ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ກ່າວວ່າ ສະຫະລັດ
ຈະໃຊ້ “ທຸກອົງປະກອບຂອງກໍາລັງສະຫະລັດ” ທີ່ຈະປ້ອງກັນບໍ່ໃຫ້ອີຣານ ມີອາວຸດນີວເຄລຍ
ຢູ່ໃນຄວາມຄອບຄອງໄດ້.
ທ່ານນາງ Clinton ໄດ້ກ່າວໃນວັນຈັນວານນີ້ຫຼັງຈາກທີ່ໂອ້ລົມກັບເຈົ້າໜ້າທີ່ຂັ້ນສູງຂອງ
Israel ທີ່ນະຄອນ Jerusalem ວ່າ ຂໍ້ສະເໜີຂອງທາງອີຣານໃນເລື່ອງດັ່ງກ່າວນັ້ນ
ມາຮອດປັດຈຸບັນນີ້ “ບໍ່ແມ່ນການເລີ່ມຕົ້ນ.” ຊຶ່ງທ່ານນາງກ່າວວ່າ“ພວກເຮົາທັງໝົດ
ແມ່ນຢາກເຫັນການແກ້ໄຂທາງດ້ານການທູດ ແລະພວກຜູ້ນໍາຂອງອີຣານກໍຍັງມີ
ໂອກາດ ທີ່ຈະຕັດສິນໃນທາງທີ່ຖືກຕ້ອງ ໃນທີ່ສຸດແລ້ວ ທາງເລືອກກໍຂຶ້ນຢູ່ກັບອິຣານເອງ.”
ສະຫະລັດ ອີສຣາແອລ ແລະຫຼາຍປະເທດໃນຢູໂຣບ ສົງໄສວ່າ ອີຣານ ແມ່ນກໍາລັງສ້າງອາວຸດ
ນີວເຄລຍ. ອີຣານປະຕິເສດຕໍ່ຂໍ້ກ່າວຫາດັ່ງກ່າວ ແລະວ່າການກັ່ນທາດຢູເຣນຽມນັ້ນແມ່ນເພື່ອ
ນໍາໃຊ້ໃນດ້ານພົນລະເຮືອນແລະການຄົ້ນຄວ້າ ທາງການແພດເທົ່ານັ້ນ.
ທາງນາງ Clinton ກັບຄືນສູ່ກຸງວໍຊິງຕັນໃນຕອນເຊົ້າວັນອັງຄານມື້ນີ້ ສິ້ນສຸດການເດີນທາງ
ຢ້ຽມຢາມ 9 ປະເທດ ໃນຢູໂຣບ ເອເຊຍ ແລະຕາເວັນອອກກາງ ເປັນເວລາ 2 ອາທິດ.
