ທະຫານເທີກີ 8 ຄົນ ແລະສະມາຊິກ 6 ຄົນຂອງພັກກຳມະກອນຊາວເຄີດ ຊຶ່ງເປັນກຸ່ມນອກກົດໝາຍທີ່ເອີ້ນຫຍໍ້ວ່າ PKK ນັ້ນ ໄດ້ເສຍຊີວິດໃນວັນສຸກມື້ນີ້ໃນການປະທະກັນ ໃນເຂດ ທີ່ມີຊາວເຄີດອາໄສຢູ່ເປັນສ່ວນໃຫຍ່ ທາງພາກຕາເວັນອອກສຽງໃຕ້ຂອງປະ ເທດນັ້ນ ອີງຕາມຖະແຫຼງການຂອງກອງທັບເທີກີ.
ທະຫານ 6 ຄົນໄດ້ເສຍຊີວິດແລະອີກ 8 ຄົນໄດ້ຮັບບາດເຈັບ ໃນການປະທະກັນກັບພວກ ກະບົດທີ່ເກີດຂຶ້ນຢູ່ໃນແຂວງ Hakkari ໃນວັນສຸກມື້ນີ້ແລະທະຫານ ອີກ 2 ຄົນໄດ້ເສຍ ຊີວິດ ເວລາເຮືອບິນເຮຣີຕອບເຕີ້ທີ່ສົ່ງໄປປະຕິບັດງານຢູ່ໃນ ເຂດດັ່ງກ່າວ ປະສົບອຸບັດຕິ ເຫດຕົກ ຍ້ອນມີບັນຫາທາງດ້ານເທັກນິກ.
ໃນຂະນະດຽວກັນ ພວກທີ່ສົງໄສວ່າເປັນຜູ້ເຮັດລະເບີດ 4 ຄົນໄດ້ເສຍຊີວິດໃກ້ກັບເມືອງ Diyarbakir ໃນຕອນແລງວັນພະຫັດວານນີ້ອີງຕາມຄຳເວົ້າຂອງເຈົ້າໜ້າທີ່ກະຊວງພາຍ ໃນເທີກີ.
ເຈົ້າໜ້າທີ່ຮັກສາຄວາມສະຫງົບກ່າວວ່າ ເຫດລະເບີດເກີດຂຶ້ນເວລາພວກຫົວຮຸນແຮງ PKK ໄດ້ເອົາດິນລະເບີດໃສ່ເຂົ້າໄປໃນລົດບັນທຸກຄັນນຶ່ງ.
ເຫດລະເບີດທີ່ເກີດຂຶ້ນໃນຕອນເດິກ ໄດ້ເຮັດໃຫ້ມີຜູ້ໄດ້ຮັບບາດເຈັບຢ່າງໜ້ອຍ 7 ຄົນ ໃນ ການໂຈມຕີດ້ວຍລະເບີດລົດ ໃກ້ຄ້າຍທະຫານແຫ່ງນຶ່ງໃນເຂດຊານ ເມືອງຂອງນະຄອນ ອິສຕັນບູລ.
ຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບໃນການໂຈມຕີດ້ວຍລະເບີດລົດດັ່ງ ກ່າວນີ້ ເທື່ອ.
ພວກຫົວຮຸນແຮງ PKK ທີ່ຖືວ່າເປັນອົງການກໍ່ການຮ້າຍໂດຍເທີກີແລະບັນດາປະເທດ ພັນທະມິດນັ້ນ ໄດ້ທຳການກໍ່ກະບົດມາໄດ້ຫລາຍທົດສະວັດແລ້ວ ເພື່ອຢາກໃຫ້ຊາວເຄີດ ໃນເທີກີ ມີສິດໃນການປົກຄອງຕົນເອງຫຼາຍຂຶ້ນ.
ການປະທະກັນໄດ້ເພີ້ມຂຶ້ນລະຫວ່າງ ທະຫານເທີກີແລະພວກຫົວຮຸນແງກຸ່ມນີ້ຢູ່ ໃນພາກ ຕາເວັນອອກສຽງໃຕ້ຂອງປະເທດ ນັບແຕ່ເດືອນກໍລະກົດປີ 2015 ເປັນຕົ້ນມາ ເມື່ອການ ຢຸດຍິງເປັນເວລາ 2 ປີ ລະຫວ່າງອັງກາຣາ ແລະພວກ ກະບົດແບ່ງແຍກດິນແດນຊາວ ເຄີດ ແຕກຫັກລົງ. ເຂດດັ່ງກ່າວໄດ້ເກີດມີການຕໍ່ສູ້ກັນທີ່ຮ້າຍແຮງທີ່ສຸດ ນັບແຕ່ໄລຍະທີ່ມີ
ການກໍ່ກະບົດຮ້າຍແຮງໃນຊຸມປີ 1990.
ບັນຫາຂັດແຍ້ງດັ່ງກ່າວເຮັດໃຫ້ມີຜູ້ເສຍຊີວິດໄປແລ້ວຫລາຍສິບພັນຄົນ ນັບແຕ່ປີ 1984 ເປັນຕົ້ນມາ.
ອ່ານຂ່າວນີ້ເພີ້ມເປັນພາສາອັງກິດ
