ສະບາຍດີ ທ່ານຜູ້ຟັງທີ່ເຄົາລົບ ແລະທີ່ຜ່ານໄປນັ້ນແມ່ນເພງ
Silver Bells ຂອງນັກຮ້ອງລູກທົ່ງ Joe Nichols ຊຶ່ງເປັນເພງ
ທີ່ແທດເໝາະກັບບັນຍາກາດໃນສະຫະລັດເວລານີ້ຢ່າງທີ່ສຸດ
ເພາະວ່າ ບໍ່ວ່າ ທ່ານຈະໄປສູນກາງການຄ້າຫລື shopping mall ແຫ່ງໃດ ທ່ານກໍຈະເຫັນພະນັກງານຂອງອົງການກຸສົນ Salvation Army ຢືນສັ່ນລະຄັງນ້ອຍຢູ່ ເຊີນຊວນໃຫ້ຄົນປ່ອນເງິນລົງໃນກະໂລ່ງນ້ອຍທີ່ ຫ້ອຍຢູ່ຂາຕັ້ງ ເພື່ອເອົາໄປຊ່ວຍເຫລືອພວກຄົນທຸກນັ້ນເອງ ຊຶ່ງການຊ່ວຍເຫລືອພວກທີ່ຂັດສົນກ່ວາ ກໍແມ່ນນໍ້າໃຈຂອງບຸນຄຣິສມາສຫລືບຸນສະຫລອງວັນປະສູດຂອງພະເຍຊູເຈົ້າ ຄືວັນທີ 25 ທັນວາ ເມື່ອ 2012 ປີກ່ອນ. ສໍາລັບຊາວຄຣິສແລ້ວ ບຸນນີ້ແມ່ນເປັນບຸນທີ່ສໍາຄັນທີ່ສຸດແລະມ່ວນຊື່ນທີ່ສຸດຂອງປີ ດັ່ງຄໍາບັນລະ ຍາຍໃນເພງນີ້ຂອງນັກຮ້ອງສຽງອໍາມະຕະຊື່ດັງກ້ອງໂລກຂອງອາເມຣິກາ Andy Williams ທີ່ຫາກໍເສຍຊີວິດໄປໃນປີນີ້ເອງ It’s the most wonderful time of the year.
ເລົ່າກັນວ່າ ໃນມື້ທີ່ພະເຍຊູປະສູດຢູ່ຮາງຫຍ້າໃນຄອກສັດ ຈາກ Mary ສາວບໍລິສຸດນັ້ນ ຜູ້ຄົນຕ່າງກໍພາກັນລຸລັ່ງໄປເບິ່ງໄປຊົມແລະເອົາເຄື່ອງຂອງໄປມອບໃຫ້ຜູ້ທີ່ເຂົາເຈົ້າຮູ້ວ່າ ຈະມາໂຜດໂລກມະນຸດ. ໃນນັ້ນກໍມີເດັກຊາຍຄົນນຶ່ງທີ່ແລ່ນໄປນໍາເຂົາເຈົ້າດ້ວຍ ໂດຍທີ່ບໍ່ມີຫຍັງເລີຍເພາະເປັນລູກຄົນທຸກ ນອກຈາກກອງນ້ອຍໆຂອງລາວ ທີ່ລາວຢາກເອົາໄປຫລິ້ນໃຫ້ພະເຍຊູຟັງ. ກໍເລີຍມີເພງກ່ຽວກັບເດັກຊາຍຄົນນີ້ ທີ່ເອີ້ນກັນວ່າ The Little Drummer Boy ຫລືນັກຕີກອງນ້ອຍໆ. ເພງນີ້ເປັນຜົນງານຂອງ Jessica Simpson.
ເວລາຂອງເຮົາເຫລືອນ້ອຍຫລາຍທ່ານທີ່ເຄົາລົບ ສະນັ້ນຂ້າພະເຈົ້າຂໍອໍາລາທ່ານໄປພ້ອມກັບເພງນີ້ເລີຍ Christmas in Dixie ຂອງ Trent Tomlinson. Dixie ກໍຄືເມືອງນຶ່ງໃນລັດ Alabama ແລະຂໍອ່ວຍພອນໃຫ້ທ່ານຜູ້ຟັງທຸກໆທ່ານທີ່ສະຫລອງບຸນຄຣິສມາສ ຈົ່ງມີແຕ່ຄວາມມ່ວນຊື່ນແລະສຸກສົມຫວັງ ປາດຖະໜາຂອງຂວັນແນວໃດກໍຂໍໃຫ້ໄດ້ດັ່ງໃຈມັກເຖິ້ນ ສໍາລັບທ່ານທີ່ບໍ່ສະຫລອງ ກໍຂໍໃຫ້ມີແຕ່ຄວາມມ່ວນຊື່ນໃນວັນຄຣິສມາສ ແລະຕະຫລອດໄປເຊ່ນກັນ. Merry Christmas and Happy New Year ລ່ວງໜ້າ. ຂໍໃຫ້ທຸກໆທ່ານຈົ່ງນອນຫລັບສະນິດແລະຝັນດີ ລາຕີສະວັດ.
ເບິ່ງວີດີໂອກ່ຽວກັບການໄຫລເຮືອໄຟ ສະຫລອງບຸນຄຣິສມາສ
ທີ່ລັດແມຣີແລນດ໌ ໃກ້ໆນະຄອນຫລວງວໍຊິງຕັນ:
