ບັນດາເຈົ້າໜ້າທີ່ກ່າວວ່າ ມີ 4 ຄົນເສຍຊີວິດແລະຫລາຍໝື່ນຄົນໄດ້ຖືກອົບພະຍົບໜີຈາກພາກຕາເວັນອອກສຽງເໜືອຂອງຈີນ ຫລັງຈາກ ຝົນຕົກໜັກພາໃຫ້ແມ່ນໍ້າ Yalu ຖ້ວມລົ້ນຝັ່ງ.
ອົງການຂ່າວຊິນຫົວຂອງທາງການຈີນ ກ່າວໃນວັນອາທິດມື້ນີ້ວ່າ ຜົວເມຍຄູ່ນຶ່ງ ໃນໄວ 70 ປີແລະແມ່ກັບລູກຊາຍຢູ່ໃນເມືອງ Dandong ເສຍຊີວິດໄປ ເວລາເຮືອນຂອງພວກເຂົາເຈົ້າຖືກນໍ້າພັດໄຫລໜີໄປ.
ປະຊາຊົນຈໍານວນຫລາຍກວ່າ 94 ພັນຄົນໄດ້ຖືກອົບພະຍົບອອກໄປ ຈາກເມືອງດັ່ງກ່າວ.
ສູນກາງພະຍາກອນອາກາດແຫ່ງຊາດເຕືອນໃນວັນອາທິດມື້ນີ້ວ່າ ຄາດ ວ່າຝົນຈະຕົກແຮງຕື່ມອີກຢ່າງນ້ອຍ 24 ຊົ່ວໂມງ ໃນຂົງເຂດດັ່ງກ່າວ.
ສ່ວນຢູ່ທີ່ເກົາຫລີເໜືອນັ້ນ ອົງການຂ່າວ KCNA ຂອງທາງການລາຍງານວ່າ ເກີດຄວາມ ເສຍຫາຍຢ່າງໜັກໃນເມືອງ Sinuiju ຢູ່ກົງກັນ ຂ້າມກັບເມືອງ Dandong ຂອງຈີນນັ້ນ. ອົງການຂ່າວດັ່ງກ່າວເວົ້າວ່າ ໂຕເມືອງແລະປະຊາຄົມກະເສດແຫ່ງຕ່າງໆໃນເຂດອ້ອມແອ້ມ ໄດ້ຮັບຜົນກະທົບຢ່າງໜັກ ແລະວ່າພວກທະຫານແລະພົນລະເຮືອນໄດ້ຮ່ວມກັນປະກອບ ສ່ວນໃນຄວາມພະຍາຍາມຊ່ອຍກູ້ໄພໃນຄັ້ງນີ້.
ສື່ມວນຊົນຂອງທາງການເກົາຫລີເໜືອກ່າວວ່າ ປະຊາຊົນຈໍານວນຫລາຍກວ່າ 5 ພັນຄົນ ໄດ້ຖືກອົບພະຍົບອອກຈາກເຂດດັ່ງກ່າວ.
