ບັນດາເຈົ້າໜ້າທີ່ເກົາຫລີໃຕ້ກ່າວວ່າ ລັດຖະມຸນຕີຕ່າງ
ປະເທດຈີນ ທ່ານ Yang Jiechi ໄດ້ສະແດງຄວາມ
ເປັນຫ່ວງອອກມາ ກ່ຽວກັບຄວາມປາດຖະໜາຢາກມີ
ອາວຸດນີວເຄລຍຂອງເກົາຫລີເໜືອນັ້ນ ແລະໃຫ້ຄໍາໝັ້ນ
ສັນຍາທີ່ຈະທໍາການປຶກສາຫາລືກັນຢ່າງໃກ້ຊິດກັບກຸງໂຊລ
ກ່ຽວກັບໂຄງການຍົກລະດັບທາດຢູເຣນຽມຂອງກຸງພຽງຢາງ.
ແຕ່ບໍ່ມີຮ່ອງຮອຍໃດໆໃນລະຫວ່າງການຢ້ຽມຢາມເກົາຫລີ
ໃຕ້ຂອງທ່ານ Yang ໃນວັນພຸດມື້ນີ້ ທີ່ສະແດງໃຫ້
ເຫັນວ່າ ທາງກຸງປັກກິງໄດ້ຜ່ອນຄາຍການຄັດຄ້ານຂອງຕົນ
ຕໍ່ລາຍງານສະບັບນຶ່ງຂອງສະຫະປະຊາຊາດທີ່ບັນລະຍາຍໂຄງການດັ່ງກ່າວຂອງເກົາຫລີ
ເໜືອ ວ່າເປັນການລະເມີດຢ່າງຮ້າຍແຮງຕໍ່ການລົງໂທດຂອງສະຫະປະຊາຊາດນັ້ນ.
ຄາດວ່າ ຈີນຈະຂັດຂວາງຕໍ່ການຈັດພິມລາຍງານຂອງສະຫະປະຊາຊາດສະບັບນີ້ ເວລາ
ເລື້ອງນີ້ຖືກຍົກຂຶ້ນມາສົນທະນາກັນ ໂດຍຄະນະກໍາມະການນຶ່ງຂອງສະພາຄວາມໜັ້ນຄົງ
ສະຫະປະຊາຊາດໃນຕອນບ່າຍໆວັນພຸດມື້ນີ້. ປັກກິງເຄີຍກ່າວມາກ່ອນແລ້ວວ່າ ໂຄງການ
ດັ່ງກ່າວຊຶ່ງສາມາດເຮັດໃຫ້ເກົາຫລີເໜືອມີເຊື້ອໄຟສໍາລັບຜະລິດອາວຸດນີວເຄລຍໄດ້ນັ້ນ
ຄວນຈະຍົກມາໂອ້ລົມສົນທະນາກັນໃນການເຈລະຈາ 6 ຝ່າຍ ທີ່ໄດ້ຕົກຢູ່ໃນສະພາບບໍ່ໄປ
ບໍ່ມາ ດົນກວ່າ 2 ປີມາແລ້ວນັ້ນ.
ທ່ານ Yang ທີ່ໄດ້ພົບປະກັບປະທານາທິບໍດີເກົາຫລີໃຕ້ ທ່ານ Lee Myung-bak
ແລະລັດຖະມຸນຕີຕ່າງປະເທດ Kim Sung-hwan ນັ້ນ ໄດ້ກ່າວໃນການຖະແຫລງ
ຢ່າງເປີດເຜີຍຂອງທ່ານຄັ້ງດຽວນັ້ນວ່າ ຈີນຈະດໍາເນີນງານເພື່ອໃຫ້ມີການເປີດການ
ເຈລະຈາ 6 ຝ່າຍນັ້ນ ຄືນອີກ