ຈີນຈະສືບຕໍ່ສະໜັບສະໜູນ "ຄວາມພະຍາຍາມທັງໝົດທີ່ອຳນວຍຄວາມສະດວກໃຫ້ແກ່ການເຈລະຈາ" ເພື່ອແກ້ໄຂຄວາມຂັດແຍ່ງລະຫວ່າງສອງປະເທດ ທ່າມກາງຄວາມຂັດແຍ່ງທີ່ທະວີຄວາມຮຸນແຮງຂຶິ້ນ ໃນຕາເວັນອອກກາງ, ອີງຕາມກະຊວງການຕ່າງປະເທດຈີນ.
ໃນການຖະແຫຼງຂ່າວປະຈຳວັນຂອງກະຊວງການຕ່າງປະເທດ ໃນວັນທີ 23 ຕຸລາ ວານນີ້, ໂຄສົກກະຊວງການຕ່າງປະເທດ ທ່ານນາງໝາວ ໜິງ (Mao Ning) ກ່າວວ່າ “ໃນຂະນະທີ່ພວກເຮົາເວົ້າເຖິງຄວາມຂັດແຍ່ງລະຫວ່າງ ປາແລັສໄຕນ໌ ແລະ ອິສຣາແອລ ກຳລັງຮຸນແຮງຂຶ້ນ, ສະຖານະການຢູ່ເຂດກາຊານັ້ນມີຄວາມຮ້າຍແຮງຫຼາຍ ແລະ ການປະທະກັນດ້ວຍກຳລັງອາວຸດກໍ່ແຜ່ລາມອອກໄປເລື້ອຍໆໂດຍມີຜົນກະທົບທີ່ແຜ່ລາມອອກໄປຫຼາຍຂຶ້ນໄປເລື້ອຍໆ.”
ທ່ານນາງກ່າວຕໍ່ໄປວ່າ, “ທຸກຝ່າຍຄວນປະຕິບັດຕາມກົດໝາຍສາກົນ ແລະກົດໝາຍມະນຸດສະທຳສາກົນ, ປົກປ້ອງພົນລະເຮືອນ ແລະ ເຮັດທຸກສິ່ງທີ່ເປັນໄປໄດ້ເພື່ອຫຼີກລ່ຽງໄພພິບັດດ້ານມະນຸດສະທຳທີ່ຮ້າຍແຮງໄປກວ່ານີ້.”
ທ່ານນາງກ່າວຕື່ມວ່າຕ້ອງຕອບສະໜອງຄວາມຕ້ອງການດ້ານມະນຸດສະທຳ ແລະກ່າວຕື່ມອີກວ່າ “ຈີນຈະສືບຕໍ່ສະໜັບສະໜູນຄວາມພະຍາຍາມທັງໝົດທີ່ຊຸກຍູ້ການເຈລະຈາ ແລະຟື້ນຟູສັນຕິພາບ ແລະເຮັດໜ້າທີ່ໃນສ່ວນຂອງຕົນ ... ເພື່ອການແກ້ໄຂບັນຫາຊາວປາແລັສໄຕນ໌ ຢ່າງຮອບດ້ານ, ຍຸຕິທຳ ແລະຍືນຍົງ.
ຄຳປາໄສຂອງທ່ານນາງ ໄດ້ຍົກໃຫ້ເຫັນຄວາມແຕກຕ່າງກັນລະຫວ່າງວໍຊິງຕັນ ແລະປັກກິ່ງກ່ຽວກັບສົງຄາມ ອິສຣາແອລ ແລະກຸ່ມຮາມາສ, ເຊິ່ງນັກວິເຄາະກັງວົນວ່າ ຈະເພີ່ມຄວາມເຄັ່ງຕຶງລະຫວ່າງສອງປະເທດມະຫາອຳນາດຕື່ມອີກ.
ປະທານາທິບໍດີໂຈ ໄບເດັນ ໄດ້ກ່າວຕໍ່ຊາວອາເມຣິກັນໃນວັນທີ 19 ຕຸລານີ້ ໃນຄຳປາໄສສົດທາງໂທລະພາບວ່າ ສະຫະລັດຕ້ອງເພີ່ມທະວີການສະໜັບສະໜູນ ຢູເຄຣນ ແລະອິສຣາແອລ.
