ເອກອັກຄະລັດຖະທູດ ຈີນ ປະຈຳ ສະຫະລັດ ກ່າວວ່າ ການກ່າວຫາຫຼາຍຢ່າງຂອງລັດ
ຖະບານ ທຣຳ ຕໍ່ ປັກກິ່ງ ແມ່ນ “ບໍ່ມີມູນຖານ”, ລວມທັງການແຊກແຊງການເລືອກຕັ້ງ
ນຳ.
ເອກອັກຄະລັດຖະທູດ ຊຸຍ ທຽນໄກ ໄດ້ກ່າວຕໍ່ໂທລະພາບ ຟັອກສ໌ ໃນວັນອາທິດວານ
ນີ້ວ່າ “ນຶ່ງໃນບັນດາກົດເກນພື້ນຖານຂອງນະໂຍບາຍການຕ່າງປະເທດຂອງ ຈີນ ແມ່ນ
ການບໍ່ແຊກແຊງເຂົ້າໃນບັນຫາພາຍໃນຂອງປະເທດອື່ນ. ພວກເຮົາໄດ້ຍຶດໝັ້ນ ໃນຫຼັກ
ເກນນີ້ມາຕະຫຼອດ. ພວກເຮົາມີປະຫວັດທີ່ດີຫຼາຍ.”
ໂດຍປາສະຈາກການສະແດງຫຼັກຖານ ທີ່ເປັນຕົວເປັນຕົນຂອງການແຊກແຊງເຂົ້າໃນ
ການເລືອກຕັ້ງໂດຍ ຈີນ ນັ້ນ, ທຳນຽບຂາວ ໄດ້ກ່າວຫາ ຈີນ ວ່າ ພະຍາຍາມທີ່ຈະຫັນ
ເຫພວກຜູ້ລົງຄະແນນສຽງ ໄປຈາກພັກຣີພັບບລີກັນໃນການເລືອກຕັ້ງຂອງເດືອນໜ້າ
ນີ້.
ເຂົາເຈົ້າຍັງໄດ້ເອີ້ນວ່າ ໜັງສືພິມ China Daily ໄດ້ລົງໂຄສະນາຊວນເຊື່ອຂອງໜັງສື
ພິມ ສະຫະລັດ ຫຼາຍສະບັບດ້ວຍ.
ທ່ານ ຊຸຍ ໄດ້ເອີ້ນພາກສ່ວນຂອງໜັງສືພິມນັ້ນວ່າ ຮຽນແບບເອົາກົນໄກຂອງສື່ມວນຊົນ
ສະຫະລັດ, ເປັນການຊື້ເອົາໜ້າໂຄສະນາໃນໜັງສືພິມ ເພື່ອເຮັດໃຫ້ວິໄສທັດຂອງຄົນຜູ້
ນຶ່ງເປັນທີ່ຮັບຮູ້.
ທ່ານຍັງໄດ້ປະຕິເສດການເຮັດສົງຄາມການຄ້າລະຫວ່າງ ສະຫະລັດ ກັບ ຈີນ, ເຖິງແມ່ນ
ຈະມີການຕອບໂຕ້ກັນໄປມາ ກ່ຽວກັບ ການວາງພາສີຂະໜາດໃຫຍ່ ໃສ່ສິນຄ້າສົ່ງອອກ
ຂອງກັນ ແລະ ກັນ ກໍຕາມ.
ທ່ານກ່າວວ່າ ປະຊາຊົນ ອາເມຣິກັນ ຕ້ອງເບິ່ງໃນ “ຮູບໂດຍລວມ,” ໂດຍຊີ້ໃຫ້ເຫັນວ່າ
ບັນດາບໍລິສັດ ສະຫະລັດ ຫາເງິນໄດ້ຫຼາຍຊ່ຳໃດໃນ ຈີນ ໃນຫຼາຍປີທີ່ຜ່ານມາ.
ທ່ານເອກອັກຄະລັດຖະທູດ ຍັງໄດ້ປະຕິເສດວ່າ ຈີນ ບໍ່ໄດ້ລັກຊັບສິນທາງປັນຍາຈາກ
ສະຫະລັດ, ບໍ່ເທົ່າໃດວັນ ຫຼັງຈາກເຈົ້າໜ້າທີ່ສືບລັບອາວຸໂສຂອງ ຈີນ ໄດ້ຖືກສົ່ງຕົວໃຫ້ ສະຫະລັດ ຍ້ອນການກ່າວຫາວ່າ ພະຍາຍາມຈະລັກຂໍ້ມູນລັບຈາກບັນດາບໍລິສັດການ
ບິນ ອາເມຣິກັນ.
