ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ໄດ້ຮຽກຮ້ອງໃຫ້ບັນ
ດາປະເທດ ອາຟຣິກາໄດ້ຕັດຄວາມສຳພັນກັບຜູ້ນໍາ Libya ທ່ານ Moammar Gadhafi
ແລະທວງໃຫ້ຂັບໄລ່ຜູ້ກ່ຽວອອກຈາກອໍານາດ.
ທ່ານນາງ Clinton ໃຫ້ຄວາມເຫັນດັ່ງກ່າວໃນການຖະແຫລງໃນວັນຈັນວານນີ້ ທີ່ສໍານັກ
ງານໃຫຍ່ຂອງສະຫະພາບອາຟຣິກາ ໃນກຸງ Addis Ababa ກ່ອນທີ່ຈະຕັດການເດີນທາງ
ໃນການຢ້ຽມຢາມອາຟຣິກາໃຫ້ສັ້ນ ລົງ ຍ້ອນເຝື້ອຂີ້ເຖົ່າຈາກພູເຂົາໄຟທີ່ລະເບີດຢູ່ໃກ້ໆກັບ
Eritrea ນັ້ນ.
ທ່ານນາງໄດ້ບອກກັບບັນດາຜູ້ນໍາອາຟຣິກາ ທີ່ໄດ້ໄປຮວມກັນທີ່ນະຄອນຫຼວງຂອງ Ethiopia
ນັ້ນວ່າ ທ່ານ Gadhafi ໄດ້ສູນເສຍຄວາມຖືກຕ້ອງຊອບທຳ ໃນການທີ່ຈະປົກຄອງປະເທດ
ຕໍ່ໄປແລ້ວ. ທ່ານນາງຍັງໄດ້ຂໍຮ້ອງໃຫ້ບັນດາປະເທດເຫຼົ່ານີ້ຮຽກຮ້ອງໃຫ້ມີຢຸດຍິງຢ່າງແທ້ຈິງ
ແລະໃຫ້ ການສະໜັບສະໜູນຕໍ່ສະພາໄລຍະຂ້າມຜ່ານແຫ່ງຊາດຂອງພວກກະບົດ.
ທ່ານນາງຍັງໄດ້ຮຽກຮ້ອງໃຫ້ຂັບໄລ່ບັນດານັກການທູດຂອງ Libya ອອກຈາກບັນດາປະເທດ
ທີ່ເປັນສະມາຊິກຂອງສະຫະພາບອາຟຣິການໍາອີກ.
ບໍ່ດົນຫຼັງຈາກກ່າວຄຳປາໄສແລ້ວ ທ່ານນາງ Clinton ກໍອອກເດີນທາງຈາກ Ethiopia
ແລະກັບຄືນສູ່ກຸງ Washington ໃນທັນທີ ຍ້ອນຢ້ານວ່າເຝື້ອຂີ້ເຖົ່າຈາກເຂົາໄຟອາດຈະສ້າງ
ບັນຫາ ໃຫ້ແກ່ການເດດີນທາງໄປມາ.
ທ່ານນາງ Clinton ແມ່ນ ລັດຖະມົນຕີການຕ່າງປະເທດສະຫະລັດຜູ້ທໍາອິດທີ່ໄດ້ຖະແຫລງ
ຕໍ່ກອງປະຊຸມສະຫະພາບອາຟຣິກາ ທີ່ມີສະມາຊິກ 53 ປະເທດນັ້ນ.
