ສົງຄາມການຄ້າລະຫວ່າງອາເມຣິກາແລະຈີນ ຈະເພີ່ມອິດທິພົນຂອງເງິນຢວນຈີນໃນອາຊຽນ. ເພາະວ່າສົງຄາມການຄ້າຈະບັງຄັບໃຫ້ຈີນຕ້ອງຂະຫຍາຍການຄ້າແລະການລົງທຶນເຂົ້າມາໃນອາຊຽນເພິ່ມຂຶ້ນ.
ຜູ້ຊ່ຽວຊານທາງດ້ານເສດຖະກິດໃນອາຊຽນໃຫ້ທັດສະນະວ່າສົງຄາມການຄ້າລະຫວ່າງອາເມຣິກາກັບຈີນທີ່ມີທ່າອ່ຽງຈະແຜ່ລາມອອກໄປຢ່າງບໍ່ຢຸດຢັ້ງນັ້ນ ຈະສົ່ງຜົນດີຕໍ່ປະເທດສະມາຊິກອາຊຽນ ໃນຖານະທີ່ເປັນຄູ່ຄ້າທີ່ສໍາຄັນທັງກັບຈີນແລະສະຫະລັດ ເພາະສົງຄາມການຄ້າດັ່ງກ່າວ ຈະເຮັດໃຫ້ຫຼາຍບໍລິສັດຍ້າຍຖານການຜະລິດຈາກຈີນເຂົ້າມາໃນອາຊຽນ ເພື່ອສົ່ງຜະລິດຕະພັນໄປສະຫະລັດໃນນາມອາຊຽນ ພ້ອມກັນນັ້ນ ການລົງທຶນຂອງຈີນໃນອາຊຽນທີ່ເພີ່ມຂຶ້ນນັ້ນ ກໍຍັງເປັນໂອກາດອັນສຳຄັນທີ່ເງິນຢວນຂອງຈີນຈະໄດ້ເສີມສ້າງອິດທິພົນໃນການພົວພັນທາງດ້ານການເງິນກັບອາຊຽນເພິ່ມຂື້ນອີກດ້ວຍ ດັ່ງທີ່ຜູ້ຊ່ຽວຊານ ໄດ້ໃຫ້ການຢືນຢັນວ່າ
“ໂອກາດທີ່ຈະປະເຊີນໜ້າກັນ ຄວາມຂັດແຍ້ງກັນລະຫວ່າງອາເມລິກາກັບຈີນ ຈະບໍ່ມີການປ່ຽນແປງແຕ່ຢ່າງໃດ. ສອງປະເທດນີ້ ຍັງຈະສືບຕໍ່ເປັນຄູ່ແຂ່ງທາງຍຸດທະສາດຕໍ່ໄປ. ດັ່ງນັ້ນ ຈີນຕ້ອງຊອກຫາທາງອອກ ຕອນນີ້ ຄວາມຕ້ອງ ການເງິນຢວນມັນເກິດຂື້ນແລ້ວທ່າມກາງການຮ່ວມມືຂອງຈີນກັບປະເທດອື່ນໆ ໄດ້ເລີ່ມຕົ້ນດ້ວຍໜຶ່ງແລວທາງ-ໜຶ່ງເສັ້ນທາງ ແລະທຸກປະເທດໃນກຸ່ມໂລກໃຕ້, ເຊິ່ງເປັນປະເທດສ່ວນໃຫຍ່ໃນໂລກ ສະນັ້ນ ຈຶ່ງເພີ່ມກາລະໂອກາດໃນການພົວພັນດ້ານເສດຖະກິດລະຫວ່າງຈີນກັບປະເທດພວມພັດທະນາ. ຈຶ່ງເທົ່າກັບເປັນ ການນໍາພາໃຫ້ເງິນຢວນພົ້ນເດັ່ນຂຶ້ນຢ່າງງ່າຍດາຍແລະຫລາຍຂື້ນ”
ສ່ວນການພົວພັນໃນດ້ານເສດຖະກິດລະຫວ່າງລາວ-ຈີນນັ້ນ ກໍຖືວ່າເສດຖະກິດຂອງລາວມີທ່າອ່ຽງທີ່ເປັນການເພິ່ງພາທາງເສດຖະກິດແລະການເງິນຈາກຈີນເພິ່ມຂື້ນນັບມື້ ຈຶ່ງສວນທາງກັບການສ້າງສະພາວະສົມດູນທາງດ້ານເສດຖະກິດໃນລາວດ້ວຍການຊຸກຍູ້ການລົງທຶນຈາກຕ່າງປະເທດເພື່ອດຸ່ນດ່ຽງກັບການລົງທຶນຂອງຈີນຢູ່ລາວ.
ເພື່ອຈະເຮັດໃຫ້ເສດຖະກິດມະຫາພາກຂອງລາວບໍ່ຕ້ອງຜູກມັດກັບເສດຖະກິດຂອງຈີນຢ່າງດຽວ ດ້ວຍການດຸນດ່ຽງຢ່າງເໝາະສົມ, ຈຶ່ງຈະເຮັດໃຫ້ເສດຖະກິດມະຫາພາກຂອງລາວນັ້ນ ບໍ່ຕ້ອງປະເຊີນກັບວິກິດການຄືເວລານີ້ ຊຶ່ງເປັນຍ້ອນຜົນກະທົບຈາກບັນຫາເສດຖະກິດພາຍໃນຈີນເປັນສຳຄັນ ດັ່ງທີ່ຜູ້ຊ່ຽວຊານທາງດ້ານການລົງທືນໃນອາຊຽນ ໃຫ້ການຢືນຢັນວ່າ:
“ປັດຈຸບັນ, ປະເທດລາວແມ່ນເຊື່ອມໂຍງເສດຖະກິດຂອງຕົນກັບເສດຖະກິດຈີນ ມັນອາດຈະເບິ່ງຄືວ່າການວິເຄາະສະຖານະການທີ່ຜິດພາດ. ຫຼັງຈາກໂຄວິດໄດ້ 3 ປີ, ຈີນໄດ້ເປີດປະເທດ ຈືງຄາດຫວັງວ່ານັກທ່ອງທ່ຽວຈີນຈະມາ. ປະເທດລາວຍັງມີທາງລົດ ໄຟລາວ-ຈີນ. ແຕ່ວ່າເສດຖະກິດຈີນມີບັນຫາໃນປັດຈຸບັນ ທີ່ເຂົາບອກວ່າເສດຖະກິດຈີນຈະຂະຫຍາຍຕົວ 5% ແຕ່ຂ່ອຍວ່າບໍ່ເຖິງດອກ ຍູ່ໃນກອບ 4.5% ເຖິງ 4.8% ສະນັ້ນ, ນັກທ່ອງທ່ຽວຈີນທີ່ມາກໍບໍ່ໄດ້ຕາມເປົ້າໝາຍ ສອງ, ເສດຖະກິດຈີນບໍ່ດີ, ແຕ່ວ່າຫຼາຍກິດຈະກຳຢູ່ໃນປະເທດລາວ ລົງທຶນໂດຍຈີນ, ສະນັ້ນ ເງິນກໍບໍ່ມາອີກ."
ແຕ່ຍ່າງໃດກໍ່ຕາມ ການຈະດຸ່ນດ່ຽງການລົງທຶນຂອງປະເທດຕ່າງໆ ກັບຈີນຢູ່ໃນລາວໃຫ້ໄດ້ຢ່າງແທ້ຈິງນັ້ນ ກໍບໍ່ແມ່ນເລື່ອງງ່າຍ. ເນື່ອງຈາກວ່າໃນປັດຈຸບັນນີ້ ບໍລິສັດຈາກຈີນ ຍັງເປັນອັນດັບ 1 ຂອງການລົງທຶນໃນລາວ. ມີຈຳນວນເຖິງ 933 ໂຄງການ ມີມູນຄ່າຫຼາຍກວ່າ 18 ຕື້ໂດລາສະຫະລັດ ແລະເປັນການລົງທຶນໃນທຸກດ້ານ ໂດຍສະເພາະໃນຂົງເຂດພະລັງງານ ການຂຸດຄົ້ນແຮ່ທາດ ການຜະລິດກະສິກຳ ການຄ້າ ແລະການບໍລິການທີ່ສົມບູນແບບ ສະນັ້ນ, ບໍລິສັດຈີນທີ່ລົງທຶນ ແລະ ດຳເນີນທຸລະກິດຢູ່ລາວ ຈຶ່ງສາມາດກຳນົດລາຄາສິນຄ້າແລະບໍລິການຕ່າງໆ ເປັນເງິນຢວນໄດ້ດ້ວຍ
ຟໍຣັມສະແດງຄວາມຄິດເຫັນ