດໂມແຄຣັດ ທ່ານນາງ Hillary Clinton ໄດ້ສະແດງຄວາມເສົ້າສະຫລົດໃຈແກ່ປະຊາຊົນເທິກີ ແລະຮຽກຮ້ອງໃຫ້ສະຫະລັດ “ລົງເລິກ” ໃນ “ການຮ່ວມມື” ກັບບັນດາພັນທະມິດຢູ່ໃນພາກຕາເວັນອອກກາງ ແລະຢູໂຣບເພື່ອເອົາ ບົດບາດກັບພວກກໍ່ການຮ້າຍແລະພວກຫົວຮຸນແຮງ Jihad ຢູ່ໃນທົ່ວໂລກ. ແລະຍັງໄດ້ເຕືອນວ່າ ສະຫະລັດບໍ່ສາມາດທີ່ຈະຖອນກັບຄືນໄດ້” ນັ້ນຄືຄຳເວົ້າຂອງທ່ານນາງໄດ້ກ່າວຢູ່ໃນຖະແຫລງການ.
ເລຂາທິການໃຫຍ່ສະຫະປະຊາຊາດ ທ່ານ Ban Ki-moon ຍັງໄດ້ຮ້ອງໃຫ້ເພີ້ມການຮ່ວມ ມືໃນການສູ້ລົບຕ້ານພວກກໍ່ການຮ້າຍ. ຫົວໜ້າອົງການສະຫະປະຊາຊາດ “ໄດ້ຢືນຢູ່ຢ່າງໝັ້ນຄົງກັບເທິກີ ໃນຂະນະທີ່ປະເທດດັ່ງກ່າວປະເຊີນໜ້າກັບການຂົ່ມຂູ່ ແລະພວກຫົວຮຸນແຮງຈັດ.” ນັ້ນຄືຄຳເວົ້າຂອງໂຄສົກທ່ານໄດ້ກ່າວຢູ່ໃນຖະແຫລງການ.
