ລັດຖະມົນຕີການຕ່າງປະເທດສະຫະລັດ ທ່ານນາງຮິລລາຣີ ຄລິນຕັນ ກ່າວວ່າ ສໍາລັບພວກປະຊາຊົນທີ່ພະຍາຍາມຈະສົ່ງເສີມສິດທິມະນຸດຢູ່ໃນທົ່ວໂລກນັ້ນ ທຸກໆມື້ແມ່ນວັນສິດທິມະນຸດ
“Every day is Human Rights Day”
62 ປີ ຫລັງຈາກທີ່ມື້ລາງສັດຕີໝາຍເລກນຶ່ງຂອງສະຫະລັດ ທ່ານນາງ Eleanor Roosevelt ໄດ້ສະເໜີຄໍາປະກາດສາກົນວ່າດ້ວຍສິດທິມະນຸດ ຕໍ່ສະມັດຊາໃຫຍ່ສະຫະປະຊາຊາດນັ້ນ ໂລກນີ້ກໍຍັງເປັນບ່ອນທີ່ທ້າທາຍຫລາຍ ສໍາລັບພວກປົກປ້ອງສິດທິມະນຸດ ຊຶ່ງ ທ່ານນາງຄລິນຕັນກ່າວວ່າ:
“ພວກເຮົາໄດ້ເຫັນຄວາມພະຍາຍາມຫລາຍຂຶ້ນໂດຍພວກລັດຖະບານປະເທດຕ່າງໆ ເພື່ອຈໍາກັດຮັດແຄບບ່ອນຂອງພົນລະເມືອງ ບໍ່ວ່າຢູໃນກຸຍບາຫລືຄວາມ ພະຍາຍາມຂອງຈີນ ເພື່ອຫັນເຫຄວາມສົນໃຈຂອງໂລກ ໂດຍວິທີໃດວິທີນຶ່ງໄປ ຈາກພິທີມອບລາງວັນໂນແບລຂະແໜງສັນຕິພາບປະຈໍາປີໃນວັນສຸກມື້ນີ້. ພວກເຮົາຮູ້ຈັກແທ້ໆວ່າ ພວກເຮົາຍັງມີຫລາຍສິ່ງຫລາຍຢ່າງຢູ່ທີ່ຈະຕ້ອງໄດ້ດໍາເນີນການ.”
ທ່ານນາງຄລິນຕັນກ່າວວ່າ ສະຫະລັດວາງແຜນທີ່ຈະເອົາເລື່ອງການພົວພັນກັບສັງຄົມພົນລະ
ເມືອງ ເປັນສ່ວນນຶ່ງທີ່ອະທິບາຍເຖິງຄວາມພະຍາຍາມຕ່າງໆໃນການທູດຂອງຕົນ ແລະທ່ານ
ນາງກ່າວຕໍ່ໄປວ່າ ທາງລັດຖະບານໄດ້ ຮຽກຮ້ອງໃຫ້ພວກສະຖານທູດແຫ່ງຕ່າງໆຂອງສະຫະ
ລັດ ພັດທະນາຍຸດທະສາດ ທີ່ຈະຊ່ອຍສະໜັບສະໜຸນແລະປົກປ້ອງສັງຄົມພົນລະເມືອງນັ້ນ.
ທ່ານນາງຄລິນຕັນໄດ້ເນ້ນເຖິງການພັງທະລາຍລົງຂອງອະດີດສະຫະພາບໂຊວຽດ ຂະບວນ
ການສົ່ງເສີມສິດທິພົນລະເມືອງຂອງສະຫະລັດໃນຊຸມປິ 1960ແລະການສິ້ນສຸດລົງຂອງລັດທິ
ແບ່ງແຍກເຊື້ອຊາດຜີວພັນ Apartheid ໃນປະເທດອາຟຣິກາໃຕ້ ວ່າເປັນຄວາມສໍາເລັດ
ຕ່າງໆທີ່ປະຊາຊົນທໍາມະດາສາມັນໄດ້ພາກັນບຸກບືນຕໍ່ສູ້ ເພື່ອໃຫ້ເປັນຄວາມຈິງຂຶ້ນມາ.
ທ່ານນາງຄລິນຕັນກ່າວວ່າ ປະຊາຊົນຫລາຍຄົນຍັງສືບຕໍ່ເອົາຕົນສ່ຽງໄພໃນຄວາມພະຍາຍາມ
ຂອງເຂົາເຈົ້າເພື່ອນໍາມາຊຶ່ງການປ່ຽນແປງໃນທາງບວກ. ທ່ານນາງຄລິນຕັນກ່າວຕໍ່ໄປວ່າ:
“ໃນກຸຍບາ ພວກແມ່ຍິງທີ່ມີຄວາມມຸ່ງໝັ້ນຈາກກຸ່ມຈັດຕັ້ງ Damas de Blanco ໄດ້ທົນຕໍ່ການຮາວີລົບກວນ ການທຸບຕີແລະການຈັບກຸມ ໃນຂະນະທີ່ພວກເຂົາເຈົ້າເດີນຂະບວນໃນທຸກໆສັບປະດາ ດັ່ງທີ່ເຂົາເຈົ້າໄດ້ພາກັນເຮັດອີກໃນມື້ວານນີ້ ເພື່ອໃຫ້ການສະໜັບສະໜຸນພວກສາມີແລະລູກຊາຍຂອງເຂົາເຈົ້າທີ່ຖືກຂັງຄຸກ ເປັນນັກໂທດການເມືອງມາຕັ້ງແຕ່ດົນນານນັ້ນ. ທີ່ Zimbabwe ພວກນັກເຄື່ອນໄຫວໄດ້ຖືກຈັບກຸມ ຖືກລັກພາໂຕ ຫລືບໍ່ກໍຖືກທຸບຕີ ຫລັງຈາກເຂົາເຈົ້າຮຽກຮ້ອງຄວາມສົນໃຈໄປໃສ່ການລະເມີດສິດທິມະນຸດຕ່າງໆ ແລະສະພາບອັບຈົນຂອງພວກຄົນທຸກຈົນນັ້ນ ແລະເປັນທີ່ໜ້າເສຍໃຈ ຊຶ່ງຂ້າພະເຈົ້າສາມາດເວົ້າເລື່ອງນີ້ ຕໍ່ໄປໄດ້ ໂດຍບໍ່ສິ້ນສຸດຈັກເທື່ອ.”
ພ້ອມດຽວກັນ ທ່ານນາງຄລິນຕັນໄດ້ກ່າວຍ້ອງຍໍຄວາມອົງອາດກ້າຫານຂອງພວກນັກເຄື່ອນໄຫວເຫລົ່ານີ້:
“ພວກເຮົາຈື່ຈໍາເຂົາເຈົ້າໃນແຕ່ລະມື້ແຕ່ລະວັນ ແລະຄົນນຶ່ງໃນນັ້ນກໍແມ່ນ ທ່ານ Liu Xiaobo ຊຶ່ງເປັນນັກຂຽນຊາວຈີນ ທີ່ໄດ້ຮັບລາງວັນໂນແບນຂະແໜງສັນຕິ ພາບປະຈໍາປີນີ້ ແຕ່ທ່ານ Liu ບໍ່ໄດ້ໄປມີໜ້າຢູ່ທີ່ນັ້ນ ເພື່ອຮັບເອົາລາງວັນດັ່ງ ກ່າວ ດັ່ງທີ່ພວກເຮັາຮູ້ຈັກກັນນັ້ນແຫລະ ແລະພັນລະຍາຂອງທ່ານ ຫລືຜູ້ໃດກໍຕາມທີ່ເປັນຍາດພີ່ນ້ອງ ຫລືມີສ່ວນກ່ຽວຂ້ອງກັບທ່ານນັ້ນ ກໍບໍ່ໄດ້ໄປຮ່ວມ ເພາະວ່າ ເວລານີ້ທ່ານ Liu ກໍາລັງຮັບໃຊ້ໂທດຈໍາຄຸກ 11 ປີ ຢູ່ໃນຈີນ ໃນຂໍ້ກ່າວຫາທີ່ພົວພັນກັບການທີ່ທ່ານສະໜັບສະໜຸນ ສົ່ງເສີມສິດທິມະນຸດແລະປະຊາທິປະໄຕຢ່າງສັນຕິນັ້ນ.”
ທ່ານນາງຄລິນຕັນໄດ້ຮຽກຮ້ອງຊໍ້າອີກໃຫ້ຈີນປ່ອຍໂຕທ່ານ Liu Xiaobo. ຫລັງຈາກນັ້ນ ທ່ານນາງຄລິນຕັນກໍໄດ້ຫັນຄວາມສົນໃຈໄປໃສ່ພວກສົ່ງເສີມສິດທິມະນຸດອະເມຣິກັນ ທີ່ໄດ້ໄປຮ່ວມໃນພິທີທີ່ກະຊວງການຕ່າງປະເທດ ເພື່ອຮັບເອົາລາງວັນ Eleanor Roosevelt ສໍາລັບການເຄື່ອນໄຫວຂອງເຂົາເຈົ້າ.
ໃນນັ້ນ ກໍມີໂຮມທັງທ່ານນາງ Sarah Cleto Rial ຫົວໜ້າໂຄງການຂອງອົງການນຶ່ງທີ່ບໍ່ຫາຜົນກໍາໄລແລະບໍ່ມີສ່ວນພົວພັນກັບລັດຖະບານ ທີ່ເອີ້ນວ່າ ອົງການ”My Sister’s Keeper” ທ່ີມີຫ້ອງການຕັ້ງຢູ່ໃນນະຄອນບອສຕັນ ລັດ Massachusetts ໃນພາກຕາເວັນອອກສຽງເໜືອຂອງສະຫະລັດ ທີ່ເຮັດວຽກເພື່ອສົ່ງເສີມຄວາມເປັນທໍາທາງດ້ານການເມືອງ ສັງຄົມແລະເສດຖະກິດ ໃຫ້ຄືບໜ້າຕໍ່ໄປສໍາລັບພວກແມ່ຍິງແລະເດັກສາວໃນປະເທດ Sudan ນັ້ນ.
ທ່ານນາງ Rial ຈາກພາກໃຕ້ຂອງ Sudan ທີ່ໄດ້ເຂົ້າມາຕັ້ງຖິ່ນຖານ ຢູ່ໃນສະຫະລັດເມື່ອ 11 ປີກ່ອນ ໃນຖາະນະເປັນຄົນອົບພະຍົບນັ້ນ ໄດ້ຮັບສຽງຕົບມື ສະໜັບສະໜຸນຢ່າງຟົດຟື້ນ ຈາກຄອບຄົວແລະພວກເພື່ອນຮ່ວມງານ. ທ່ານນາງກ່າວວ່າ ລາງວັນອັນນີ້ ໃຫ້ກຽດແກ່ພວກແມ່ຍິງ Sudan ໃນທຸກຫົນທຸກແຫ່ງ.
ພວກທີ່ໄດ້ຮັບລາງວັນ 3 ຄົນອີກກໍມີ ທ່ານ Louis Henkin ທ່ານນາງ Alice Hartman
Henkin ແລະທ່ານ Wade Henderson ທີ່ໄດ້ຮັບກຽດສໍາລັບວຽກງານຂອງເຂົາເຈົ້າ ໃນການສົ່ງເສີມສິດທິມະນຸດໃນສະຫະລັດແລະໃນຕ່າງປະເທດ ແລະສໍາລັບຄວາມພະຍາຍາມຂອງເຂົາເຈົ້າເພື່ອປະຕິຮູບກົດໝາຍວ່າດ້ວຍສິດທິມະນຸດແລະນະໂຍບາຍນັ້ນ.
