ບໍລິສັດຈີນຫຼາຍບໍລິສັດ ຊະນະການປະມູນ 4 ຄັ້ງ ເພື່ອຂຸດຄົ້ນບໍ່ນໍ້າມັນ ແລະອາຍແກັສຂອງ ອີຣັກ, ອີງຕາມການກ່າວຂອງລັດຖະມົນຕີນ້ໍາມັນຂອງອີຣັກ ໃນວັນອາທິດວານນີ້ ຂະນະທີ່ຮອບການອອກໃບອະນຸຍາດຂຸດຄົ້ນ ໄຮໂດຼຄາບອນ (hydrocarbon) ຂອງປະເທດຕາເວັນອອກກາງແຫ່ງນີ້ ສືບຕໍ່ໄປ ເປັນມື້ທີສອງແລ້ວ, ອີງຕາມລາຍງານຂອງອົງການຂ່າວ Reuters.
ໃບອະນຸຍາດນ້ຳມັນ ແລະ ອາຍແກັສ ສຳລັບ 29 ໂຄງການ ແມ່ນມີເປົ້າໝາຍເພື່ອແນໃສ່ຍົກລະດັບການຜະລິດສໍາລັບນຳໃຊ້ພາຍໃນປະເທດ, ໂດຍມີຫຼາຍກວ່າ 20 ບໍລິສັດທີ່ຜ່ານຮອບຄັດເລືອກ ໃນກ່ອນໜ້ານັ້ນ ລວມມີກຸ່ມ ປະເທດຢູໂຣບ, ຈີນ, ອາຣັບ ແລະ ອີຣັກ.
ບໍລິສັດຂອງຈີນ ເປັນພຽງບໍລິສັດຕ່າງປະເທດດຽວ ທີ່ຊະນະການປະມູນຄັ້ງນີ້, ໂດຍປະມູນໄດ້ 9 ບໍ່ນໍ້າມັນ ແລະອາຍແກັສ ນັບຕັ້ງແຕ່ ວັນເສົາທີ່ຜ່ານມາ, ໃນຂະນະທີ່ບໍລິສັດ KAR Group ຂອງອີຣັກເຊື້ອສາຍເຄີດ ປະມູນໄດ້ 2 ແຫ່ງ.
ສັງເກດເຫັນວ່າ ບໍ່ມີບັນດາບໍລິສັດນ້ຳມັນເຊື້ອໄຟຂະໜາດໃຫຍ່ຂອງສະຫະລັດເຂົ້າຮ່ວມໃນການປະມູນຄັ້ງນີ້, ແມ່ນແຕ່ພາຍຫຼັງທີ່ນາຍົກລັດຖະມົນຕີອີຣັກ ທ່ານໂມຮໍາເມັດ ເຊຍ (Mohammed Shia) ໄດ້ທໍາການພົບປະກັບບັນດາຜູ້ຕາງໜ້າບັນດາບໍລິສັດຕ່າງໆຂອງສະຫະລັດ ໃນການຢ້ຽມຢາມ ສະຫະລັດຢ່າງເປັນທາງການໃນເດືອນແລ້ວນີ້ ກໍຕາມ.
ບໍລິສັດນ້ຳມັນນອກຊາຍຝັ່ງທະເລແຫ່ງຊາດຂອງຈີນ ຫຼື CNOOC ແລະ ອີຣັກ ໄດ້ຊະນະການປະມູນເພື່ອພັດທະນາ Block 7 ຂອງອີຣັກ ສຳລັບການຂຸດຄົ້ນນ້ຳມັນທີ່ຂະຫຍາຍໄປທົ່ວບັນດາແຂວງທາງພາກກາງ ແລະພາກໃຕ້ຂອງປະເທດ ເຊັ່ນ: ແຂວງດິວານິຢາ (Diwaniya), ບາບີລ (Babil), ນາຈາຟ (Najaf), ວາສິດທ໌ (Wasit) ແລະ ແຂວງມູທານນາ (Muthanna), ອີງຕາມການກ່າວຂອງລັດຖະມົນຕີກະຊວງນ້ຳມັນ ທ່ານຮາຢານ ອັບດູລ ການີ (Hayan Abdul Ghani).
ບໍລິສັດ ເຊັນຮົວ (ZhenHua), ແອນຕັນ ເຊິ່ງເປັນບໍລິສັດບໍລິການດ້ານສະໜາມບໍ່ນໍ້າມັນ (Anton Oilfield Services and Sinopec) ແລະ ໄຊໂນແພັກ (Sinopec) ກໍໄດ້ຊະນະການປະມູນ ເພື່ອດໍາເນີນການຂຸດຄົ້ນບໍ່ນໍ້າມັນ ອະບູ ເຄມະ (Abu Khaymah) ໃນແຂວງ ມູທານນາ, ບໍ່ນໍ້າມັນ ດູຟຣີຢາ (Dhufriya) ໃນເມືອງ ວາຊິດທ໌ (Wasit) ແລະບໍ່ນໍ້າມັນ ຊໍາເມີ ໃນແຂວງ ມູທານນາ ຕາມລໍາດັບ, ອີງຕາມການກ່າວຂອງທ່ານລັດຖະມົນຕີ.
ຟໍຣັມສະແດງຄວາມຄິດເຫັນ