ນາຍົກລັດຖະມົນຕີຈີນ ທ່ານ Li Keqiang ໄດ້ກ່າວໃນວັນພະຫັດ
ມື້ນີ້ວ່າ ເສດຖະກິດຂອງປະເທດ “ແມ່ນກຳລັງປະເຊີນກັບ
ຄວາມຫຍຸ້ງຍາກຫຼາຍໆປະການ ແລະ ພວມຖືກກົດດັນໄປໃນ
ທາງລົບ,” ແຕ່ກໍໄດ້ສະແດງອອກເຖິງຄວາມໝັ້ນໃຈວ່າ ເສດຖະກິດ
ຈະບໍ່ປະສົບ ໃນອັນທີ່ທ່ານເອີ້ນວ່າ “hard landing” ຫຼືການລົງ
ຈອດແບບແບບບໍ່ເປັນທ່ານັ້ນ.
ໃນການຖະແຫຼງການທີ່ກອງປະຊຸມເສດຖະກິດໂລກ ຫຼື World Economic Forum ໃນ ເມືອງ Dalian, ທ່ານ Li ໄດ້ກ່າວອ້າງເຖິງການຊັກຊ້າລົງຂອງເສດຖະກິດໂລກນັ້ນວ່າເປັນ ການທ້າທາຍຕໍ່ການເຕີບໂຕຂອງເສດຖະກິດຈີນ. ນອກນັ້ນທ່ານຍັງກ່າວວ່າ ເສດຖະກິດຈີນ “ແມ່ນຍັງຢູ່ໃນຂອບເຂດທີ່ສົມເຫດສົມຜົນ.”
ທ່ານ Li ກ່າວວ່າ: “ເສດຖະກິດຈີນແມ່ນຍັງຢູ່ໃນທ່າທີ່ດີໃນຂະນະທີ່ມັນຊັກຊ້າລົງ ໃນ
ຈັງຫວະໄປສູ່ການມີສະຖຽນລະພາບເພີ້ມຂຶ້ນ ບໍ່ແມ່ນວ່າ ບໍ່ມີຄວາມຫຍຸ້ງຍາກໃດໆ ແລະໂດຍພາບລວມໆແລ້ວ ມັນໄດ້ສະແດງອອກເຖິງໂອກາດຫຼາຍກວ່າການທ້າທາຍຕ່າງໆ.”
ນອກນັ້ນ ທ່ານຍັງໄດ້ສະແດງອອກເຖິງຄວາມໝັ້ນໃຈທີ່ວ່າ ຈີນ ຈະບັນລຸເປົ້າໝາຍທີ່ສຳຄັນ
ທາງເສດຖະກິດໃນປີນີ້.
ຄວາມເປັນຫວ່ງເປັນໃຍຕໍ່ການຊັກຊ້າລົງທາງດ້ານເສດຖະກິດຂອງຈີນ ຊຶ່ງເປັນເສດຖະກິດ
ທີ່ໃຫຍ່ທີສອງຂອງໂລກ ໄດ້ມີຜົນກະທົບຕໍ່ຕະຫຼາດຮຸ້ນໃນທົ່ວໂລກ ໃນຊ່ວງໄລຍະ 2-3 ເດືອນຜ່ານມານີ້ ໂດຍທີ່ດັດຊະນີຮຸ້ນຂອງຈີນເອງ ທີ່ນະຄອນຊຽງໄຮ້ ກໍໄດ້ຕົກລາຄາ 40% ນັບຕັ້ງແຕ່ເດືອນມິຖຸນາເປັນຕົ້ນມາ.
ໃນເດືອນແລ້ວນີ້ ຈີນຫລຸດຄ່າເງິນຢວນຂອງຕົນລົງ ຢ່າງບໍ່ຄາດຝັນ. ປັກກິ່ງ ໄດ້ກ່າວວ່າ
ການເອົາບາດກ້າວທີ່ວ່ານີ້ ແມ່ນມີຈຸດປະສົງເຮັດໃຫ້ເງິນຢວນ ໃຊ້ກັນຫຼາຍຂຶ້ນຢູ່ໃນຕະຫຼາດ ແຕ່ວ່າມີຄວາມເປັນຫວ່ງເປັນໃຍ ທີ່ສະແດງໃຫ້ເຫັນວ່າ ບັນດາຜູ້ນຳຈີນເປັນຫວ່ງເຖິງເລື້ອງ
ການເຕີບໂຕທີ່ຊັກຊ້າລົງນັ້ນໜ້ອຍຫຼາຍປານໃດ. ການເອົາບາດກ້າວທີ່ວ່ານີ້ຍັງໄດ້ຖືກຕິຕຽນ ຄັ້ງໃໝ່ຈາກພວກທີ່ເຄີຍໄດ້ກ່າວວ່າ ຈີນ ປັບປ່ຽນຄ່າເງິນຕາຂອງຕົນ.
ທ່ານ Li ໄດ້ກ່າວໃນວັນພະຫັດມື້ນີ້ວ່າ ຕົນຈະຮັກສາອັດຕາແລກປ່ຽນເງິນຕາ “ໃຫ້ຢູ່ໃນລະດັບທີ່ມີເຫດຜົນພຽງພໍແລະທຸ່ນທ່ຽງ.”
