ບັນດາເຈົ້າໜ້າທີ່ຂອງໂຄລອມເບຍ ໄດ້ພົບປະກັບ ຄະນະຜູ້ຕາງໜ້າ ຈາກກອງກຳລັງ ປະຕິວັດປະກອບອາວຸດແຫ່ງໂຄລອມເບຍ ຫຼື FARC ທີ່ປະເທດຄິວບາໃນວັນອັງຄານ ວານນີ້ ເພື່ອເຈລະຈາຫາທາງກອບກູ້ ຂໍ້ຕົກລົງສັນຕິພາບ ແຕ່ຍັງບໍ່ທັນຈະແຈ້ງເທື່ອວ່າ ພວກກະບົດມີຄວາມ ເຕັມໃຈຊ່ຳໃດ ທີ່ຈະກັບຄືນໄປສູ່ໂຕະເຈລະຈາອີກ.
ນອກເໜືອໄປຈາກ ການເຈລະຈາຄືນໃໝ່ກັບພວກກະບົດແລ້ວປະທາ ນາທິບໍດີ ໂຄລອມເບຍ ທ່ານ Juan Manuel Santos ຈະພົບປະກັບ ອະດີດປະທານາທິບໍດີ ທ່ານ Alvaro Uribe ຜູ້ນຳພາການຄັດ ຄ້ານຕໍ່ຂໍ້ຕົກລົງສັນຕິພາບ ກັບ ກຸ່ມ FARC. ທ່ານ Uribe ໄດ້ບອກ ຕໍ່ສະຖານີວິທະຍຸຂອງໂຄລອມເບຍ ວ່າ ທ່ານຍິນດີທີ່ຈະສະໜອງຂໍ້ຄິດ ເຫັນຕໍ່ແນວທາງໄປສູ່ສັນຕິພາບກັບກຸ່ມກະບົດ FARC ແລະ ການສິ້ນສຸດລົງຂອງສົງຄາມ ທີ່ຍາວນານເຖິງ 52 ປີ ໃນປະເທດດັ່ງກ່າວ.
ບັນດາຜູ້ລົງຄະແນນສຽງ ໄດ້ປະຕິເສດຕໍ່ຂໍ້ຕົກລົງດັ່ງກ່າວດ້ວຍຄະແນນ ສຽງຢ່າງຫວຸດ ຫວິດ 50.2 ຕໍ່ 49.7 ເປີເຊັນ ຫຼືພຽງແຕ່ 54,000 ສຽງເທົ່ານັ້ນ.
ການຢັ່ງຫາງສຽງ ກ່ອນໜ້າການລົງຄະແນນສຽງໃນວັນອາທິດ ຜ່ານມາ ໄດ້ທຳນາຍວ່າ ການລົງປະຊາມະຕິ ຈະມີການຮັບຮອງເອົາດ້ວຍຄະແນນສຽງ 2 ຕໍ່ 1.
ປະທານາທິບໍດີ Santos ໄດ້ກ່າວວ່າ ທ່ານຈະຕໍ່ອາຍຸຂໍ້ຕົກລົງຢຸດຍິງ ທີ່ໄດ້ບັນລຸກັບ ພວກກະບົດ ອອກໄປຮອດ ວັນທີ 31 ເດືອນຕຸລາ ໃນຄວາມພະຍາຍາມ ທີ່ຈະອຳນວນ ຄວາມສະດວກໃຫ້ແກ່ການເຈລະຈາ.
