ທ່ານ Bob Carr ລັດຖະມົນຕີການຕ່າງປະເທດອອສເຕຣເລຍ ໄດ້ກ່າວປ້ອງກັນການເປັນພັນທະມິດຢ່າງເລິກເຊິ່ງທາງດ້ານທະຫານຂອງປະເທດຂອງທ່ານ ກັບສະຫະລັດ ໃນຂະນະທີ່ທ່ານທໍາການຢ້ຽມຢາມຈີນ ຢ່າງເປັນທາງການຄັ້ງທໍາອິດຂອງທ່ານ.
ທ່ານ Carr ກ່າວໃນວັນອັງຄານ ມື້ນີ້ວ່າ ການໂອ້ລົມສົນທະນາຂອງທ່ານກັບບັນດາເຈົ້າໜ້າທີ່ຈີນ ແມ່ນໄດ້ຄອບງໍາ ໂດຍຄວາມເປັນຫ່ວງຕ່າງໆ ກ່ຽວກັບການຕັດສິນໃຈຂອງອອສເຕຣເລຍ ທີ່ອະນຸມັດໃຫ້ທະຫານສະຫະລັດ ຈໍານວນຫຼາຍເຖິງ 2500 ຄົນໄປມີໜ້າຢູ່ໃນປະເທດ ໃນຖານະເປັນພາກສ່ວນນຶ່ງຂອງການຫັນປ່ຽນດ້ານຍຸດທະສາດຂອງ ລັດຖະບານປະທານາທິບໍດີໂອບາມາ ຕໍ່ພາກພື້ນເອເຊຍປາຊີຟິກນັ້ນ.
ທ່ານ Carr ທີ່ເຂົ້າຮັບຕໍາແໜ່ງໃນເດືອນມີນາຜ່ານມາ ກ່າວຕໍ່ບັນດານັກຂ່າວໃນກຸງປັກກິ່ງວ່າ ສາຍພົວພັນດ້ານທະຫານ ລະຫວ່າງອອສເຕຣເລຍແລະສະຫະລັດບໍ່ແມ່ນເລື້ອງໃໝ່ ໂດຍກ່າວວ່າ:“ ອອສເຕຣ ເລຍມີສັນຊາດຍານຫຼືຄວາມຮູ້ສຶກສໍາລັບຄວາມສໍາພັນດ້ານຄວາມໝັ້ນຄົງຂອງຕົນ ກັບສະຫະລັດອາເມຣິກາ ທີ່ຢ້ອນຄືນຫຼັງມາໄດ້ 100 ປີ ມາແລ້ວ ຊຶ່ງໃນປີ 1905 ທີ່ໄຊຊະນະຂອງຍີ່ປຸ່ນເໜືອຣັດເຊຍໃນສົງຄາມທາງທະເລລະຫວ່າງຣັດເຊຍແລະຍີ່ປຸ່ນ ຊຶ່ງໄດ້ກະຕຸ້ນຄວາມສົນໃຈຂອງອສເຕຣເລຍ ເຂົ້າພົວພັນກັບອາເມຣິກາ ໃນຂົງເຂດປາຊີຟິກ. ຕັ້ງແຕ່ນັ້ນມາອອສເຕຣເລຍຢາກເຫັນອາເມຣິກາຫລິ້ນບົດບາດໃນຂົງເຂດເອເຊຍປາຊີຟິກ. ສາຍພົວພັນນີ້ແມ່ນເລິກເຊິ່ງຢູໃນ DNA ຂອງອອສເຕຣເລຍນັ້ນ.
ໃນເດືອນເມສາຜ່ານມານີ້ ພວກທະຫານມາຣີນສະຫະລັດຈຸທໍາອິດໄດ້ເລີ້ມໄປຮອດໃນພາກເໜືອຂອງອອສເຕຣເລຍ ພາຍໃຕ້ຂໍ້ຕົກລົງກັນໃນເດືອນພະຈິກປີແລ້ວນີ້ທີ່ທາງກຸງວໍຊິງຕັນກ່າວວ່າ ມີວັດຖຸປະສົງເພື່ອຮັກສາໄວ້ແຫ່ງຄວາມໝັ້ນຄົງໃນພາກພື້ນເອເຊຍປາຊີຟິກນັ້ນ.