ນາຍົກລັດຖະມົນຕີຈີນ ທ່ານ ເຫວິນ ເຈ້ຍບາວ ໄດ້ ບອກບັນດາສະມາ ຊິກສະພາແຫ່ງຂອງກຣີສວ່າ ກຸງ ປັກກິ່ງແມ່ນສະໜັບສະໜຸນເງິນຢູໂຣທີ່ທຸ່ນທ່ຽງ ແລະ ຈະບໍ່ລົດຈໍານວນພັນທະບັດຂອງຢູໂຣບ ທີ່ຕົນມີຢູ່ນັ້ນ ລົງແຕ່ຢ່າງໃດ.
ໃນຄໍາປາໃສຕໍ່ສະພາແຫ່ງຊາດຂອງກຣີສນັ້ນ ນາຍົກລັດ ຖະມົນຕີ ເຫວິນ ເຈ້ຍບາວ ກ່າວວ່າ ຈີນກໍາລັງດໍາເນີນງານເພື່ອປັບປຸງສະພາບແວດລ້ອມດ້ານການລົງທຶນຂອງ ຕົນ ພິທັກປົກປ້ອງຊັບສິນທາງປັນຍາ ແລະພັດທະການ ຮ່ວມມືກັນໃນດ້ານເທັກໂນໂລຈີ.
ວັນເສົາວານນີ້ ທ່ານເຫວິນ ໄດ້ພົບປະກັບທ່ານ George Papandreou ນາຍົກລັດຖະ ມົນຕີກຣີສ ໃນກຸງເອເທັນ ແລະຫລັງຈາກການພົບປະກັນ ທ່ານເຫວິນ ກໍໄດ້ປະກາດວ່າ ກຣີສເປັນປະເທດພາຄີ ທີ່ໜ້າເຊຶ່ອຖືຫລາຍທີ່ສຸດຂອງຈີນ ໃນພາກພື້ນຢຸໂຣບ.
ຜູ້ນໍາຈີນກ່າວວ່າ ກຸງປັກກິ່ງຈະຊື້ພັນທະບັດຂອງລັດຖະບານກຣີສ ເວລາໃດກຣີສເລີ່ມເອົາພັນທະບັດອອກຂາຍໃນຕະຫລາດສາກົນເພື່ອຫາເງິນມາຖົມຂຸມງົບປະມານອີກ. ນອກນີ້ ແລ້ວທ່ານເຫວິນຍັງໄດ້ເຊັນຂໍ້ຕົກລົງຫລາຍສະບັບທີ່ແນໃສ່ເພື່ອເສີມຂະຫຍາຍການຄ້າ ແລະ ຊ່ວຍຊຸກຍູ້ອຸດສາຫະກໍາການ ລໍາລຽງຂົນສົ່ງສິນຄ້າຂອງກຣີສນັ້ນນໍາ. ນາຍົກລັດຖະມົນຕີ ກຣີສໄດ່ກ່າວຂອບອົກຂອບໃຈຈີນ ສໍາລັບການສະໜັບສະໜຸນຂອງຈີນນັ້ນ ໂດຍເວົ້າວ່າ ຂໍ້ຕົກລົງຕ່າງໆທີ່ຫາກໍເຊັນກັນນັ້ນ ແມ່ນຈະສ້າງຜົນຮັບທີ່ສໍາຄັນ.
