ທ່ານນາງຮີນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດກ່າວວ່າ ສະຫະລັດ
ກໍາລັງດໍາເນີນງານໜັກຂຶ້ນໃນຂົງເຂດຕ່າງໆທີ່ໜ້ອຍລົງກວ່າເກົ່າ ໃນຖານະເປັນພາກສ່ວນ
ນຶ່ງຂອງຄວາມພະຍາຍາມທາງການທູດ ແລະການຊ່ອຍເຫລືອເພື່ອແກ້ໄຂບັນຫາຂັດແຍ້ງ
ແລະຊ່ອຍປະເທດຕ່າງໆໃຫ້ກຸ້ມຕົນເອງໄດ້ຫລາຍຂຶ້ນ.
ໃນການກ່າວຖະແຫລງ ໃນວັນພຸດວານນີ້ ຕໍ່ກອງປະຊຸມທີ່ອົງການພັດທະນາລະຫວ່າງ
ຊາດຂອງສະຫະລັດ ຫລື USAID ນັ້ນ ທ່ານນາງຄລິນຕັນ ກ່າວວ່າ ການເນ້ນໜັກນີ້
ແມ່ນແນໃສ່ການພັດທະນາທີ່ມີຜົນກະທົບສູງ ທີ່ນໍາມາແຫ່ງການເຕີບໂຕທາງດ້ານເສດ
ຖະກິດ ແລະໃນຂັ້ນຕໍ່ໄປ ຈະເຮັດໃຫ້ການຊ່ອຍເຫລືອຂອງສະຫະລັດນັ້ນບໍ່ເປັນເລື້ອງຈໍາ
ເປັນ ຊຶ່ງທ່ານນາງຄລິນຕັນ ກ່າວວ່າ ເປົ້າໝາຍຂອງພວກເຮົາ ກໍແມ່ນການກຸ້ມຕົນເອງ
ປະຊາຊົນສາມາດຫາລ້ຽງກຸ້ມຕົນເອງ ແລະມີລັດຖະບານ ທີ່ມີຄວາມເປັນຫ່ວງພຽງພໍຕໍ່
ປະຊາຊົນຂອງຕົນເພື່ອອໍານວຍໃຫ້ການຮັກສາສຸຂະພາບ ແລະດໍາເນີນການທຸກຢ່າງທີ່
ພວກເຮົາຮູ້ຈັກ ເພື່ອໃຫ້ປະຊາຊົນຂອງຕົນມີຊີວິດການເປັນຢູ່ທີ່ດີຂຶ້ນ.
ແຕ່ລັດຖະມົນຕີການຕ່າງປະເທດສະຫະລັດ ກ່າວເຕືອນ ກ່ຽວກັບການທ້າທາຍຕ່າງໆ
ດ້ານງົບປະມານ ໃນກຸງວໍຊິງຕັນ ທີ່ບັງຄັບພວກອົງການຕ່າງໆໃຫ້ດໍາເນີນງານຫລາຍ
ຂຶ້ນດ້ວຍງົບປະມານທີ່ໜ້ອຍລົງ. ທ່ານນາງຄລິນຕັນກ່າວຕື່ມວ່າ ພວກສະມາຊິກລັດຖະ
ສະພາສະຫະລັດບາງທ່ານບໍ່ມອງເຫັນຄຸນຄ່າ ໃນຄວາມພະຍາຍາມຕ່າງໆຂອງກະຊວງ
ການຕ່າງປະເທດແລະອົງການ USAID ແຕ່ວ່າຈຸດເພ່ງເລັງໃສ່ວຽກງານຂອງເຂົາເຈົ້າຈະ
ຊ່ອຍຮັບປະກັນຄວາມພະຍາຍາມເຫລົ່ານີ້ໃຫ້ດໍາເນີນຕໍ່ໄປ.
ທ່ານນາງຄລິນຕັນ ໄດ້ເນ້ນເຖິງການຕັດເງິນຊ່ອຍເຫລືອທາງດ້ານການກະເສດແກ່ປະເທດ
ໂກໂຊໂວ ເຊີເບຍແລະຢູເກຣນໂດຍທີ່ແຫລ່ງຊັບພະຍາກອນຕ່າງໆໄດ້ຫັນໄປໃສ່ການຊ່ອຍ
ເຫລືອໃນຄວາມພະຍາຍາມທາງດ້ານກະເສດໃນທະວີບອາຟຣິກາ. ທ່ານນາງຄລິນຕັນ ຍັງ
ກ່າວເຊ່ນກັນວ່າ ສະຫະລັດກໍາລັງລົງທຶນຫລາຍຂຶ້ນໃນດ້ານວິທະຍາສາດ ແລະການປະດິດ
ຄິດສ້າງໃໝ່ ຂະນະດຽວກັນກໍສົ່ງເສີມບົດບາດຂອງພວກແມ່ຍິງແລະເດັກສາວ ວ່າເປັນແຮງ
ຂັບດັນຂອງການພັດທະນາເສດຖະກິດ.
