ສຳນັກງານການທູດແລະຄ້າຍທະຫານສະຫະລັດ ໃນຕ່າງປະເທດ
ກຳລັງເພີ້ມການຮັກສາຄວາມປອດໄພຂຶ້ນ ໃນວັນອັງຄານມື້ນີ້
ໃນຂະນະທີ່ສະພາສູງສະຫະລັດ ຕຽມທີ່ຈະເປີດເຜີຍລາຍງານ
ທີ່ລໍຄອຍກັນມາເປັນເວລາດົນນານ ທີ່ຈະບັນລະຍາຍຢ່າງລະອຽດ
ກ່ຽວກັບ ວິທີການສອບສວນຕ່າງໆ ທີ່ອົງການສືບລັບ CIA
ໄດ້ປະຕິບັດມາ ນັບຕັ້ງແຕ່ການໂຈມຕີຂອງພວກກໍ່ການຮ້າຍ
ຕໍ່ແຜ່ນດິນສະຫະລັດ ເມື່ອວັນທີ 11 ເດືອນກັນຍາ ປີ 2001
ເປັນຕົ້ນມານັ້ນ.
ກ່າວກັນວ່າ ລາຍງານທີ່ມີ 6 ພັນໜ້າ ໄດ້ລະບຸຢ່າງລະອຽດ
ເຖິງວິທີການສອບສວນທີ່ຮຸນແຮງຕ່າງໆ ເຊັ່ນການກັກຂັງ
ຜູ້ຕ້ອງສົງໄສຢູ່ຫ້ອງແຄບໆ ການບໍ່ໃຫ້ໄດ້ຫລັບນອນ ແລະການຖອກນ້ຳໃສ່ໜ້າ ຊຶ່ງອາດ
ພາໃຫ້ສະໝັກນ້ຳຕາຍໄດ້ນັ້ນ. ບັນດາເຈົ້າໜ້າທີ່ລັດຖະບານ ທ່ານໂອບາມາ ໄດ້ມີຄວາມເປັນຫ່ວງຢ່າງໃຫຍ່ຫລວງວ່າ ການເປີດເຜີຍລາຍງານນີ້ ຈະສົ່ງຜົນໃຫ້ມີການກໍ່ຄວາມຮຸນແຮງ ຕໍ່ຜົນປະໂຫຍດຕ່າງໆຂອງສະຫະລັດ ຈົນລັດຖະມົນຕີການຕ່າງປະເທດ John Kerry ໄດ້ໂທລະສັບຫາ ທ່ານນາງ Diane Feinstein ປະທານ ຄະນະກຳມາທິການສືບລັບຂອງສະພາສູງ ໃນສັບປະດາແລ້ວນີ້ ກ່ຽວກັບຜົນສະທ້ອນທີ່ຈະ ຕິດຕາມມານັ້ນ.
U.S. Senate Intelligence Committee Releases Torture Report
ໂຄສົກຂອງທຳນຽບຂາວ ທ່ານ Josh Earnest ກ່າວຕໍ່ບັນດານັກຂ່າວໃນວັນຈັນວານນີ້ວ່າ ໄດ້ມີການເອົາ “ບາດກ້າວປ້ອງກັນຢ່າງຮອບຄອບ” ເພື່ອເພີ້ມທະວີການຮັກສາຄວາມປອດ
ໄພ ໃຫ້ແກ່ສຳນັກງານຕ່າງໆຂອງສະຫະລັດ ໃນກໍລະນີທີ່ເກີດການປະທ້ວງຢ່າງຮຸນແຮງ.
ທ່ານໂອບາມາ ໄດ້ມີຄຳສັ່ງຫ້າມ “ວິທີການສອບສວນທີ່ຮຸນແຮງ” ເຫລົ່ານັ້ນ ຫຼັງຈາກທີ່
ທ່ານໄດ້ຂຶ້ນກຳອຳນາດ ໃນປີ 2009. ໂຄສົກ Earnest ກ່າວວ່າ ທ່ານປະທານາທິບໍດີເຊື່ອວ່າ ມັນສຳຄັນ ທີ່ຊາວອາເມຣິກັນ ຈະຕ້ອງໄດ້ເຫັນຢ່າງຈະແຈ້ງເຖິງສິ່ງທີ່ໄດ້ເກີດຂຶ້ນແທ້ໆ.
