ທ່ານນາງ ຮິລແລຣີ ຄຼິນຕັນ ລັດຖະມົນຕີຕ່າງປະເທດສະຫະລັດ ໄດ້ພົບປະກັບບັນດາຜູ້ນໍາ ສປປ ລາວ ເພື່ອປຶກສາຫາລືເລຶ່ອງການປົກປ້ອງຄຸ້ມຄອງດ້ານສະພາບແວດລ້ອມ ໃນເຂດປາກແມ່ນໍ້າຂອງຕອນລຸ່ມ ແລະບັນຫາອື່ນໆ ຢ້ອນຄືນໄປປາງສົງຄາມຫວຽດນາມນັ້ນນໍາ. ທ່ານນາງຄຼິນຕັນ ນັບວ່າເປັນລັດຖະມົນຕີຕ່າງປະເທດສະຫະລັດຄົນທໍາອິດທີ່ໄດ້ໄປຢ້ຽມຢາມ ລາວ ໃນຮອບ 57 ປີ.
ບັນດາຜູ້ນໍາທັງສອງຝ່າຍໄດ້ສົນທະນາໂອ້ລົມກັນ ກ່ຽວກັບການສືບຕໍ່ໃຫ້ ການຊ່ວຍເຫຼືອຂອງສະຫະລັດ ໃນການເກັບກູ້ລະເບີດລູກຫວ່ານ ທີ່ບໍ່ທັນແຕກ ທີ່ໄດ້ຖິ້ມລົງໃສ່ດິນແດນລາວໃນລະຫວ່າງປີ 1964 ຫາປີ 1975. ນອກນີ້ຜູ້ນໍາທັງສອງຍັງໄດ້ເຫັນພ້ອມນຳກັນທີ່ຈະປັບປຸງການດຳເນີນຄວາມພະຍາຍາມເພື່ອຊອກຫາທະຫານສະຫະລັດ ທີ່ຍັງຫາຍສາບສູນໄປໃນປາງ ສົງຄາມນັ້ນ.
ທ່ານນາງຄຼິນຕັນ ໄດ້ກ່າວຊົມເຊີຍ ສປປ ລາວ ໃນຄວາມພະຍາຍາມທີ່ຈະຊ່ອຍຈັດເອົາຊາວອົບພະຍົບເຜົ່າມົ້ງ ທີ່ໄດ້ເດີນທາງກັບຄືນຈາກໄທ ໃນປີ 2008 ນັ້ນ ກັບເຂົ້າເປັນພາກສ່ວນນຶ່ງຂອງປະຊາຄົມລາວຄືນອີກ.
ຈາກລາວ ທ່ານນາງ ຈະເດີນທາງຕໍ່ໄປຍັງກໍາປູເຈຍໃນຕອນບ່າຍວັນພຸດມື້ນີ້ ເພື່ອເຂົ້າຮ່ວມກອງປະຊຸມຂອງສະມາຄົມອາຊ່ຽນທີ່ນັ້ນ.