ລັດຖະມົນຕີກະຊວງການຕ່າງປະເທດຂອງຈີນ ທ່ານຫວັງ ຢີ້ ເດີນທາງໄປຮອດກຳປູເຈຍໃນວັນອາທິດວານນີ້ ສໍາລັບການຢ້ຽມຢາມຢ່າງເປັນທາງການເປັນເວລາ 3 ວັນ ເພື່ອຢືນຢັນການຮັດແໜ້ນສາຍພົວພັນກັບພັນທະມິດທີ່ໃກ້ຊິດທີ່ສຸດ ຂອງປັກກິ່ງ ໃນຂົງເຂດເອເຊຍຕາເວັນອອກສຽງໃຕ້ແຫ່ງນີ້. ການຢ້ຽມຢາມຂອງ ທ່ານ ຫວັງ ແມ່ນຈຸດສຸດທ້າຍໃນການເດີນທາງຢ້ຽມຢາມ ສາມປະເທດ ຢູ່ໃນພາກພື້ນ ເຊິ່ງໄດ້ນຳພາທ່ານໄປຍັງ ອິນໂດເນເຊຍ ແລະ ປາປົວນິວກີເນຍ ອີກດ້ວຍ, ອີງຕາມລາຍງານຂອງອົງການຂ່າວ AP.
ທ່ານກໍາລັງດໍາເນີນການຢ້ຽມຢາມທ່າມກາງຄວາມກັງວົນຂອງຕ່າງປະເທດ ກ່ຽວກັບສອງໂຄງການຂະໜາດໃຫຍ່ທີ່ໄດ້ຮັບທຶນສະໜັບສະໜູນຈາກຈີນ ຢູ່ໃນກຳປູເຈຍ, ເຊິ່ງລວມມີແຜນການໃນການສ້າງຄອງນ້ຳ ແລະຖານທັບເຮືອ ທີ່ບັນດານັກວິຈານພາກັນກ່າວຫາວ່າ ສາມາດຊ່ວຍສ້າງຜົນປະໂຫຍດດ້ານຍຸດທະສາດການທະຫານຂອງປັກກິ່ງຢູ່ໃນຂົງເຂດເອເຊຍຕາເວັນອອກສຽງໃຕ້ ໄດ້.
ຈີນ ແມ່ນພັນທະມິດ ແລະເປັນຜູ້ອຸປະກາລະທີ່ສໍາຄັນທີ່ສຸດຂອງກຳປູເຈຍ ໂດຍມີອິດທິພົນທີ່ເຂັ້ມແຂງຕໍ່ເສດຖະກິດຂອງປະເທດດັ່ງກ່າວ ເຊິ່ງໄດ້ສະແດງໃຫ້ເຫັນຫຼາຍໆໂຄງການທີ່ໄດ້ຮັບທຶນຈາກຈີນ ໂດຍສະເພາະແມ່ນດ້ານພື້ນຖານໂຄງລ່າງ ອັນລວມມີ ສະໜາມບິນ ແລະຖະໜົນຫົນທາງ, ແຕ່ກໍຍັງລວມມີໂຄງການຕ່າງໆຂອງເອກະຊົນເຊັ່ນ ດ້ານໂຮງແຮມ, ກາສິໂນ ແລະການພັດທະນາອະສັງຫາລິມະຊັບອື່ນໆ. ຫຼາຍກວ່າ 40 ເປີເຊັນຂອງໜີ້ສິນຕ່າງປະເທດຈໍານວນ 10 ຕື້ໂດລາຂອງ ກຳປູເຈຍ ແມ່ນເປັນໜີ້ ຈີນ.
ທ່ານ ຫວັງ ມີກຳນົດຈະມີການພົບປະແຍກກັນກັບນາຍົກລັດຖະມົນຕີ ທ່ານຮຸນ ມາເນດ ແລະພໍ່ຂອງທ່ານ, ທ່ານຮຸນ ເຊັນ, ເຊິ່ງປັດຈຸບັນ ດຳລົງຕຳແໜ່ງເປັນປະທານສະພາສູງ ລຸນຫຼັງດຳລົງຕຳແໜ່ງເປັນຫົວໜ້າລັດຖະບານຂອງກຳປູເຈຍມາເປັນເວລາ 38 ປີ ຈົນມາຮອດຍາມທີ່ທ່ານໄດ້ລາອອກຈາກຕຳແໜ່ງໃນປີແລ້ວນີ້ ເພື່ອໃຫ້ລູກຊາຍຂອງທ່ານ ສືບທອດຕໍາແໜ່ງຕໍ່ຈາກທ່ານ. ທ່ານ ຫວັງ ຍັງໄດ້ເຂົ້າເຝົ້າກະສັດ ໂນໂຣດົມ ສີຫາໂມນີ ອີກດ້ວຍ.
ທ່ານ ຮຸນ ມາເນດ ບໍ່ໄດ້ສະແດງໃຫ້ເຫັນສັນຍານໃດໆກ່ຽວກັບການແປປ່ຽນນະໂຍບາຍການຕ່າງປະເທດທີ່ສະໜັບສະໜູນປັກກິ່ງຈາກບິດາ. ໃນເດືອນສິງຫາປີ 2023, ທ່ານ ຫວັງ ໄດ້ເດີນທາງໄປຢ້ຽມຢາມກຳປູເຈຍ ພຽງບໍ່ເທົ່າໃດມື້ຫຼັງຈາກ ທ່ານ ຮຸນ ເຊັນ ປະກາດວ່າທ່ານຈະລາອອກຈາກຕຳແໜ່ງນາຍົກລັດຖະມົນຕີ ເພື່ອສະໜັບສະໜູນລູກຊາຍກົກຂອງທ່ານ.
ຟໍຣັມສະແດງຄວາມຄິດເຫັນ