ຈີນເວົ້າວ່າ ຕົນໄດ້ສ້າງຕັ້ງສະພາເທດສະບານຂຶ້ນສໍາລັບເມືອງນຶ່ງທີ່ຫາກໍ່ຕັ້ງຂຶ້ນໃໝ່ໆ
ຢູ່ໃນເຂດທີ່ມີການຂັດແຍ້ງກັນ ຢູ່ທະເລຈີນໃຕ້ນັ້ນ ແລະໄດ້ອະນຸມັດໃຫ້ມີການຕັ້ງຄ້າຍ
ທະຫານຂຶ້ນ ຢູ່ໃນເຂດນັ້ນ.
ໃນລາຍງານຂ່າວທີ່ພິມເຜີຍແຜ່ໃນວັນອາທິດວານນີ້, ອົງການຂ່າວຊິນຫົວຂອງທາງການ
ຈີນເວົ້າວ່າ ປະຊາຊົນ 1,100 ຄົນ ທີ່ອາໃສຢູ່ໃນເກາະສາມແຫ່ງທີ່ພາສາຈີນເອີ້ນວ່າ Xisha,
Zhongsha, Nansha ນັ້ນ ໄດ້ເລືອກຕັ້ງເອົາຜູ້ແທນ 45 ຄົນ ເຂົ້າປະຈໍາສະພາປະຊາຊົນ
ຂອງເຂດເທດສະບານດັ່ງກ່າວ. ບັນດາເກາະເຫລົ່ານີ້ ແມ່ນເປັນພາກສ່ວນນຶ່ງຂອງເມືອງ
ໃໝ່ ທີ່ຊື່ວ່າ Sansha ແລະຫ້ອງການສະພາ ຈະຕັ້ງຢູ່ໃນເກາະແຫ່ງນຶ່ງທີ່ຈີນໃຫ້ຊື່ວ່າ
Yongxing ຊຶ່ງພາສາອັງກິດເອີ້ນວ່າ ເກາະ Woody.
ອົງການຂ່າວຊິນຫົວລາຍງານອີກວ່າ ຄະນະກໍາມາທິການທະຫານສູນກາງຂອງຈີນ ໄດ້ ອະນຸຍາດໃຫ້ມີການສ້າງຕັ້ງກອງບັນຊາການຂອງທະຫານຮັກສາການ ຂຶ້ນທີ່ເມືອງ
Sansha ທີ່ຈະຮັບຜິດຊອບເລື້ອງ “ການປ້ອງກັນປະເທດ” ແລະ “ການປະຕິບັດງານ
ຂອງທະຫານ”.
ລັດຖະບານຈີນໄດ້ປະກາດການສ້າງຕັ້ງເມືອງ Sansha ໃນເດືອນແລ້ວນີ້ ໂດຍໄດ້ເວົ້າວ່າ ບົດບາດຂອງຫົວເມືອງດັ່ງກ່າວແມ່ນການບໍລິຫານໝູ່ເກາະ Paracel ແລະSpratly ທີ່
ມີການຂັດແຍ້ງກັນຢູ່ນັ້ນ ແລະເຂດນ່ານນໍ້າອ້ອມແອ້ມທະເລຈີນໃຕ້ ທີ່ເຊື່ອກັນວ່າມີບໍ່ນໍ້າມັນ ແລະອາຍແກັສທໍາມະຊາດນັ້ນ. ບຣູໄນ, ຈີນ, ມາເລເຊຍ, ຟີລິບປິນ, ໄຕ້ຫວັນ ແລະຫວຽດ
ນາມ ຕ່າງກໍໄດ້ ອ້າງເອົາກໍາມະສິດທັງໝົດ ຫລືບໍ່ ກໍສ່ວນໃດສ່ວນນຶ່ງຂອງເກາະເຫລົ່ານີ້.
ຢູ່ໃນຄໍາຖະແຫລງສະບັບນຶ່ງອອກມື້ວັນເສົາຜ່ານມານັ້ນ ລັດຖະບານຫວຽດນາມ ເວົ້າວ່າ
ຕົນຄັດຄ້ານຕໍ່ການສ້າງຕັ້ງເມືອງ Sansha ແລະໄດ້ເອີ້ນການເຄື່ອນ ໄຫວດັ່ງກ່າວວ່າ ເປັນ “ການລະເມີດຢ່າງຮຸນແຮງ” ຕໍ່ອໍານາດອະທິປະໄຕຂອງ ລັດຖະບານຮາໂນ່ຍ ໃນໝູ່ເກາະ
Paracel ແລະ Spratly ນັ້ນ ໂດຍອ້າງວ່າ ໝູ່ເກາະເຫລົ່ານັ້ນເປັນສ່ວນນຶ່ງຂອງເມືອງດາໜັງ ແລະແຂວງແຄັງຮົວ ຕາມລໍາ ດັບ. ວິທະຍຸແຫ່ງຊາດ Voice of Vietnam ຫລື ສຽງຂອງ
ຫວຽດນາມ ໄດ້ ອ້າງເຖິງຄໍາເວົ້າຂອງພວກເຈົ້າໜ້າທີ່ໃນເມືອງດາໜັງ ແລະແຂວງແຄັງຮົວ
ທີ່ເວົ້າວ່າ ລັດຖະບານກຸງປັກກິ່ງ ແມ່ນກໍາລັງສ່ຽງຕໍ່ການທໍາລາຍມິດຕະພາບ ລະຫວ່າງ
ສອງປະເທດ ທີ່ເປັນເພື່ອນບ້ານກັນນັ້ນ.
