ໃນທ້າຍເດືອນແລ້ວ ກົມສໍາຫລວດປະຊາກອນສະຫະລັດໄດ້ເປີດເຜີຍການ ນັບຈໍານວນປະຊາກອນຂອງປະເທດຢ່າງເປັນທາງການໃຫ້ຮູ້ ແລະກ່າວວ່າ ມາຮອດວັນທີ 1 ເດືອນເມສາແລ້ວນີ້ ຈໍານວນປະຊາກອນຂອງສະຫະລັດແມ່ນ 308 ລ້ານ 745 ພັນກັບ 538 ຄົນ.
ຈໍານວນປະຊາກອນໄດ້ເພີ່ມຂຶ້ນ 9.7 ສ່ວນຮ້ອຍໃນຮອບ 10 ປີຜ່ານມາ ຊຶ່ງນັບວ່າເປັນການເຕີບໂຕໃນອັດຕາຕໍ່າທີ່ສຸດຂອງປະເທດນັບແຕ່ຊຸມປີ 1930 ເປນຕົ້ນມາ.
ບັນດານັກຊ່ຽວຊານກ່າວວ່າ ອັນນີ້ແມ່ນເຫດຜົນມາຈາກອັດຕາການເກີດຂອງເດັກນ້ອຍເກີດໃໝ່ລົດລົງໃນໝູ່ປະຊາກອນບາງກຸ່ມ ແລະຈໍານວນພວກອົບພະຍົບເຂົ້າເມືອງລົດນ້ອຍລົງຍ້ອນພາວະເສດຖະກິດຕົກຕໍ່າ.
ມີ 2 ລັດທີ່ມີຈໍານວນປະຊາກອນເພີ່ມຂຶ້ນຫລາຍທີ່ສຸດ ກໍຄື ລັດ Texas ຊຶ່ງຈໍານວນປະຊາ
ກອນເພີ່ມຂຶ້ນຫລາຍກວ່າ 4 ລ້ານຄົນ ຊຶ່ງເປັນຈໍານວນຫລາຍກວ່າລັດອື່ນໆ ສອງມາແມ່ນ
ລັດ Nevada ຊຶ່ງມີອັດຕາການເຕີບໂຕຂຶ້ນໄວກວ່າໝູ່ຊຶ່ງຈໍານວນປະຊາກອນເພີ່ມຂຶ້ນ 35 ສ່ວນຮ້ອຍ ຈາກການສໍາຫລວດຄັ້ງຫລ້າສຸດໃນປີ 2000 ນັ້ນ.
ໃນທົ່ວປະເທດນັ້ນ ຈໍານວນປະຊາກອນທີ່ເພີ່ມຂຶ້ນຫລາຍທີ່ສຸດ ແມ່ນພວກລັດຕ່າງໆໃນພາກໃຕ້ແລະພາກຕາເວັນຕົກ. ປະຊາກອນຍັງສືບຕໍ່ຍົກຍ້າຍຈາກພາກຕາເວັນອອກສຽງເໜືອແລະພາກຕາເວັນຕົກກາງໄປຢູ່ໃນພາກໃຕ້ແລະພາກຕາເວັນຕົກ ຊຶ່ງການຍົກຍ້າຍຂອງປະຊາກອນດັ່ງນີ້ ໄດ້ເລີ້ມຂຶ້ນໃນຮອບ 40 ປີຜ່ານມາ.
ລັດຖະທໍາມະນູນຂອງສະຫະລັດບົ່ງໄວ້ວ່າ ໃຫ້ມີການສໍາຫລວດຈໍານວນປະຊາກອນໃນທຸກໆ 10 ປີ. ເລື້ອງນີ້ຈະຕ້ອງໄດ້ເຮັດເພື່ອແບ່ງປັນໃຫ້ມັນສະເໝີກັນ ເຂດປ່ອນບັດເລືອກຕັ້ງຈໍານວນ 435 ເຂດໃນສະພາຕໍ່າສະຫະລັດໃນບັນດາລັດຕ່າງໆໃນສະ ຫະລັດ. ສະມາຊິກສະພາຕໍ່າແຕ່ລະຄົນ ຄິດສະເລ່ຍແລ້ວ ເປັນຜູ້ຕາງໜ້າປະຊາຊົນນຈໍານວນປະມານ 7 ແສນຄົນ. ພວກລັດຕ່າງໆທີ່ມີຈໍານວນປະຊາກອນຫລາຍທີ່ສຸດມີບ່ອນນັ່ງຢູ່ໃນສະພາຕໍ່າຫລາຍກວ່າພວກລັດທີ່ມີຈໍານວນປະຊາກອນນ້ອຍກວ່າ.
ລັດທີ່ມີປະຊາກອນຫລາຍທີ່ສຸດແມ່ນລັດ California ຊຶ່ງມີບ່ອນນັ່ງຢູ່ໃນສະພາຕໍ່າ 53 ບ່ອນນັ່ງ ແລະລັດ Wyoming ຊຶ່ງມີປະຊາກອນໜ້ອຍທີ່ສຸດ ມີແຕ່ບ່ອນນັ່ງດຽວຢູ່ໃນສະພາ ຕໍ່ານັ້ນ.
18 ລັດຈະໄດ້ຮັບບ່ອນນັ່ງຫລາຍຂຶ້ນ ຫລືຫລຸດລົງຢູ່ໃນສະພາຕໍ່າສະຫະລັດນັ້ນຍ້ອນຜົນ
ຂອງການສໍາຫລວດຈໍານວນປະຊາກອນຄັ້ງນີ້. ລັດ Texas ຈະໄດ້ບ່ອນນັ່ງເພີ່ມຂຶ້ນ ຫຼາຍ
ກວ່າລັດອື່ນ ຄືເພີ່ມຂຶ້ນ4ບ່ອນ.
ລັດ Florida ຈະໄດ້ຮັບບ່ອນນັ່ງຕື່ມອີກ 2 ບ່ອນ. 6 ລັດໃນພາກໃຕ້ແລະພາກຕາເວັນ
ຕົກ ແຕ່ລະລັດຈະໄດ້ຮັບບ່ອນນັ່ງຕື່ມອີກ 1ບ່ອນ. ລັດ Ohio ແລະລັດ New York
ແຕ່ລະລັດຈະເສຍບ່ອນນັ່ງ 2ບ່ອນໃນສະພາຕໍ່ານັ້ນ.
8 ລັດ ຊຶ່ງສ່ວນຫລາຍຢູ່ໃນພາກຕາເວັອອກສຽງເໜືອແລະໃນພາກຕາເວັນຕົກຕອນ
ກາງ ແຕ່ລະລັດຈະເສຍບ່ອນນັ່ງ 1 ບ່ອນ.
ພວກນັກຊ່ຽວຊານບາງທ່ານກ່າວວ່າ ລາຍງານການສໍາຫລວດຈໍານວນປະຊາກອນຄັ້ງນີ້
ອາດຈະເປັນຂ່າວດີສໍາລັບພັກ Republican ກໍເປັນໄດ້. ພວກລັດທີ່ຈະໄດ້ຮັບບ່ອນນັ່ງ
ຫລາຍຂຶ້ນນີ້ສ່ວນຫລາຍຕາມທໍາມະດານັ້ນແມ່ນສະໜັບສະໜຸນພວກສະມາຊິກພັກ
Republican. ຫລາຍລັດທີ່ເສຍບ່ອນນັ່ງນີ້ ຕາມທໍາມະດາແມ່ນລົງຄະແນນສຽງສະ
ໜັບສະໜຸນພັກ ເດໂມກຣັດ. ນາງ Amy Walter ຊຶ່ງເປັນຜູ້ອໍານວຍການດ້ານການ
ເມືອງຂອງຕາໜ່າງໂທລະພາບ ABC News ກ່າວວ່າ :
"ມີພວກນັກຊ່ຽວຊານບາງຄົນທີ່ເບິ່ງຂໍ້ມູນນີ້ແລະກ່າວວ່າອີງຕາມສິ່ງທີ່ພວກເຂົາ
ເຈົ້າເຫັນໃນເວລານີ້ ພັກລີພັບບລີກັນອາດໄດ້ຮັບບ່ອນນັ່ງເພີ່ມຕື່ມ 10 ບ່ອນ."
ພວກສະມາຊິກສະພານິຕິບັນຍັດແລະຜູ້ວ່າການລັດຕ່າງໆ ເປັນຜູ້ຮັບຜິດຊອບໃນການ
ຈັດຕັ້ງເຂດແດນຂອງເຂດເລືອກຕັ້ງຂອງພວກສະມາຊິກສະພາຕໍ່າສະຫະລັດນັ້ນ. ພັກ
Republican ທີ່ໄດ້ຮັບບ່ອນນັ່ງຫລາຍຂຶ້ນໃນການເລືອກຕັ້ງໃນເດືອນພະຈິກຜ່ານມາ
ຈະເສິມສ້າງອໍານາດຂອງເຂົາເຈົ້າແຂງແຮງຂຶ້ນໃນການດໍາເນີນການແບ່ງປັນເຂດເລືອກ
ຕັ້ງ ຊຶ່ງກໍານົດຈະເລີ້ມຂຶ້ນໃນປີໜ້ານີ້.
ການປ່ຽນແປງບ່ອນນັ່ງໃນສະພາຕໍ່ານີ້ ອາດຈະສົ່ງຜົນກະທົບຕໍ່ການປ່ອນບັດເລືອກ
ຕັ້ງປະທານາທິບໍດີເຊ່ນກັນ. ພາຍໃຕ້ກົດໝາຍລັດຖະທໍາມະນູນ ຈໍານວນຜູ້ຕາງໜ້າທີ່
ຈະໄປລົງຄະແນນສຽງເລືອກເອົາປະທານາທິບໍດີແລະຮອງປະທານາທິບໍດີນັ້ນ ແຕ່ລະ
ລັດຈະຕ້ອງອິງຕາມຈໍານວນບ່ອນນັ່ງໃນສະພາຕໍ່າແລະສະພາສູງທັງໝົດຂອງສະຫະ
ລັດນັ້ນ. ໃນການເພີ່ມບ່ອນນັ່ງຕື່ມອີກຈຳນວນນຶ່ງໃນພາກໃຕ້ແລະໃນພາກຕາເວັນ
ຕົກອາດຈະຊ່ອຍຜູ້ສະໝັກເຂົ້າແຂ່ງຂັນາຂອງພັກ Republican ໃນການເລືອກຕັ້ງ
ປະທານາທິບໍດີເທື່ອໜ້າໃນປີ 2012 ນັ້ນ.
ລາຍງານການສໍາຫລວດປະຊາກອນສະບັບນີ້ ສະແດງໃຫ້ເຫັນວ່າ ພວກປະຊາກອນ
ອະເມລິກາລາຕິນ ເປັນເຫດຜົນສໍາຄັນສໍາລັບການເຕີບໂຕຂອງຈໍານວນປະຊາກອນ
ໃນລັດຕ່າງໆເຊ່ນລັດ Texas ,ລັດ Arizona,ແລະລັດ Florida ນັ້ນ. ໃນເມື່ອວ່າ
ພວກອະເມລິກັນເຊື້ອສາຍມາຈາກອະເມລິກາລາຕິນ ຕາມທໍາມະດານັ້ນ ປ່ອນບັດ
ເອົາເອົາສະມາຊິກພັກເດໂມກຣັດ ພວກນັກຊ່ຽວຊານກ່າວວ່າ ອັນນີ້ອາດຈະຊ່ອຍ
ພວກສະມາຊິກພັກເດໂມກຣັດໃນໄລຍະຍາວ.
