ທ່ານ Christie ກ່າວວ່າ ທ່ານບໍ່ມີສ່ວນ ໃນການອັດຫົນທາງ ເພື່ອແກ້ແຄ້ນ (ວີດີໂອ)

ຜູ້​ປົກຄອງ​ລັດ New Jersey ທ່ານ Chris Christie ທີ່ອາດ​ຈະ​
ລົງສະໝັກແຂ່ງ​ຂັນເອົາຕຳແໜ່ງປະທານາທິບໍດີໃນ​ປີ 2016 ນັ້ນ
ກ່າວ​ວ່າ ທ່ານ​ມີຄວາມ “ອັບອາຍ” ​ແລະ “ຜິດ​ຫວັງ” ໂດຍ​ບັນດາ​
ພະນັກງານ ຜູ້​ທີ່​ພາກັນຕັ້ງໃຈ ເຮັດ​ໃຫ້​ເກີດ​ການ​ຈາລະ​ຈອນ​ຕິດ​
ຄັດ​ຢ່າງ​ໃຫຍ່ ​ໃນ​ເດືອນ​ກັນຍາຜ່ານມາ.

ພວກຜູ້​ຊ່ວຍ ​ໄດ້​ສັ່ງ​ໃຫ້​ປິດ​ຫົນ​ທາງຫຼາຍເລນ ຢູ່​ຂົວ George
Washington ລະຫວ່າງ ນະຄອນ New York ​ແລະ​ລັດ New
Jersey ​ເພື່ອ​ເປັນ​ການ​ລົງ​ໂທດ ຕໍ່​ເຈົ້າ​ຄອງ​ກໍາ​ແພງ ສັງກັດ​ພັກ​
ເດ​ໂມ​ແຄ​ຣັດ ທີ່​ບໍ່​ໃຫ້ການ​ສະໜັບສະ​ໜູນຕໍ່ການ​ເລືອກ​ຕັ້ງເຂົ້າ
ຮັບຕຳແໜ່ງຕື່ມອີກ ຂອງທ່ານ Christie.

ຜູ້​ປົກຄອງ​ລັດ Christie ກ່າວໃນ​ວັນ​ພະຫັດ​ວານ​ນີ້​ຢູ່​ທີ່ກອງ​ປະຊຸມຖະແຫຼງ​ຂ່າວວ່າ ທ່ານ
​ບໍ່​ມີ​ສ່ວນ​ພົວພັນ​ໃດໆ ໃນ​ການ​ເຮັດໃຫ້ການຈາລະ​ຈອນ​ຕິດ​ຄັດ ແລະ​ຕົກ​ໃຈ​ໃນ​ຄວາມໂງ່
ຈ້າ​ດັ່ງກ່າວ.

ທ່ານ ກ່າວ​ວ່າ ​ມັນແມ່ນ​ຄວາມຮັບຜິດຊອບ​ຂອງ​ທ່ານ ຕໍ່​ສິ່ງ​ທີ່​ເກີດ​ຂື້ນ. ທ່ານ Christie ​
ໄດ້​ໄລ່​ຮ​ອງຫົວໜ້າທີ່ປຶກສາຂອງ​ທ່ານ ​ທີ່​ທ່ານ​ກ່າວ​ວ່າໄດ້ຕົວະ​ທ່ານ ກ່ຽວ​ກັບ​ພາກສ່ວນ​
ຂອງ​ນາງ ໃນຂ່າວນອງນັນນີ້ ​ແລະ​ທ່ານ​ໄດ້ຂໍ​ຮ້ອງ​ໃຫ້ຜູ້​ຊ່ວຍ​ອີກ​ຄົນ​ນຶ່ງ ​ລາ​ອອກຈາກ​
ໜ້າ​ທີ່.

ນອກນັ້ນ ທ່ານ Chritie ຍັງ​ໄດ້​ໄປ​ຢ້ຽມຢາມ ​ເພື່ອ​ຂໍ​ຂະ​ມາ​ໂທດ​ສ່ວນ​ໂຕ ​ຕໍ່​ເຈົ້າ​ຄອງ​ກໍາ
​ແພງ​ເມື​ອງ Fort Lee ໃນລັດ New Jersey ຊຶ່ງ​ເມືອງ​ຂອງ​ທ່ານໄດ້ປະສົບ​ກັບ​ສະພາບ
ການ​ຈາລະ​ຈອນ​ຕິດ​ຄັດຢ່າງຮ້າຍແຮງນັ້ນ.