ນາງ Chelsea ລູກສາວອະດີດປະທານາທິບໍດີຂອງສະຫະລັດ ໄດ້ແຕ່ງງານກັບທ້າວ Marc Mezvinski ນາຍທະນາຄານລົງທຶນ ທີ່ເປັນຄົນຮັກກັນມາເປັນເວລາດົນນານ ໃນພິທີສົມລົດ ທີ່ຈັດຂຶ້ນຢ່າງໃຫຍ່ໂຕຫລູຫລາທີ່ຄະລືຫາດແຫ່ງນຶ່ງ ແຄມແມ່ນ້ຳ Hudson ໃນລັດນີວຢອກ.
ນາງ Chelsia Clinton ວັຍ 30 ປີ ໄດ້ແຕ່ງງານກັບທ້າວ Mezvinsky ວັຍ 32 ປີ ໃນວັນເສົາວານນີ້ ທີ່ ຄະລືຫາດ Astor Court ຫ່າງໄກຈາກສາຍຕາຜູ້ຄົນ ໃນເມືອງ Rhinebeck ຊຶ່ງຕັ້ງຢູ່ຫ່າງຈາກນະຄອນນີວຢອກ ໄປທາງທິດເໜືອ 160 ຫລັກກິໂລແມັດ.
ພໍ່ແມ່ຂອງເຈົ້າສາວ ຄືອະດີດປະທານາທິບໍດີ Bill Clinton ແລະທ່ານນາງ Hillary Clinton ລັດຖະມຸນຕີການຕ່າງ ປະເທດສະຫະລັດໃນປັດຈຸບັນ ໄດ້ອອກຖະແຫລງການ ສະບັບນຶ່ງ ໃນເວລາຕໍ່ມາ ກ່າວວ່າ ພວກທ່ານທັງສອງໄດ້ເປັນສັກຂີພິຍານ ໃນພິທີສົມລົດດ້ວຍຄວາມພາກພູມໃຈແລະຕື້ນຕັນໃຈ ຢ່າງໃຫຍ່ຫລວງ. ນອກນັ້ນ ພວກທ່ານທັງສອງຍັງໄດ້ສະແດງຄວາມຂອບອົກຂອບໃຈ ໄປຍັງປະຊາຊົນ ໃນເມືອງ Rhinebeck ທີ່ໄດ້ອວຍໄຊ ໃຫ້ພອນແກ່ເຂົາເຈົ້ານັ້ນ.
ພວກນັກທ່ອງທ່ຽວແລະນັກຂ່າວມາຈາກທົ່ວໂລກໄດ້ພາກັນລຸຫລັ່ງ ໄປຍັງເມືອງໃນເຂດຮ່ອມພູແຫ່ງນີ້ ໃນຄວາມຫວັງວ່າຈະໄດ້ເຫັນພວກດາລາໜັງ ທີ່ມີຊືສຽງໂດ່ງດັງ ແລະພວກເເຂກຮັບເຊີນທີ່ມີຊື່ສຽງຄົນອື່ນໆ ທີ່ໄປຮ່ວມໃນພິທີດັ່ງກ່າວນີ້.
