ລິ້ງ ສຳຫລັບເຂົ້າຫາ

ຖະແຫຼງການຮ່ວມ ຂອງລັດຖະມົນຕີຕ່າງປະເທດ ຈາກເຂດລຸ່ມແມ່ນໍ້າຂອງ ກັບສະຫະລັດ

  • ໄພສານ ວໍຣະຈັກ

ບັນດາລັດຖະມົນຕີການຕ່າງປະເທດທີ່ເຂົ້າຮ່ວມກອງປະຊຸມສຸດຍອດ ເຂດເອເຊຍຕາເວັນອອກ ແຖວໜ້າທີ 4 ຈາກຊ້າຍ ແມ່ນທ່ານທອງລຸນ ສີສຸລິດ ລັດຖະມົນຕີການຕ່າງປະເທດ ສປປ ລາວ ແລະແຖວຫຼັງທີ 2 ຈາກ ຂວາ ແມ່ນລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton (22 ກໍລະກົດ 2011)

ເມື່ອວັນທີ 22 ກໍລະກົດຜ່ານມານີ້ ບັນດາລັດຖະມົນຕີການຕ່າງປະເທດແລະຜູ້ຕາງໜ້າລະ ດັບອະວຸໂສ ຈາກບັນດາປະເທດໃນເຂດລຸ່ມແມ່ນໍ້າຂອງ ອັນປະກອບດ້ວຍກຳປູເຈຍ ສປປ ລາວ ໄທ ແລະຫວຽດນາມ ກັບລັດຖະມົນຕີການຕ່າງປະເທດສະຫະລັດ ໄດ້ພົບປະກັນທີ່ ເກາະບາຫຼີປະເທດອິນໂດເນເຊຍໃນກອງປະຊຸມລະດັບລັດຖະມົນຕີຄັ້ງທີ 4 ຂອງໂຄງການ ລິເລີ່ມເຂດລຸ່ມແມ່ນໍ້າຂອງຫລື Lower Mekong Initiative ເອີ້ນຫຍໍ້ວ່າ LMI ນັ້ນ. ປະ ເທດທັງ 5 ທີ່ເຂົ້າຮ່ວມໃນກອງປະຊຸມຕ່າງກໍໄດ້ກ່າວຢໍ້າເຖິງຄຸນຄ່າຂອງໂຄງການ LMI ໃນ ການແກ້ໄຂບັນຫາທ້າທາຍຢູ່ໃນພູມີພາກ ໂດຍສະເພາະແມ່ນໃນຂົງເຂດວຽກງານດ້ານການ ສຶກສາ ສິ່ງແວດລ້ອມ ສຸກຂະພາບອະນາໄມ ແລະໂຄງລ່າງພື້ນຖານ

ບັນດາລັດຖະມົນຕີຂອງທັງຫ້າປະເທດ ໄດ້ກ່າວຢໍ້າເຖິງຄວາມສຳຄັນໃນການຮ່ວມມືກັນຢ່າງ
ໃກ້ຊິດລະຫວ່າງສະຫະລັດ ແລະບັນດາປະເທດໃນເຂດອ່າງລຸ່ມແມ່ນໍ້າຂອງ ເພື່ອສະໜັບສະ ໜຸນການເຕີບໃຫຍ່ຂະຫຍາຍໂຕຂອງ​ຂົງ​ເຂດແບບຍືນຍົງແລະມີຄວາມຮັບຜິດຊອບໃນດ້ານ
ສະພາບແວດລ້ອມ. ນອກນັ້ນແລ້ວພວກທ່ານຍັງມີວິໄສທັດຮ່ວມກັນວ່າປະເທດຕ່າງໆຄວນ
ດໍາເນີນຄວາມພະຍາຍາມຢ່າງ​ໜັກ​ແໜ້ນ​ຂຶ້ນ ເພື່ອຊຸກຍູ້ການພັດທະນາແບບຍືນຍົງແລະຄຸ້ມ
ຄອງແຫຼ່ງນໍ້າໃນເຂດລຸ່ມແມ່ນໍ້າຂອງຕາມເຈດຕະນາລົມຂອງຂໍ້ຕົກລົງຄະນະກຳມາທິການແມ່
ນໍ້າຂອງສາກົນວ່າດ້ວຍການຮ່ວມມືແລະການພັດທະນາແບບຍືນຍົງ ໃນເຂດອ່າງແມ່ນໍ້າຂອງ
ສະບັບວັນທີ 5 ເມສາປີ 1995. ບັນດາລັດຖະມົນຕີ ຍັງໄດ້​ເຫັນ​ພ້ອມນຳ​ກັນເຖິງຄວາມສຳ
ຄັນໃນການຊັ່ງຊາຕີລາຄາຢ່າງລະອຽດເບິ່ງຜົນກະທົບທີ່ອາດຈະເກີດຂຶ້ນໃນຫຼາຍໆດ້ານໂດຍ
ການຮ່ວມມື ແລະປຶກສາຫາລືກັນ ກັບພັກຝ່າຍກ່ຽວຂ້ອງ ກ່ອນທີ່ຈະເລີ່ມດຳເນີນການໃດໆ
ກ່ຽວກັບການກໍ່ສ້າງໃໝ່ຫຼືການປ່ຽນແປງ​ໃດໆຕາມລຳແມ່ນໍ້າຂອງ.

ບັນດາລັດຖະມົນຕີ ໄດ້ສະແດງຄວາມຊົມເຊີຍ ຕໍ່ຄວາມສຳເລັດຂອງກອງປະຊຸມກຸ່ມປະຕິບັດ
ງານພູມີພາກ LMI ທີ່ໄດ້ຈັດຂຶ້ນຢູ່ກຳປູເຈຍ ໃນວັນທີ 17 ຫາ 18 ມີນາປີ 2011 ນີ້ທີ່ໄດ້
ພາໃຫ້ເກີດມີຮ່າງ​ເອກະສານຂໍ້ຄິດເຫັນ ແລະແຜນປະຕິບັດງານ 5 ປີຂອງໂຄງການ LMI
ຂຶ້ນມາ. ເອກກະສານເຫຼົ່ານີ້​ ໄດ້ໃຫ້ວິໄສທັດກ່ຽວກັບ​ໂຄງການລິເລີ່ມດັ່ງກ່າວແລະຂອບຍຸດ
ທະສາດສຳລັບບູລິມມະສິດຕ່າງໆໃນອະນາຄົດ. ບັນດາລັດຖະມຸນຕີຍັງໄດ້ເຫັນພ້ອມນຳກັນ
ວ່າ ຮ່າງຂໍ້ຄິດເຫັນແລະແຜນປະຕິບັດງານທີ່ວ່ານີ້ຈະເປັນເຄື່ອງມືທີ່ເປັນປະໂຫຍດສໍາລັບເພີ່ມ
ທະວີການ ຮ່ວມມື ແລະເລີ່ມຂັ້ນຕອນໃນການວາງແຜນແລະການອອກແບບກ່ຽວກັບກິດຈະ
ກໍາຮ່ວມກັນຕ່າງໆ.

ບັນດາລັດຖະມົນຕີ​ໄດ້ເລີ່ມນໍາໃຊ້ກອງເລຂາທາງອິນເຕີແນັດ ທີ່ເອີ້ນວ່າ Virtual Secreta-
riat ຊຶ່ງຈະອຳນວຍຄວາມສະດວກ ໃນການແບ່ງປັນຂໍ້ມູນຂອງບັນດາປະເທດພາຄີແລະເຮັດ​
ໃຫ້​ຜູ້​ຄົນ​ໄດ້​ຮູ້ຈັກ​ຫລາຍ​ຂຶ້ນ ກ່ຽວກັບການຮ່ວມມືຂອງບັນດາປະເທດພາຄີໃນເຂດລຸ່ມແມ່ນໍ້າ
ຂອງແລະໂຄງການສະເພາະຕ່າງໆ.

ບັນດາລັດຖະມົນຕີຍັງໄດ້ທົບທວນເບິ່ງການຈັດຕັ້ງປະຕິບັດບົດບັນທຶກຄວາມເຂົ້າໃຈໃນການ
ຮ່ວມມືຫຼືເປັນພາຄີລະຫວ່າງຄະນະກຳມາທິການແມ່ນໍ້າຂອງສາກົນ ແລະຄະນະກຳມາທິການ
ແມ່ນໍ້າມິດຊິດຊິບປີ້ຮວມທັງໂຄງການລິເລີ່ມແລກປ່ຽນ ຊຶ່ງມີຂຶ້ນໃນເດືອນມິຖຸນາປີ 2011 ນີ້.
ບັນດາລັດຖະມົນຕີ ໄດ້ຮຽກຮ້ອງໃຫ້ຄະນະກຳມາທິການທັງສອງ ລະບຸໃຫ້ຊາບຢ່າງວ່ອງໄວ
ພວກຂົງເຂດ ວຽກງານບູລິມມະສິດຕ່າງໆແລະທິດທາງສໍາລັບການຮ່ວມມືໃນອະນາຄົດເພື່ອ
ປະກອບເຂົ້າໃນການຈັດຕັ້ງປະຕິບັດແຜນປະຕິບັດງານຂອງ LMI ນັ້ນ.

ບັນດາພາຄີໄດ້ຮັບຮູ້ເຖິງການສືບຕໍ່ປະສົບຄວາມສຳເລັດ ກ່ຽວກັບໂຄງການພະຍາກອນອາ
ກາດແມ່ນໍ້າຂອງຫຼື the Forecast Mekong Project ທີ່ໄດ້ດຳເນີນການໂດຍຜ່ານການ ເປັນພາຄີລະຫວ່າງອົງການສຳຫຼວດທໍລະນີວິທະຍາຂອງສະຫະລັດແລະລັດຖະບານຂອງປະ
ເທດຕ່າງໆຕະຫຼອດທັງມະຫາວິທະຍາໄລໃນເຂດລຸ່ມແມ່ນໍ້າຂອງ. ໂຄງການພະຍາກອນອາ
ກາດແມ່ນໍ້າຂອງໄດ້ເສີມສ້າງສະມັດຖະພາບຢູ່ໃນຂົງເຂດທີ່ພົວພັນກັບການແກ້ໄຂບັນຫາທ້າ
ທາຍຕ່າງໆກ່ຽວກັບການປ່ຽນແປງຂອງດິນຟ້າອາກາດ. ນອກນັ້ນບັນດາລັດຖະມົນຕີຍັງໄດ້
ຕົກລົງກັນວ່າ ການເສີມສ້າງສະມັດຖະພາບເພີ່ມຕື່ມ ແລະການຍົກລະດັບສະຖານທີ່ຕ່າງໆ
ແມ່ນມີຄວາມຈຳເປັນເພື່ອ​ໃຫ້​ບັນລຸພະລັງບົ່ມຊ້ອນ​ໂດຍ​ເຕັມຂອງໂຄງການ.

ບັນດາລັດຖະມົນຕີຍັງໄດ້ພາກັນທົບທວນເບິ່ງຄວາມສຳເລັດໃນການຝຶກອົບຮົມຂອງກຸ່ມປະ
ຕິບັດງານ LMI ໃນການອອກແບບ ແລະທົດສອບເຕົາຫຸງ​ຕົ້ມອາຫານ ທີ່ລາວໄດ້ເປັນເຈົ້າ
ພາບຈັດຂຶ້ນໃນເດືອນມີນາປີນີ້ ບ່ອນທີ່ພວກເຂົາເຈົ້າໄດ້ດຳເນີນງານຮ່ວມກັນເພື່ອອຳນວຍ
ຄວາມສະດວກ​ ໃຫ້​ມີ​ການ​ຮ່ວມ​ງານ​ກັນເພີ່ມຂຶ້ນລະຫວ່າງບັນດາພາຄີ​ໃນພູມີພາກ​ເພື່ອ​ສົ່ງ
ເສີມວິທີ​ການປະຕິບັດທີ່ດີ ຂຶ້ນໃນດ້ານການ​ຮັກສາສຸຂະພາບອະນາໄມ.

ໃນຄຳປາໄສເປີດກອງປະຊຸມນັ້ນລັດຖະມົນຕີການຕ່າງປະເທດສະຫະລັດທ່ານນາງ Hillary
Clinton ໄດ້ກ່າວຊົມເຊີຍ ສປປ ລາວ ໃນການດຳເນີນຄວາມພະຍາຍາມ ກ່ຽວກັບເລື່ອງນີ້.
ທ່ານນາງເວົ້າວ່າ:

“ຂ້າພະເຈົ້າຢາກຂໍກ່າວຢໍ້າສັ້ນໆ ກ່ຽວກັບຜົນສຳເລັດທີ່ໄດ້ມີການບັນລຸ ຈັກສອງ
ສາມຢ່າງ ໃນຮອບປີທີ່ຜ່ານມາ. ກ່ຽວກັບຫຼັກໝັ້ນທຳອິດ ໃນການເປັນພາຄີຂອງ
ພວກເຮົາ ຊຶ່ງໄດ້ແກ່ການຮັກສາສຸຂະພາບອະນາໄມນັ້ນລາວໄດ້ຈັດການຝຶກອົບ
ຮົມຂຶ້ນກ່ຽວກັບການພັດທະນາແລະການທົດລອງ​ໃຊ້ເຕົາທີ່ສະອາດ. ປະຊາຊົນ
ຈຳນວນຫຼາຍພັນລ້ານຄົນຢູ່ໃນທົ່ວໂລກ ພາກັນປຸງແຕ່ງອາຫານແລະທຳຄວາມ
ອຸ່ນໃຫ້ແກ່ເຮືອນຊານຂອງພວກເຂົາເຈົ້າ ໂດຍການດັງໄຟຢູ່ທາງ​ໃນ​ເຮືອນແຕ່
ວ່າຄວັນຈາກໄຟເຫຼົ່ານີ້ ໄດ້ສ້າງ​ບັນຫາ​ໃຫຍ່​ ໃນ​ດ້ານ​ສຸຂະພາບ ທີ່ເຮັດໃຫ້ມີຜູ້
ເສຍຊີວິດເກືອບ 2 ລ້ານຄົນ​ໃນ​ແຕ່ລະປີ ຊຶ່ງສ່ວນ​ໃຫຍ່ ທີ່ຈິງ​ແລ້ວກໍແມ່ນພວກ
ແມ່ຍິງແລະເດັກນ້ອຍ​ເກືອບ​ທັງ​ໝົດຫັ້ນ​ແຫລະ. ນອກນັ້ນແລ້ວການເອົາຟືນມາ
ດັງຍັງມີສ່ວນໃນການເຮັດໃຫ້ດິນຟ້າອາກາດປ່ຽນແປງ ຊຶ່ງເຮັດໃຫ້ເຕົາຫຸງຕົ້ມ
ແລະການປັບປຸງເທັກໂນໂລຈີຂອງເຕົາເຫຼົ່ານີ້​ໃຫ້​ດີ​ຂຶ້ນເປັນຊ່ອງທາງນຶ່ງທີ່ງ່າຍ
ແລະກໍບໍ່​ແພງ​ໃນ​ການຊ່ອຍຊີວິດຜູ້​ຄົນ​ໄວ້ແລະປົກປ້ອງສະພາບແວດລ້ອມແລະ
ຂ້າພະເຈົ້າຂໍຕົບມືຊົມເຊີຍລາວ ທີ່ໄດ້ນຳເອົາເຕົາທີ່ສະອາດມາໃຫ້ຜູ້ຄົນໄດ້ໃຊ້
ໃນຈຳນວນຫຼາຍຂຶ້ນ.”

ນອກນັ້ນບັນດາລັດຖະມົນຕີຍັງໄດ້ສະແດງຄວາມຍິນ​ດີຕໍ່ແຜນການຂະຫຍາຍການລິເລີ່ມ
ດ້ານພາສາອັງກິດ. ໂດຍຜ່ານໂຄງການໃໝ່ ທີ່​ເອີ້ນ​ວ່າ ໂຄງການພາສາອັງກິດສຳລັບຈຸດ
ປະສົງສະເພາະຂອງ LMI ນັ້ນພວກນາຍຄູຈະ​ໄປສອນພາສາອັງກິດໃຫ້ແກ່ພວກເຈົ້າໜ້າ
ທີ່ແລະພວກນັກວິຊາການທີ່​ເຮັດວຽກກ່ຽວ​ກັບ​ບັນຫາຕ່າງໆທີ່ພົວພັນກັບສິ່ງແວດລ້ອມ
ສຸຂະນາໄມແລະການພັດທະນາໂຄງລ່າງພື້ນຖານ.

ບັນດາລັດຖະມົນຕີໃຫ້ການຢືນຢັນວ່າ LMI ແມ່ນກົນໄກທີ່ມີຄວາມຈຳເປັນເພື່ອການຮ່ວມ
ມືເພີ່ມຕື່ມຢູ່ໃນພູມີພາກ ທັງໃນລະດັບຊາດແລະໃນລະດັບທ້ອງຖິ່ນຂອງບັນດາປະເທດໃນ
ເຂດອ່າງແມ່ນໍ້າຂອງ ໃນການແກ້ໄຂບັນຫາທ້າທາຍທີ່ຮີບດ່ວນຕ່າງໆໃນສັດຕະວັດທີ 21
ນີ້ແລະໄດ້ສະແດງຄວາມ​ປາດ​ຖະໜາຂອງພວກທ່ານ ​ໃນ​ການສືບຕໍ່ດໍາ​ເນີນໂຄງການດ້ານ
ການສຶກສາ ສະພາບແວດລ້ອມ ແລະສຸຂະນາໄມແລະລິເລີ່ມໂຄງການໃນດ້ານໂຄງລ່າງພື້ນ
ຖານຕ່າງໆ. ​ໄດ້ມີການຕົກລົງຢ່າງເປັນເອກກະສັນກັນວ່າຈະສືບຕໍ່ການດຳເນີນຄວາມພະ
ຍາຍາມນີ້ ໂດຍຜ່ານກອງປະຊຸມລະດັບເຈົ້າໜ້າທີ່ອະວຸໂສກຸ່ມປະຕິບັດງານພູມີພາກ ການ
ປຶກສາຫາລືກັນເພີ່ມຕື່ມ ແລະກິດຈະກຳໃນໂຄງການຕ່າງໆທີ່ໄດ້ມີການວາງແຜນໄວ້ແລ້ວ
ນັ້ນ.

ບັນດາລັດຖະມົນຕີໄດ້ສະແດງຄວາມຍິນ​ດີ​ນໍາການສະເໜີຂອງລາວ ທີ່ຈະເປັນເຈົ້າພາບຈັດ
ກອງປະຊຸມກຸ່ມປະຕິບັດງານພູມີພາກຄັ້ງທີ 2 ກ່ຽວກັບ 4 ຂົງເຂດວຽກງານບູລິມມະສິດ
ຂອງ LMI ແລະກອງປະຊຸມຄົບຄະນະທີ່ນະຄອນວຽງຈັນໃນປີນີ້ບ່ອນທີ່ບັນດາຜູ້ຕາງໜ້າ
ຂອງ LMI ຈະວາງແຜນກ່ຽວກັບໂຄງການຮ່ວມມືຕ່າງໆ ແລະໂຄງການຕ່າງໆສໍາລັບຈັດ
ຕັ້ງປະຕິບັດນັ້ນ. ບັນດາລັດຖະມົນຕີຍັງໄດ້ສະ​ແດງ​ຄວາມ​ຍິນ​ດີ​ແລະ​ຕັ້ງໜ້າ​ລໍຖ້າການເປີດ
ກອງປະຊຸມລະດັບລັດຖະມົນຕີຄັ້ງທີ 5 ຂອງໂຄງການລິເລີ່ມການຮ່ວມມືໃນເຂດລຸ່ມແມ່ນໍ້າ
ຂອງຊຶ່ງຈະມີຂຶ້ນທີ່ປະເທດກຳປູເຈຍໃນປີ 2012 ນັ້ນ.

ສະຫະລັດໄດ້ເລີ່ມຕົ້ນໂຄງການລິເລີ່ມໃນເຂດລຸ່ມແມ່ນໍ້າຂອງຫຼື LMI ເມື່ອ 2 ປີກ່ອນໂດຍ
ມີຈຸດປະສົງທີ່ແນໃສ່ເພື່ອຊຸກຍູ້​ໃຫ້​ມີການຮ່ວມມືກັນເລື້ອຍຂຶ້ນແລະມີປະສິດທິຜົນຫຼາຍ​ຂຶ້ນ ​ໃນລະຫວ່າງບັນດາປະເທດໃນເຂດລຸ່ມແມ່ນໍ້າຂອງແລະສະຫະລັດ

ທ່ານ​ນາງລັດຖະມົນຕີການຕ່າງປະເທດ Clinton ກ່າວມ້ວນທ້າຍຄໍາ​ປາໄສຂອງ​ທ່ານ​ນາງ
ວ່າ

“ໂຄງການລິເລີ່ມສຳລັບເຂດລຸ່ມແມ່ນໍ້າຂອງນີ້ ແມ່ນສະທ້ອນໃຫ້ເຫັນເຖິງຄວາມ ໝາຍໝັ້ນຕັ້ງໃຈຂອງສະຫະລັດ ຕໍ່ຄວາມຢູ່ດີກິນດີ ຂອງປະຊາຊົນ ແລະຜົນສຳ
ເລັດໃນໄລຍະຍາວ ຂອງບັນດາປະເທດໃນເຂດລຸ່ມແມ່ນໍ້າຂອງ. ພວກເຮົາໃຫ້ ການສະໜັບສະນຸນການດຳເນີນງານຂອງພວກທ່ານ ເພື່ອເສີມສ້າງພື້ນຖານທີ່
ເຂັ້ມແຂງກວ່າເກົ່າ ສຳລັບຄວາມອຸດົມຮັ່ງມີແລະຄວາມກ້າວໜ້າ ແລະພວກເຮົາ ຫວັງວ່າຈະໄດ້ສືບຕໍ່ການດຳເນີນງານຮ່ວມກັບພວກທ່ານ ໃນຖານະພາຄີແລະ
ເພື່ອນມິດໃນໄລຍະຫຼາຍໆປີຕໍ່ໜ້າ.”


XS
SM
MD
LG