ໜັງສືພິມໃຫຍ່ສະບັບນຶ່ງຂອງສະຫະຣັດລາຍງານໃຫ້ຊາບວ່າອົງການສືບລັບຂອງສະຫະຣັດກຳລັງນຳໃຊ້ເທັກໂນໂລຈີໃໝ່ໃນປາກີສຖານເພື່ອແນເປົ້າ ໝາຍໃສ່ພວກກະບົດໃຫ້ດີຂຶ້ນໃນຂະນະດຽວກັນກໍລົດຜ່ອນຄວາມເສັຍຫາຍບາດເຈັບລົ້ມຕາຍຂອງພວກພົນລະເຮືອນລົງ.
ໜັງສືພິມ Washington Post ລາຍງານໃນວັນຈັນມື້ນີ້ວ່າອົງການ ສືບລັບ CIA ກຳລັງຕິດຕັ້ງລະເບີດທີ່ເອີ້ນວ່າ Small Smart Weaponໃສ່ພວກເຮືອບິນທີ່ບໍ່ມີຄົນຂັບຈຳນວນນຶ່ງ. ລະເບີດດັ່ງກ່າວຍາວຂະໜາດ 55 ຊັງຕິແມັດແລະເອີ້ນກັນວ່າ Scorpion ຫລືແມງເງົານັ້ນ.
ໜັງສືພິມສະບັບນີ້ອ້າງຄຳເວົ້າຂອງພວກເຈົ້າໜ້າທີ່ສະຫະຣັດຈຸນຶ່ງທີ່ບໍ່ບອກຊື້ໃຫ້ຊາບທີ່ເວົ້າວ່າລະເບີດນ້ຳໜັກ 16 ກິໂລກຣາມທີ່ວ່ານີ້ສາມາດບັນຈຸ ລະບົບນຳພາໄດ້ຮອດ 4 ຢ່າງ ທີ່ສາມາດເຮັດໃຫ້ລະເບີດຕົກໄປຖືກຄົນຜູ້ນຶ່ງໂດຍສະເພາະໄດ້ໃນຍາມມືດມົວນັ້ນ. ບົດຄວາມໜັງສືພິມສະບັບນີ້ຍັງໄດ້ເວົ້າເຖິງການປັບປຸງອື່ນໆຫວ່າງໄວໆມານີ້ເພື່ອລົກຜ່ອນການບາດເຈັບລົ້ມຕາຍຂອງພວກພົນລະເຮືອນ ຮວມທັງຫົວລະເບີດຊະນິດນຶ່ງສຳລັບລະເບີດ
ຂະໜາດໃຫຍ່ທີ່ສາມາດສັງຫານຜູ້ຄົນໄດ້ໂດຍບໍ່ຕ້ອງທຳລາຍໂຄງລ່າງພື້ນຖານຫລືອາຄານ.
ໜັງສືພິມ Washington Post ອ້າງຄຳເວົ້າຂອງພວກເຈົ້າໜ້າທີ່ວ່າການທີ່ບໍ່ປາກົດມີການຮ້ອງໂຮປະທ້ວງກ່ຽວກຫັບການເສັຍຊີວິດຂອງພວກພົນລະເຮືອນໃນປາກີສຖານໃນໄລຍະຫລັງໆນີ້ຊີ້ໃຫ້ເຫັນວ່າການໂຈມຕີເຫລົ່ານີ້ໄດ້ຫລີກລ້ຽງການສ້າງຄວາມເສັຍຫາຍໃຫ້ແກ່ສິ່ງທີ່ຢູ່ໃກ້ໆກັບເປົ້າໝາຍການໂຈມຕີນັ້ນໄດ້ຢ່າງສຳເລັດຜົນ.
