ຜູ້ສະໝັກ ເປັນປະທານາທິບໍດີ ສະຫະລັດ ສັງກັດພັກເດໂມແຄລັດ
ທ່ານນາງ Hillary Clinton ມີກຳນົດຈະເປີດໂຕ ຂໍ້ສະເໜີໃໝ່ໆ
ໃນວັນຈັນມື້ນີ້ ເພື່ອເຮັດໃຫ້ການຄວບຄຸມປືນ ໃນສະຫະລັດ
ແຂງແກ່ນຂຶ້ນ.
ບັນຫາອັນນຶ່ງນີ້ ເປັນບ່ອນທີ່ມີຄວາມເຫັນທີ່ແຕກຕ່າງກັນ ໃນ
ລະຫວ່າງ ທ່ານນາງ Clinton ແລະ ບັນດາຄູ່ແຂ່ງຂອງນາງ
ຜູ້ທີ່ພະຍາຍາມຈະເປັນຜູ້ຖືກສະເໜີຊື່ ເຂົ້າແຂ່ງຂັນໃນການ
ເລືອກຕັ້ງປີ 2016 ຂອງພັກ ແຕ່ຍັງມີອຸດົມການຂັ້ນພື້ນຖານ
ທີ່ແຕກແຍກກັນ ລະຫວ່າງພວກເຂົາເຈົ້າ ແລະຄູ່ຕຳແໜ່ງ
ຂອງພວກເຂົາເຈົ້າ ຈາກພັກຣີພັບບລີກັນອີກດ້ວຍ.
ທີ່ປຶກສາຂອງທ່ານນາງ ຄລິນຕັນ ກ່າວວ່າ ທ່ານນາງ ຈະໃຊ້ກອງປະຊຸມໂຮງການເມືອງຕ່າງໆ
ຢູ່ໃນລັດ New Hampshire ທາງພາກຕາເວັນອອກສຽງເໜືອຂອງປະເທດ ເພື່ອປຶກສາ
ຫາລື ແຜນການ ເພື່ອນຳໃຊ້ປະຕິບັດການດ້ານບໍລິຫານ ຖ້າລັດຖະສະພາ ລົ້ມແຫລວ ທີ່
ຈະແກ້ໄຂບັນຫາດັ່ງກ່າວ.
ອະດີດສະມາຊິກສະພາສູງ ແລະ ລັດຖະມົນຕີຕ່າງປະເທດທ່ານນີ້ ຢາກຮັດກຸມກົດໝາຍ
ເຂົ້າຕື່ມ ທີ່ຕ້ອງໃຫ້ ພວກມີສິດຊື້ປືນ ຜ່ານການກວດສອບຊີວະປະຫວັດເບື້ອງຫຼັງ ເສຍກ່ອນ
ກ່ອນທີ່ຈະເຮັດໃຫ້ການຊື້ປືນຂອງພວກເຂົານັ້ນ ສົມບູນ ລວມທັງ ການໃຫ້ພວກທີ່ຢູ່ໃນ ງານ
ວາງສະແດງປືນ ຕ້ອງຜ່ານການກວດສອບ ແລະໃນກໍລະນີ ທີ່ການກວດສອບບໍ່ແລ້ວສົບບູນ ເທື່ອນັ້ນ ຕ້ອງຫ້າມບໍ່ໃຫ້ພວກເຂົາຊື້ປືນໄດ້.
ທ່ານນາງຄລິນຕັນ ຍັງຄາດວ່າ ຈະນຳສະເໜີ ການຍົກເລີກ ກົດໝາຍ 2005 ທີ່ຄຸ້ມຄອງ
ບັນດາ
ຜູ້ຜະລິດປືນ ທີ່ມີໃບອະນຸຍາດ ແລະ ບັນດາຜູ້ຄ້າຂາຍ ຈາກການຟ້ອງຮ້ອງ ໃນ
ຄະດີແພ່ງ ທີ່ “ເປັນຜົນມາຈາກ ອາຊະຍາກຳ ແລະ ການນຳໃຊ້ ໃນທາງທີ່ຜິດກົດໝາຍ” ຂອງປືນ ຫຼື ລູກປືນນັ້ນ.
ທ່ານນາງຄລິນຕັນ ໄດ້ຂຽນຂໍ້ຄວາມລົງໃນ Twitter ວ່າ “ພວກເຮົາ ບໍ່ສາມາດລໍຖ້າໄດ້
ອີກຕໍ່ໄປ ທີ່ຈະທຳການປ້ອງກັນ ຄວາມຮຸນແຮງຈາກປືນ.”
ການປະກາດຂອງທ່ານນາງຄລິນຕັນ ຈະມີຂຶ້ນ ພາຍໃນອາທິດນີ້ ຫຼັງຈາກ ມືປືນ ໄວ 26 ປີ
ໄດ້ສັງຫານ 9 ຄົນ ແລະ ເຮັດໃຫ້ອີກຄົນບາດເຈັບ ໃນການຍິງໝູ່ຄັ້ງຫຼ້າສຸດ ຢູ່ໃນໂຮງຮຽນ
ຂອງສະຫະລັດ. ການໂຈມຕີນີ້ ໄດ້ດຶງດູດການຕອບໂຕ້ທີ່ໜັກແໜ້ນ ຈາກປະທານາທິບໍດີ
ບາຣັກ ໂອບາມາ ຜູ້ທີ່ກ່າວຕໍ່ພົນລະເມືອງອາເມຣິກັນ ໃຫ້ກົດດັນບັນດາສະມາຊິກສະພາ
ໃຫ້ອອກກົດໝາຍຄວບຄຸມປືນທີ່ເຂັ້ມງວດຂຶ້ນ.
ທ່ານ ໂອບາມາ ເວົ້າວ່າ “ພວກເຮົາ ບໍ່ມີຄວາມຮູ້ສຶກຫຍັງເລີຍ ກັບເລື້ອງນີ້.”
ສະມາຊິກສະພາສູງ ທ່ານ Bernie Sanders ຜູູ້ລົງສະໝັກເຂົ້າແຂ່ງຂັນ ເພື່ອປ່ຽນທ່ານ
ໂອບາມາ ຫຼັງຈາກສະໄໝທີສອງ ຂອງທ່ານສິ້ນສຸດລົງ ອີກຜູ້ນຶ່ງ ກ່າວ ຫຼັງຈາກເກີດການ
ຍິງໝູ່ ວ່າ ປະເທດຕ້ອງມີ “ກົດໝາຍການຄວບຄຸມປືນທີ່ສອດຄ້ອງ” ພ້ອມກັນກັບ
ການຊ່ວຍເຫຼືອທາງດ້ານຈິດຕະແພດທີ່ດີຂຶ້ນກວ່ານີ້. ທ່ານຍັງສະໜັບສະໜູນ ໃຫ້ຍຸດຕິ
ອັນທີ່ເອີ້ນວ່າ ຊ່ອງຫວ່າງຂອງກົດໝາຍ ໃນງານວາງສະແດງປືນ ພ້ອມດ້ວຍການຫ້າມ
ຂາຍອາວຸດທີ່ມີລະບົບອັດຕະໂນມັດ.
