ຫລັງຈາກໄດ້ປະເຊີນກັບບັນຫາຕ່າງໆໃນການກະກຽມ ມາເປັນເວລາຫລາຍສັບປະດາ ງານມະຫະກໍາແຂ່ງຂັນກີລາຂອງພວກປະເທດເຄືອຈັກກະພົບອັງກິດ ກໍໄດ້ໄຂຂຶ້ນແລ້ວທີ່ກຸງນິວເດລີ ໃນພິທີແລະການສະແດງທີ່ສະງ່າງາມ ກ່ຽວກັບວັດທະນະທໍາຂອງອິນເດຍ.
ເຈົ້າຊາຍ Charles ແຫ່ງອັງກິດ ຊ້ອງໜ້າກັນປະທານາ ທິບໍດີອິນເດຍ ທ່ານນາງ Pratibha Patil ໄດ້ປະກາດ ໄຂການແຂ່ງຂັນກີລາດັ່ງ ກ່າວຢ່າງເປັນທາງການ ໃນວັນອາທິດວານນີ້ ທີ່ສະໜາມກີລາ Jawaharlal Nehru ທີ່ ມີຜູ້ຄົນໄປຮ່ວມຢ່າງໜາແໜ້ນນັ້ນ.
ພວກຈັດການແຂ່ງຂັນກີລາດັ່ງກ່າວໄດ້ປະສົບກັບບັນຫາຕ່າງໆນາໆກ່ອນເປີດການແຂ່ງຂັນກີລາ ຮວມທັງສະພາບ ການທີ່ເປິເປື້ອນໃນຄຸ້ມບ້ານພັກຂອງພວກນັກກີລາ ການກ່າວຫາເລື່ອງສໍ້ລາດບັງຫລວງ ຄວາມເປັນຫ່ວງດ້ານຄວາມປອດໄພໄພແລະດ້ານສຸຂະພາບ ການຊັກຊ້າໃນການກໍ່ສ້າງສະຖານທີ່ແຂ່ງຂັນ ແລະການພັງທະລາຍລົງຂອງຂົວ ທີ່ສ້າງຂຶ້ນສໍາລັບໃຫ້ຄົນຍ່າງ ທີ່ສະໜາມກີລາໃຫຍ່ນັ້ນ.
ການແຂ່ງຂັນກີລາດັ່ງກ່າວເປັນເວລາ 11 ມື້ ກໍານົດຈະເລີ້ມຂຶ້ນໃນວັນຈັນມື້ນີ້ ໂດຍຈະມີການມອບຫລຽນຄໍາໃຫ້ແກ່ພວກຊະນະການແຂ່ງຂັນໃນກີລາ 8 ປະເພດ. ການແຂ່ງຂັນຄັ້ງນີ້ໄດ້ນໍານັກກີລາແລະພວກເຈົ້າ ໜ້າທີ່ມາຮ່ວມ ເກືອບ 7 ພັນຄົນ ຈາກ 71 ປະເທດ ແລະດິນແດນໃນເຄືອຈັກກະພົບອັງກິດ.
