ຈີນ ໄດ້ກ່າວໃນວັນຈັນມື້ນີ້ ວ່າ “ມີຄວາມເປັນຫ່ວງຢ່າງໃຫຽ່” ກ່ຽວກັບຄວາມເຫັນຂອງ ປະທານນາທິບໍດີສະຫະລັດ ທີ່ຫາກໍໄດ້ຮັບເລືອກ ທ່ານ Donald Trump ທີ່ວ່າ ສະຫະລັດຈະສືບຕໍ່ ນະໂຍບາຍ “ຈີນດຽວ” ຫຼືບໍ່ ນອກຈາກວ່າ ລັດຖະບານຈີນ ຈະສົມຍອມໃນເລື້ອງ ການແລກປ່ຽນສິນຄ້າ.
ໃນປີ 1979 ຄຳປະກາດເອກະສານຮ່ວມສະຫະລັດ ແລະຈີນນັ້ນ ສະຫະລັດຮັບຮູ້ວ່າ ປັກກິ່ງ ແມ່ນເປັນລັດຖະບານດຽວ ຂອງຈີນ ໂດຍທີ່ຈຸດຢືນຂອງຈີນກໍຄື ມີຈີນປະເທດດຽວ ແລະໄຕ້ຫວັນກໍເປັນພາກສ່ວນນຶ່ງຂອງປະເທດຈີນ.
ໂຄສົກຂອງກະຊວງການຕ່າງປະເທດ ໄດ້ກ່າວວ່າ ນະໂຍບາຍນັ້ນ ແມ່ນພື້ນຖານຂອງສາຍ ພົວພັນລະຫວ່າງສະຫະລັດກັບຈີນ ຊຶ່ງຊຸກຍູ້ໃຫ້ລັດຖະບນຂອງທ່ານ Trump “ເຂົ້າໃຈເຖິງບັນຫາທີ່ຮ້າຍແຮງ” ທີ່ວ່ານີ້.
ໜັງສືພິມ Global Times ທີ່ຄວບຄຸມໂດຍລັດຖະບານ ໄດ້ຖະແຫຼງເພີ່ມຕື່ມວ່າ ທ່ານ Trump ແມ່ນ “ແມ່ນບໍ່ຮູ້ຫຽັງແທ້ໆ” ທີ່ຄິດວ່າ ທ່ານຈະສາມາດໃຊ້ນະໂຍບາຍຂອງໄຕ້ຫວັນ ເປັນສິ່ງຕໍ່ລອງທາງເສດຖະກິດ ຊ່ຶງທ່ານ “ຈຳເປັນຕ້ອງໄດ້ຮຽນຮູ້ ໃນການຮັບມືກັບນະໂຍບາຍການຕ່າງປະເທດດ້ວຍຄວາມອ່ອນນ້ອມ.”
ນອກນັ້ນມັນຍັງໄດ້ສະເໜີແນະວ່າໃຫ້ ຖ້າ ທ່ານ Trump ສະໜັບສະໜຸນຄວາມເປັນເອກກະລາດຂອງໄຕ້ຫວັນ ຫຼື ການຊື້ຂາຍອາວຸດ ຈີນກໍບໍ່ມີເຫດຜົນອັນໃດທີ່ຈະເປັນພາຄີກັບວໍຊີງຕັນ ໃນນະໂຍບາຍການຕ່າງປະເທດ ທີ່ຈະສາມາດຊ່ອຍເຫຼືອທາງທະຫານ ເພື່ອຕໍ່ສູ້ກັບຄູ່ປໍລະປັກຂອງສະຫະລັດ.
ໃນຂະນະທີ່ໃຫ້ສຳພາດທາງໂທລະພາບ ກັບຊ່ອງ Fox ໃນວັນອາທິດວານນີ້ ທ່ານ
Trump ໄດ້ປົກປ້ອງໃນການໂອ້ລົມທາງໂທລະສັບຫວ່າງໝໍ່ໆມານີ້ ກັບປະທານາທິບໍດີ ທ່ານນາງ Tsai Ing-wen ຊຶ່ງເປັນການຕິດຕໍ່ພົວພັນທຳອິດຂອງຜູ້ນຳໄຕ້ຫວັນ ກັບປະທານນາທິບໍດີສະຫະລັດ ທີ່ຫາກໍໄດ້ຮັບເລືອກໃໝ່ ນັບຕັ້ງແຕ່ ປີ 1979 ຕອນທີ່ສະຫະລັດ
ຮັບຮູ້ວ່າໄຕ້ຫວັນ ແມ່ນສ່ວນນຶ່ີງຂອງຈີນນັ້ນ.
ນອກນັ້ນທ່ານຍັງໄດ້ກ່າວວ່າ ທ່ານບໍ່ຕ້ອງການໃຫ້ຈີນ ມາບອກເພິ່ນວ່າ ຄວນຈະເຮັດແນວນັ້ນແນວນີ້.
