ຈີນກ່າວວ່າ ຕົນໄດ້ປ່ອຍຊາວປະມົງຫວຽດນາມ 21 ຄົນທີ່ຖືກຈັບເມື່ອນຶ່ງເດືອນກວ່າໆຜ່ານ
ມາໃນບໍລິເວນທະເລຈີນໃຕ້ທີ່ມີການຂັດແຍ້ງກັນ.
ອົງການຂ່າວຊິນຫົວຂອງທາງການຈີນລາຍງານໃນວັນສຸກວານນີ້ວ່າ ຊາວປະມົງຫວຽດນາມ
ເຫຼົ່ານີ້ໄດ້ຖືກປ່ອຍຫຼັງຈາກໄດ້ເຊັນຊື່ໃນໃບຄໍ້າປະກັນ ຊຶ່ງຊິນຫົວເວົ້າວ່າໃບຄໍ້າປະກັນດັ່ງກ່າວ
ແມ່ນການໃຫ້ຄຳໝັ້ນສັນຍາວ່າຈະບໍ່ລ່ວງລະເມີດເຂົ້າໄປໃນເຂດນໍ້າແດນດິນທາງທະເລຂອງ
ຈີນ ໂດຍສະເພາະແລ້ວແມ່ນການປະມົງຢູ່ໃນເຂດນ່ານນໍ້າຂອງຈີນ.
ຊາວປະມົງຫວຽດນາມເຫຼົ່ານີ້ໄດ້ຖືກຈັບໃນຕົ້ນເດືອນມີນາ ໃກ້ໆບໍລິເວນໝູ່ເກາະ Paracel
ທີ່ຄວບຄຸມໂດຍຈີນ ແຕ່ອ້າງກຳມະສິດໂດຍຫວຽດນາມ.
ການປ່ອຍໂຕຊາວປະມົງຫວຽດນາມມີຂຶ້ນຂະນະທີ່ປັກກິ່ງພວມປະເຊີນໜ້າກັບຟີລິບປິນຢູ່ໃນ
ອີກເຂດນຶ່ງທີ່ຍັງເປັນບັນຫາຂັດແຍ້ງໃນທະເລຈີນໃຕ້.
ຈີນໄດ້ຢືນຢັນຢ່າງແຂງຂັນກວ່າເກົ່າກ່ຽວກັບການອ້າງເອົາກຳມະສິດໃນເຂດແດນທາງທະເລ
ທີ່ອາດອຸດົມສົມບູນໄປດ້ວຍພະລັງງານ ໃນບໍລິເວນທະເລຈີນໃຕ້ ໂດຍໄດ້ເຂົ້າສະກັດກັ້ນຂັດ
ຂວາງເປັນປະຈຳຕໍ່ພວກເຮືອປະມົງແລະເຮືອສຳຫຼວດນໍ້າມັນຂອງຕ່າງປະເທດ.
ປັກກິ່ງຢືນຢັດວ່າ ເຂດທະເລຈີນໃຕ້ທັງໝົດທີ່ມີພື້ນທີ່ 3 ລ້ານ 5 ແສນກິໂລແມັດມົນທົນນັ້ນ
ເປັນສ່ວນນຶ່ງຂອງດິນແດນຕົນ. ຟີລິບປິນ ມາເລເຊຍ ບຣູນາຍ ແລະ ໄຕ້ຫວັນກໍອ້າງກຳມະ
ສິດເອົາບາງເຂດຂອງທະເລດັ່ງກ່າວນີ້.