ນາຍົກລັດຖະມົນຕີຫວຽດນາມ ທ່ານ Nguyen Xuan Phuc ໄດ້ເລີ້ມການເດີນທາງຂອງທ່ານ ຢ່າງເປັນທາງການ ໄປຢ້ຽມຢາມບັນດາເຈົ້າໜ້າທີ່ຈີນ ໃນນະຄອນປັກກິ່ງ ວັນຈັນວານນີ້ ທ່າມກາງຄວາມເຄັ່ງຕືງກ່ຽວກັບເຂດນໍ້າແດນດິນ ທີ່ມີບັນຫາຂັດແຍ້ງກັນໃນທະເລຈີນໃຕ້.
ການຢ້ຽມຢາມຈີນຢ່າງເປັນທາງການຄັ້ງທຳອິດຂອງນາຍົກລັດຖະມົນຕີຫວຽດ ນາມ ທ່ານ Phuc ໃນຮອບຫົກປີ ໄດ້ມີຂຶ້ນຈາກການເຊີນໂດຍຄູ່ຕຳແໜ່ງຝ່າຍຈີນ ທ່ານ Li Keqiang. ສື່ມວນຍຊົນຫວຽດນາມ ແລະຈີນ ກຳລັງລາຍງານວ່າ ທ່ານ Phuc ແລະທ່ານ Li ຮ່ວມກັນທີ່ຈະປະກາດ “ການຄຸ້ມຄອງຄວາມແຕກຕ່າງທາງທະເລ” ແລະ “ຮັກສາສັນຕິພາບ ແລະສະຖຽນລະພາບ” ຢູ່ທີ່ກອງປະຊຸມນນັກຂ່າວໃນວັນຈັນວານນີ້ ທີ່ຕິດຕາມມາດ້ວຍການສົນທະນາຢ່າງກວ້າງຂວາງ ຢູ່ທີ່ຫໍສາລາປະຊາຊົນ.
ການຢ້ຽມຢາມຂອງທ່ານ Phuc ບັງເອີນມີຂຶ້ນໃນຂະນະທີ່ການຊ້ອມລົບປະຈຳປີຂອງກອງທັບເຮືອຈີນແລະຣັດເຊຍ ຊື່ງອິງຕາມເຈົ້າໜ້າທີ່ຈີນແລ້ວ ຈະຮ່ວມທັງການເຝິກແອບ “ຍືດ ແລະຄວບຄຸມ” ບັນດາໝູ່ເກາະດອນທີ່ຂັດແຍ້ງກັນ. ໂຄສົກກະຊວງຕ່າງປະເທດ ທ່ານ Hua Chunying ກ່າວວ່າ ການເຝິກ ຊ້ອມບໍ່ໄດ້ “ຕໍ່ຕ້ານພາກສ່ວນທີ່ສາມ.”
ໂຄສົກກະຊວງຕ່າງປະເທດສະຫະລັດ ທ່ານ John Kirby ໄດ້ຖະແຫລງກ່ຽວກັບ ການຊ້ອມລົບຈີນ-ຣັດເຊຍ ໃນວັນຈັນວານນີ້ ໂດຍກ່າວວ່າ ສະຫະລັດ ບໍ່ເຫັນວ່າເຂົາເຈົ້າໄດ້ຂົ່ມຂູ່. ທ່ານກ່າວວ່າ “ສິ່ງດຽວທີ່ພວກເຮົາຄິດກ່ຽວກັບເລື້ອງນີ້ກໍຄື ການຊ້ອມລົບສົມຄວນທີ່ຈະອີງຕາມກົດໝາຍສາກົນ ບໍ່ແມ່ນເພີ້ມຄວາມເຄັ່ງຕືງ.”
