ທ່ານນາງຮີນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດໄດ້ພົບປະກັບກັບຊາວ
ໄທທີ່ປະສົບໄພນໍ້າຖ້ວມ ຈໍານວນນຶ່ງໃນວັນພະຫັດມື້ນີ້ ນຶ່ງມື້ຫລັງຈາກໃຫ້ຄໍາໝັ້ນສັນຍາວ່າ
ຈະໃຫ້ການຊ່ອຍເຫລືອເປັນມູນຄ່າ 10 ລ້ານໂດລາ.
ທ່ານນາງຄລິນຕັນໄດ້ຍົກມື້ໄຫວ້ຖາມສະບາຍດີ ຕາມປະເພນີໄທໃນວັນພະຫັດມື້ນີ້ ກັບພວກອົບພະຍົບຈາກອຸທົກກະໄພຈຸນຶ່ງ ຈາກຈໍານວນຫລາຍກວ່າ 1400 ຄົນ ທີ່ກໍາລັງພັກພາອາໄສຢູ່ຊົ່ວຄາວໃນຫ້ອງຫັດ ກາຍຍະບໍລິຫານ ທີ່ອາຄານຫລິ້ນກີລາໄທແຫ່ງນຶ່ງ ແລະທ່ານນາງໄດ້ໃຫ້ຄໍາໝັ້ນສັນຍາຕໍ່ພວກອົບພະຍົບເຫລົ່ານັ້ນວ່າ ການຊ່ອຍເຫລືອຂອງສະຫະລັດກໍາລັງຈະມາຮອດ.
ນັກການທູດຂັ້ນສູງສຸດຂອງສະຫະລັດ ໄດ້ປະກາດໃຫ້ການຊ່ອຍເຫລືອຫລັງຈາກທໍາການປຶກສາຫາລືໃນວັນພຸດວານນີ້ ກັບທ່ານນາງຍິ່ງລັກ ຊິນນະວັດ ນາຍົກລັດຖະມົນຕີໄທທີ່ບາງກອກ. ທ່ານນາງຄລິນຕັນໄດ້ເດີນທາງອອກຈາກໄທແລ້ວ ໃນຕອນແລງມື້ນີ້ເພື່ອຈະໄປຮ່ວມກອງປະຊຸມສຸດຍອດເອເຊຍຕາເວັນອອກທີ່ເກາະບາຫລີ ອິນໂດເນເຊຍ.
ການຢ້ຽມຢາມຂອງທ່ານນາງຄລິນຕັນມີຂຶ້ນ ພ້ອມກັນກັບການຢ້ຽມຢາມໄທຂອງທ່ານ ພັນ ກິມູນ ເລຂາທິການໃຫຍ່ສະຫະປະຊາຊາດ ທີ່ໄດ້ກ່າວ ໃນວັນພຸດວານນີ້ວ່າ ທ່ານໄດ້ມີຄວາມໂສກເສົ້າເສຍໃຈຢ່າງເລິກເຊິ່ງ ຫລັງຈາກໄດ້ໄປເບິ່ງຂົງເຂດຕ່າງໆທີ່ໄດ້ຮັບຜົນກະທົບຈາກອຸທົກກະໄພແລ້ວ ແລະກ່າວຕື່ມວ່າ ປະຊາຄົມໂລກຕຽມພ້ອມທີ່ຈະໃຫ້ການຊ່ອຍເຫລືອຕໍ່ຄວາມພະຍາຍາມຊ່ອຍບັນເທົາທຸກຂອງລັດຖະບານໄທນັ້ນ.
ປະຊາຊົນຫລາຍລ້ານຄົນໄດ້ຮັບຜົນກະທົບຈາກອຸທົກກະໄພຄັ້ງນີ້ ຊຶ່ງໄດ້ເລີ້ມຕົ້ນມາຕັ້ງແຕ່ເດືອນກໍລະກົດຜ່ານມາ ສ່ວນຫລາຍແມ່ນຢູ່ໃນເຂດພາກເໜືອແລະພາກກາງຂອງໄທນັ້ນ.
