ຜູ້ອຳນວຍການອົງການສັນຕິບານກາງ ຫຼື FBI ທ່ານ Jim Comey ທີ່ຖືກປົດອອກ
ຈາກໜ້າທີ່ນັ້ນ ຈະໃຫ້ການຕໍ່ຄະນະກຳມະການສືບລັບຂອງສະພາສູງ ໃນວັນພະຫັດມື້ນີ້
ກ່ຽວກັບ ການທີ່ວ່າ ປະທານາທິບໍດີ ສະຫະລັດ ທ່ານດໍໂນລ ທຣຳ ໄດ້ຮ້ອງຂໍ ໃຫ້ຈົງຮັກ
ພັກດີໃນລະຫວ່າງການສົນທະນາຢູ່ໃນທຳນຽບຂາວ ກ່ຽວກັບການຮັບມືຂອງອົງການ
ດັ່ງກ່າວໃນການສືບສວນສອນສວນ ເຈົ້າໜ້າທີ່ຂອງລັດຖະບານຊຸດປະຈຸບັນ ແລະລັດ
ຖະບານໃນອະດີດ.
ຄະນະກຳມະການສືບລັບຂອງສະພາສູງ ໄດ້ເປີດເຜີຍຖະແຫຼງການຂັ້ນເຣີ່ມຕົ້ນ 7 ໜ້າ
ຂອງທ່ານ Comey ທາງອິນເຕີແນັຕ ນຶ່ງມື້ ກ່ອນການປະກົດຕົວຂອງທ່ານ ຊຶ່ງການ
ເປີດເຜີຍທີ່ວ່ານີ້ ມີຂຶ້ນ ບໍ່ດົນ ຫຼັງຈາກ ຜູ້ອຳນວຍການຮັກສາຄວາມປອດໄພແຫ່ງຊາດ
ແລະເຈົ້າໜ້າທີ່ຂັ້ນອະວຸໂສ ປະຕິເສດທີ່ຈະຕອບຄຳຖາມຂອງຄະນະກຳມະການ
ກ່ຽວກັບທ່ານ Comey ແລະການສືບສວນເລື່ອງຣັດເຊຍ.
ເຊີນຊົມ: ລາຍງານຂອງທ່ານ Mike Bowman
ໃນຖະແຫຼງການຂອງທ່ານນັ້ນ ທ່ານ Comey ໄດ້ສະເໜີລາຍະອຽດແບບເປີດແປນ
ແລະ 5 ເຫດການຂອງການສົນທະນາ ທີ່ແຕກຕ່າງກັນ ລະຫວ່າງທ່ານ Comey
ກັບທ່ານ ທຣຳ ທີ່ຮວມທັງ ການທີ່ມີການສະເໜີແນະຂອງປະທານາທິບໍດີວ່າ ໃຫ້
ທ່ານດັດແປງວິທີຂອງການສືບສວນຂອງອົງການ FBI ນຳ.
“ປະທານາທິບໍດີທຣຳກ່າວວ່າ ‘ຂ້າພະເຈົ້າຕ້ອງການຄວາມຈົງຮັກພັກດີ, ຂ້າພະເຈົ້າ
ຄາດຫວັງວ່າຈະໄດ້ຮັບຄວາມຈົງຮັກພັກດີ,’ ຊຶ່ງທ່ານ Comey ຈົດຈຳໄດ້ ກ່ຽວກັບການ
ປະຊຸມໃນທຳນຽບຂາວ. “ຂ້າພະເຈົ້າບໍ່ໄດ້ເໜັງຕີງ ບໍ່ປາກ ຫຼືບໍ່ປ່ຽນແປງສີໜ້າແບບໃດ
ໃນຂະນະທີ່ມີຄວາມງຽບຂຶມຜິດປົກກະຕິຕິດຕາມມາ ຄືພວກເຮົາມີແຕ່ເບິ່ງໜ້າກັນ
ໃນຄວາມງຽບນີ້.”
ໃນການຕຽມພ້ອມບົດຄວາມເຫັນຂອງທ່ານນັ້ນ ທ່ານ Comey ເວົ້າວ່າ ທ່ານໄດ້ບອກ
ທ່ານທຣຳ 3 ຄັ້ງ ວ່າ ທ່ານບໍ່ໄດ້ແມ່ນຕົວການຂອງການສືບສວນຂອງອົງການ FBI ທີ່ວ່າ
ພັກພວກຂອງທ່ານ ໄດ້ຕິດຕໍ່ກັບເຈົ້າໜ້າທີ່ລັດຖະບານຣັດເຊຍ ແບບບໍ່ຖືກຕ້ອງນັ້ນ.
ໃນການສື່ສານອີກອັນນຶ່ງ ທ່ານ Comey ຈະໃຫ້ການວ່າ ທ່ານທຣຳ ໄດ້ຂໍຮ້ອງໃນວັນທີ
14 ກຸມພາ ໃຫ້ທ່ານ “ປະປ່ອຍ” ການສືບສວນສອບສວນ ກ່ຽວກັບທ່ານ Michael
Flynn ຜູ້ຊຶ່ງ ໄດ້ຖືກປົດອອກຈາກຕຳແໜ່ງ ທີ່ປຶກສາດ້ານຄວາມປອດໄພແຫ່ງຊາດ
ໃນອະດີດ. “ຂ້າພະເຈົ້າຫວັງວ່າ ທ່ານຄົງຈະເຫັນເສັ້ນທາງຢ່າງຈະແຈ້ງດີ ໃນການ
ປະປ່ອຍເລື່ອງຂອງ ທ່ານ Flynn ໄປ,” ຊຶ່ງທ່ານ Comey ໄດ້ອ້າງຕາມຄຳເວົ້າຂອງ
ທ່ານທຣຳ ທີ່ວ່າ “ເພິ່ນເປັນຄົນດີ. ຂ້າພະເຈົ້າຫວັງວ່າ ທ່ານຈະປະປ່ອຍເລື່ອງນີ້ໄປ.”
ອ່ານຂ່າວນີ້ເພີ້ມຕື່ມເປັນພາສາອັງກິດ
ເຊີນຊົມ: ການລົບກວນລະບົບຍຸຕິທຳ ໝາຍຄວາມວ່າຢ່າງໃດ?