ລິ້ງ ສຳຫລັບເຂົ້າຫາ


ສົນທິສັນຍາ​ສະບັບ​ໃໝ່​ວ່າ​ດ້ວຍ​ການ​ຫ້າມໃຊ້ແລະ​ຜະລິດ​ລະ​ເບີດ​ທີ່ເອີ້ນວ່າ cluster bombs ຊຶ່ງ​ເປັນ​ລະ​ເບີດ​ທີ່ຖິ້ມລົງ​
ຈາກ​ເຮືອບິນ​ແລ້ວແຕກ​ອອກ​ເປັນ​ລະ​ເບີດ​ລູກນ້ອຍໆ ກໍານົດ​ມີ​ຜົນ​ບັບຄັບ​ໃຊ້​ນັບ​ແຕ່​ວັນອາທິດ​ ມື້​ນີ້​ເປັນ​ຕົ້ນ​ໄປ.


30 ປະ​ເທດ​ທີ່​ຮວມທັງ​ອັງກິດ ຝລັ່ງ ​ເຢຍລະ​ມັນ​ແລະ​ສປປ ລາວ​ ໄດ້​ໃຫ້​ສັດຕະຍາບັນ​ແກ່​ສົນທິສັນຍາ​ສະບັບ​ນີ້​ແລ້ວ
ແຕ່​ພວກປະ​ເທດ​ທີ່ຜະລິດລະ​ເບີດ​ດັ່ງກ່າວ​ລາຍ​ໃຫຍ່ໆ ຈຳນວນ​ນຶ່ງ ທີ່​ຮວມທັງອີສຣາ​ແອລ ຣັດ​ເຊຍ ແລະ​ສະຫະລັດ​ອະ​ເມ​ຣິ​ກາ ບໍ່​ໄດ້​ຮັບຮອງ​ເອົາ​ສົນທິສັນຍາ​ສະບັບ​ນີ້. ຢ່າງ​ໃດ​ກໍ​ຕາມ ບັນດາ​ກຸ່ມ​ໃຫ້ການ​ຊ່ອຍ​ເຫລືອກໍຍັງ​ກ່າວວ່າ ສົນທິສັນຍາ​ສະບັບນີ້​ເປັນ​ບາດກ້າວ​ທ່ີ​ສຳຄັນ​ອັນ​ນຶ່ງ​ ໃນ​ການ​ຢຸດ​ການ​ຜະລິດ​ອາວຸດ​ຊະນິດ​ນຶ່ງ ທີ່​ເປັນ​ເຂົາເຈົ້າ​ເວົ້າວ່າໄດ້​ສ້າງ​ ຄວາມ​ທຸກທໍລະມານ​ຢ່າງແສນສາຫັດ​ ໃຫ້​ແກ່ພວກ​ພົນລະ​ເຮືອນ. ສົນທິສັນຍາ​ສະບັບ​ໃໝ່​ນີ້ ຫ້າມ​ປະ​ເທດ​ຕ່າງໆນໍາໃຊ້ ຜະລິດ ​ເກັບ​ມ້ຽນ ຫລື​ໂອນ​ ລະ​ເບີດ clusters ໄປໃຫ້​ປະ​ເທດ​ອື່ນ.

ລະ​ເບີດ cluster ​ເປັນ​ລະ​ເບີດ​ບັ້ງ​ໃຫຍ່ ທີ່ບັນຈຸ​ລະ​ເບີດ​ນ້ອຍໆ​ຫລາຍ​ຮ້ອຍ​ໜ່ວຍຢູ່ທາງ​ໃນ​ ​ທີ່​ເອີ້ນ​ວ່າ ‘bomblets” ຫລື bombies ທີ່ກະຈາຍ​ອອກ​ໄປ​ທົ່ວ​ ບໍ​ລິ​ເວນ​ອັນກວ້າງຂວາງ​ ເວລາລະ​ເບີດ cluster ແຕກຂຶ້ນກາງ​ອາກາດ​ ຫລັງ​ຈາກ​ຖິ້ມລົງມາ​ຈາກ​ເຮືອບິນ​ແລ້ວ. ເວລາ​ລະ​ເບີດ bombies ຕົກລົງ​ສູ່​ໜ້າດິນ​ແລະ​ບໍ່​ແຕກ​ນັ້ນ ມັນ​ກໍ​ຈະ​ຕົກ​ຄ້າງຢູ່​ເທິງ​ໜ້າດິນ ​ແລະ​ສາມາດ​ແຕກ​ຂຶ້ນ​ໄດ້​ໃນ​ເວລາ​ດົນ​ຕໍ່​ມາ ແລະ​ເຮັດ​ພວກ​ພົນລະ​ເຮືອນ ​ໄດ້​ຮັບ​ບາດເຈັບ​ແລະ​ເສຍ​ຊີວິດ​ໄປ.


ທ່ານ Lou Maresca ທີ່ປຶກສາ​ດ້ານ​ກົດໝາຍ​ປະຈຳ​ສະພາກາ​ແດງ​ສາກົນ ກ່າວ​ຕໍ່​ວີ​ໂອ​ເອ​ໃນ​ວັນ​ເສົາ​ວານ​ນີ້​ວ່າ ຄວາມ​ເສຍ​ຫາຍ​ແລະ​ເຈັບ​ປວດ​ດັ່ງກ່າວທີ່ໄດ້ມີ​ມາ​ຍາວ​ນານເປັນ​ເວລາ​ຫລາຍ​ທົດ​ສະ​ວັດຫລັງ​ຈາກ​ ສົງຄາມ​ຍຸດຕິ​ລົງ​ແລ້ວ ​ແມ່ນ​ເປັນ​ສິ່ງ​ທີ່ດົນ​ໃຈ​ພາໃຫ້​ປະຊາ​ຄົມ ນາໆ​ຊາດຈັດ​ຕັ້ງ​ຂໍ້​ຫ້າມ​ນີ້​ຂຶ້ນ​ມາ.


ໃນແຕ່ລະ​ປີ ມີ​ປະຊາຊົນ​ປະມານ 300 ຄົນ ​ໄດ້​ຮັບ​ບາດ​ເຈັບ​ຫລື​ບໍ່​ກໍ​ເສຍ​ຊີວິດ ຍ້ອນ​ລະ​ເບີດ​ທີ່​ບໍ່​ທັນ​ແຕກ​ເຫລົ່າ​ນີ້ ທີ່​ປະ​ເທດ​ລາວ.

XS
SM
MD
LG