ເມືອງນຶ່ງຢູ່ໃນພາກຕາເວັນອອກສຽງເໜືອຂອງຊີເຣຍ ໄດ້ກາຍມາເປັນເຂດແນວໜ້າໃນ
ສົງຄາມກາງເມືອງຂອງປະເທດ ໃນຂະນະທີ່ເຮືອບິນລົບຊີເຣຍໂຈມຕີກຳ ລັງຊາວເຄີດ ໃນວັນພະຫັດທີ່ຜ່ານມາ ແລະສະຫະລັດໄດ້ຕອບໂຕ້ໂດຍການສົ່ງເຮືອບິນຂອງຕົນ ໄປປ້ອງກັນກຳລັງແນວໂຮມຢູ່ໃນເຂດດັ່ງກ່າວ.
ພົນລະເຮືອນຫລາຍພັນຄົນໄດ້ພາກັນລົບໜີຈາກເມືອງ Hasaka ຊຶ່ງປະຊາຊົນທີ່ອາໄສຢູ່
ສ່ວນໃຫຍ່ເປັນຊາວເຄີດນັ້ນ ນັບແຕ່ມີການໂຈມຕີທາງອາກາດຂອງຊີເຣຍ ທີ່ໄດ້ເລີ້ມຂຶ້ນໃນວັນພະຫັດ ຊຶ່ງພວກທີ່ເຫັນເຫດການກ່າວວ່າ ຫລາຍສິບຄົນໄດ້ເສຍຊີວິດ. ການໂຈມຕີທາງອາກາດດັ່ງກ່າວ ເປັນຂີດໝາຍເທື່ອທຳອິດນັບແຕ່ສົງຄາມກາງເມືອງຂອງປະເທດໄດ້ເລີ້ມຂຶ້ນໃນປີ 2011 ທີ່ເຮືອບິນລົບລັດຖະບານຊີເຣຍ ໄດ້ແນເປົ້າໝາຍໃສ່ເຂດທີ່ມີຊາວເຄີດອາໄສຢູ່ເປັນສ່ວນໃຫຍ່. ນອກນັ້ນແລ້ວ ຍັງປາກົດວ່າເປັນຂີດໝາຍໃນການແຕກຫັກລົງໃນການປະຕິບັດ ງານຮ່ວມກັນ ລະຫວ່າງກອງທະຫານລັດຖະບານຊີເຣຍ ແລະກຳລັງຊາວເຄີດ ເພື່ອຕໍ່ຕ້ານພວກນັກລົບອິສລາມ ຢູ່ໃນເມືອງດັ່ງກ່າວ ນັບແຕ່ປີ 2014 ເປັນຕົ້ນ
ມາ.
ບັນດາຜູ້ເຫັນເຫດການກ່າວວ່າ ເຮືອບິນລົບອາຍພົ່ນລັດຖະບານຊີເຣຍສາມລຳ ໄດ້ແນເປົ້າໝາຍໃສ່ທີ່ໝັ້ນທາງທະຫານ ຂອງຊາວເຄີດ ອີງຕາມຫ້ອງການສິ້ງຊອມສິດທິມະສຸດຊີເຣຍ ທີ່ມີບັນດານັກຄົ້ນຄວ້າປະຕິບັດງານຢູ່ທາງພາກພື້ນດິນນັ້ນ. ຮູບພາບວີດີໂອຂອງ
ວີໂອເອ ສະແດງໃຫ້ເຫັນວ່າ ເຮືອບິນທະຫານຊີເຣຍ ບິນເວີ່ນອ້ອມເມືອງ ໃນຂະນະທີ່ຊາວບ້ານພາກັນແລ່ນຊອກຫາບ່ອນຫລົບລີ້ໃນວັນສຸກວານນີ້.
ທ້າວ Hasaka Aziz Abe ກ່າວຕໍ່ວີໂອເອວ່າ “ເຮືອບິນລົບແມ່ນໄດ້ແນເປົ້າໝາຍໃສ່ເຂດຕ່າງເປັນການສະເພາະ ເພື່ອເຮັດໃຫ້ກຳລັງຊາວເຄີດໃນທ້ອງຖິ່ນອ່ອນແອລົງ.”
ໂຄສົກທຳນຽບຫ້າແຈ ພັນຕີ Adrian Rankine-Galloway ກ່າວວ່າ ກອງ ທັບອາກາດຊີເຣຍ ໄດ້ປະຕິບັດງານໂຈມຕີຕໍ່ “ກຳລັງພາກພື້ນດິນໃນຂົງເຂດເມືອງ Hasaka” ໃນວັນພະຫັດຜ່ານມານີ້. ເຖິງຢ່າງໃດກໍດີ ການໂຈມຕີບໍ່ໄດ້ຂົ່ມຂູ່ກຳລັງແນວໂຮມ ທີ່ປະຕິບັດງານຢູ່ໃນຂົງເຂດ. ໃນການຕອບໂຕ້ ສະຫະ ລັດ ໄດ້ສົ່ງເຮືອບິນຂຶ້ນໄປຄຸ້ມຄອງກຳລັງແນວໂຮມ ແລະທຳນຽບຫ້າແຈໄດ້ຕິດຕໍ່ຫາລັດຖະບານຣັດເຊຍ ທີ່ໄດ້ປະຕິບັດງານໂຈມຕີທາງອາກາດໃນຊີເຣຍເພື່ອ ສະໜັບສະໜູນລັດຖະບານ Assad. ໂຄສົກກ່າວວ່າ ຣັດເຊຍໄດ້ ເນັ້ນໜັກວ່າ ເຮືອບິນຣັດເຊຍບໍ່ໄດ້ພົວພັນກັບການໂຈມຕີຢູ່ເມືອງ Hasaka ແລະ “ພວກເຮົາສະແດງໃຫ້ເຫັນຢ່າງຈະແຈ້ງວ່າ ເຮືອບິນແນວໂຮມຈະປ້ອງກັນກອງທະຫານພາກພື້ນດິນຂອງຕົນ ຖ້າຫາກຖືກຂົ່ມຂູ່.
