ໃນການເຈລະຈາຫາລືກັບທ່ານທອງລຸນ ສີສຸລິດ ລັດຖະມົນຕີການຕ່າງປະເທດ ສປປ ລາວ
ນັ້ນ ທ່ານນາງ Hillary Clinton ລັດຖະມົນຕີການຕ່າງປະເທດສະຫະລັດ ໄດ້ໂອ້ລົມກ່ຽວ
ກັບການເຂົ້າເປັນສະມາຊິກ ຂອງລາວ ຢູ່ໃນອົງການໆຄ້າໂລກ ຊຶ່ງຈະມີຂຶ້ນໃນອີກບໍ່ດົນນີ້
ແລະການສືບຕໍ່ໃຫ້ຄວາມຊ່ອຍເຫຼືອຂອງສະຫະລັດ ໃນການເກັບກູ້ ແລະທຳລາຍລະເບີດບໍ່
ທັນແຕກທີ່ຍັງຕົກຄ້າງແຕ່ປາງສົງຄາມຫວຽດນາມ ດ້ວຍຄວາມປອດໄພ.
“ພວກເຮົາແຕ້ມເສັ້ນໂຄ້ງແຫ່ງສາຍສໍາພັນຂອງພວກເຮົາ ໂດຍເລີ້ມແຕ່ການແກ້ໄຂບັນຫາ
ຕົກຄ້າງທີ່ເປັນໜ້າເສົ້າຂອງອະດີດໄປເຖິງການຊອກຫາວິທີທາງໃໝ່ເພື່ອເປັນຄູ່ເຮັດວຽກ
ງານຮ່ວມກັນໃນອະນາຄົດ.”
ໃນການແກ້ໄຂບັນຫາທີ່ຍັງຕົກຄ້າງເຫຼົ່ານີ້ທ່ານນາງ Clinton ໄດ້ໄປຢ້ຽມຢາມສູນຜະລິດ
ອຸບປະກອນອົງຄະທຽມຊຶ່ງເປັນອົງການທີ່ບໍ່ຫວັງຜົນກຳໄລທີ່ໄດ້ຮັບການສະໜັບສະໜຸນ
ສ່ວນນຶ່ງຈາກສະຫະລັດນັ້ນ ເພື່ອຊ່ອຍພວກທີ່ໄດ້ຮັບບາດເຈັບຍ້ອນລະເບີດລູກຫວ່ານທີ່
ຍັງບໍ່ແຕກ ທີ່ສະຫະລັດໄດ້ຖິ້ມລົງໃສ່ ຫຼາຍກວ່າ 580,000 ຖ້ຽວ ລະຫວ່າງປີ 1964 ຫາ
1975 ນັ້ນ.
ລັດຖະມົນຕີການຕ່າງປະເທດ Clinton ກ່າວວ່າ ສະຫະລັດໄດ້ຊ່ອຍເກັບກູ້ແລະທຳລາຍ
ລະເບີດຫຼາຍກວ່າ 1 ລ້ານລູກອອກຈາກພື້ນທີ່ 23,000 ເຮັກຕາໃນລາວ ຊຶ່ງໃນເວລານີ້
ສາມາດນໍາໄປໃຊ້ ໃນການປູກຝັງ ຫຼືບໍ່ ກໍການພັດທະນາອື່ນໆໄດ້. ທ່ານນາງ Clinton
ກ່າວຕື່ມວ່າ
“ຂ້າພະເຈົ້າຫວັງວ່າ ປະເທດອື່ນໆໃນປະຊາຄົມນາໆຊາດ ຈະຮ່ວມສົມທົບໃນການດໍາ
ເນີນຄວາມພະຍາຍາມຂອງພວກເຮົາເພື່ອເຮັດໃຫ້ບັນຫາທີ່ຍັງຕົກຄ້າງແຕ່ປາງສົງຄາມ
ຫວຽດນາມດັ່ງກ່າວສິ້ນສຸດລົງດ້ວຍຄວາມປອດໄພແລະໃຫ້ຜູ້ຄົນໃນປະເທດນີ້ ໂດຍສະ
ເພາະແລ້ວແມ່ນພວກເດັກນ້ອຍມີໂອກາດທີ່ຈະດໍາລົງຊີວິດດ້ວຍຄວາມປອດໄພຈາກລະ
ເບີດທີ່ບໍ່ທັນແຕກເຫຼົ່ານີ້.”
ໃນລະຫວ່າງການຢ້ຽມຢາມ ຂອງທ່ານນາງ Clinton ນັ້ນ ລັດຖະບານຂອງປະເທດທັງ
ສອງໄດ້ຕົກລົງທີ່ຈະປັບປຸງການດໍາເນີນຄວາມພະຍາຍາມໃນການຊອກຄົ້ນຫາທະຫານ
ອາເມຣິກັນ ທີ່ຍັງຫາຍສາບສູນ ໃນປາງສົງຄາມຫວຽດນາມ. ພວກເຈົ້າໜ້າທີ່ສະຫະລັດ
ຢາກເຂົ້າໄປເຖິງສະຖານທີ່ຊອກຄົ້ນຫຼາຍຂຶ້ນຊຶ່ງຜ່ານມາໄດ້ທໍາການສືບສວນເບິ່ງສະຖານ
ທີ່ຕ່າງໆ ທີ່ພົວພັນກັບທະຫານອາເມຣິກັນຫາຍສາບສູນບໍ່ຮອດ 600 ຄົນນັບແຕ່ກາງ
ຊຸມປີ 1980 ເປັນຕົ້ນມາ.
ລັດຖະມົນຕີການຕ່າງປະເທດ Clinton ໄດ້ສະແດງຄວາມຂອບອົກຂອບໃຈ ຕໍ່ການທີ່
ລັດຖະບານລາວໄດ້ຈັດໃຫ້ພວກອົບພະຍົບຊາວມົ້ງທີ່ຖືກສົ່ງກັບຄືນຈາກໄທໃນປີ 2009
ກັບຄືນເຂົ້າເປັນພາກສ່ວນນຶ່ງຂອງສັງຄົມ. ໃນຖະແຫຼງການທີ່ເປັນລາຍລັກອັກສອນສະ
ບັບນຶ່ງ ລັດຖະບານລາວກໍໄດ້ສະແດງຄວາມຂອບໃຈ ຕໍ່ລັດຖະບານສະຫະລັດ ທີ່ໄດ້ໃຫ້
ການຊ່ອຍເຫຼືອທາງດ້ານມະນຸດສະທໍາ ຕໍ່ບັນດາຄອບຄົວຊາວມົ້ງ ຕະຫຼອດທັງຜູ້ຄົນໃນ
ປະຊາຄົມທີ່ຢູ່ອ້ອມແອ້ມໝູ່ບ້ານຊາວມົ້ງເຫຼົ່ານັ້ນ.
ລັດຖະມົນຕີການຕ່າງປະເທດຂອງສະຫະລັດ ແລະ ສປປ ລາວຍັງໄດ້ຫາລືກັນກ່ຽວກັບ
ເລື່ອງປົກປ້ອງສິ່ງແວດລ້ອມແລະການລົງທຶນໃນເຂດລຸ່ມແມ່ນໍ້າຂອງ ໂດຍທີ່ລັດຖະບານ
ລາວໄດ້ໃຫ້ຄໍາໝັ້ນສັນຍາອີກຄັ້ງນຶ່ງວ່າຈະໂຈະການດໍາເນີນງານກ່ຽວກັບໂຄງການສ້າງ
ເຂື່ອນໄຊຍະບູລີ ທີ່ເປັນບັນຫາຖົກຖຽງໂຕ້ແຍ້ງນັ້ນໄວ້ເປັນການຊົ່ວຄາວເພື່ອເປັນການ
ສະໜອງຕອບຕໍ່ຄວາມເປັນຫ່ວງ ກັງວົນຂອງບັນດາປະເທດເພື່ອນບ້ານ.
ນາຍົກລັດຖະມົນຕີລາວ ທ່ານທອງສິງ ທໍາມະວົງ ແຈ້ງໃຫ້ລັດຖະມົນຕີ Clilnton ຊາບ
ວ່າ ລັດຖະບານຂອງທ່ານຈະເຊື້ອເຊີນພວກນັກຊ່ຽວຊານນາໆຊາດເຂົ້າໄປສຶກສາເບິ່ງ
ຜົນກະທົບຕໍ່ສິ່ງແວດລ້ອມແລະສັງຄົມຂອງເຂື່ອນດັ່ງກ່າວນີ້ອີກ ກ່ອນຈະຕັດສິນໃຈວ່າ
ຈະດໍາເນີນການຕໍ່ໄປຫຼືບໍ່. ເຈົ້າໜ້າທີ່ອະວຸໂສທ່ານນຶ່ງຂອງກະຊວງການຕ່າງປະເທດສະ
ຫະລັດກ່າວວ່າ ມັນເປັນການເຄື່ອນໄຫວທີ່ສໍາຄັນ ສໍາຫຼັບປະຊາຊົນ ໃນເຂດລຸ່ມແມ່ນໍ້າ
ຂອງແລະວໍຊິງຕັນຂໍຊົມເຊີຍ ຕໍ່ການຕັດສິນໃຈແບບມີຄວາມຮັບຜິດຊອບດັ່ງກ່າວ.
ການຢ້ຽມຢາມໃນຄັ້ງນີ້ ສະທ້ອນໃຫ້ເຫັນເຖິງການຮ່ວມມືລະຫວ່າງປະເທດທັງສອງທີ່
ພວມມີການຂະຫຍາຍໂຕ ກວ້າງອອກນັບມື້ ລຸນຫຼັງທີ່ໄດ້ຢູ່ຢ່າງໂດດດ່ຽວຈາກກັນມາ
ເປັນເວລາຫຼາຍໆທົດສະວັດ. ການຢ້ຽມຢາມສະຫະລັດ ຂອງທ່ານທອງລຸນ ສີສຸລິດ
ລັດຖະມົນຕີການຕ່າງປະເທດ ສປປ ລາວໃນປີ 2010 ແມ່ນການຢ້ຽມຢາມເທື່ອທໍາອິດ
ຂອງເຈົ້າໜ້າທີ່ອະວຸໂສລາວ ໃນຮອບ 35 ປີແລະ ການຢ້ຽມຢາມລາວໃນເທື່ອນີ້ ແມ່ນ
ເທື່ອທໍາອິດໂດຍລັດຖະມົນຕີການຕ່າງປະເທດສະຫະລັດ ນັບແຕ່ທ່ານ John Foster
Dulles ໄດ້ມາຢ້ຽມຢາມລາວ ໃນປີ 1955.