ທ່ານ ຫວູ ໄຫຫລົງ ລັດຖະມົນຕີຊ່ວຍວ່າການຕ່າງປະເທດຈີນກ່າວວ່າ ການຕັດສິນໃຈ
ຂອງສະຫະລັດ ໃນການເປັນເຈົ້າພາບຈັດກອງປະຊຸມຂອງກຸ່ມເອເພັກຂຶ້ນທີ່ຮາວາຍ ຊຶ່ງ
ເປັນລັດບ້ານເກີດເມືອງນອນຂອງປະທານາທິບໍດີໂອບາມານັ້ນ ແມ່ນສະແດງໃຫ້ເຫັນເຖິງ
ຄວາມເອົາຈິງເອົາຈັງ. ແຕ່ໃນຂະນະດຽວກັນ ທ່ານຫວູ ກໍໄດ້ຕັ້ງຄໍາຖາມກ່ຽວກັບບາງເປົ້າ
ໝາຍທີ່ສະຫະລັດໄດ້ວາງອອກນັ້ນວ່າ ມັນຖືກຕ້ອງຕາມສະພາບໂຕຈິງຫລາຍປານໃດ.
// ສຽງພາສາຈີນ //
ທ່ານຫວູ ກ່າວວ່າບັນຫາຕ່າງໆທີ່ສະຫະລັດໄດ້ຕັ້ງຂຶ້ນມາເປັນບໍລິມະສິດຂອງຫົວຂໍ້ປະຊຸມ
ອັນມີ ການເຕີບໂຕສີຂຽວ ກໍຄືການເຕີບໂຕຂອງສິ່ງແວດລ້ອມ, ຄວາມຮ່ວມມືດ້ານການ
ວາງກົດລະບຽບຄວບຄຸມ, ພະລັງງານ ແລະຄວາມຄິດປະດິດຄິດສ້າງສິ່ງໃໝ່ ຫລືນະວະ
ກໍານັ້ນ ແມ່ນໄດ້ຮັບການຊົມເຊີຍແລະຍິນດີນໍາຈາກໝົດທຸກພັກຝ່າຍ. ແຕ່ທ່ານຫວູກ່າວວ່າ
ພວກເປົ້າໝາຍຕ່າງໆທີ່ວໍຊິງຕັນໄດ້ຕັ້ງຂຶ້ນນັ້ນ ແມ່ນໃຫຍ່ໂຕເກີນໄປ ແລະເກີນກວ່າທີ່
ພວກປະເທດກໍາລັງພັດທະນາທັງຫລາຍຈະເຮັດໄດ້.
// ສຽງພາສາຈີນ //
ທ່ານຫວູກ່າວວ່າ ບັນຫາສະເພາະ
ຈໍານວນນຶ່ງ ທີ່ຈີນມີຄວາມເປັນ
ຫ່ວງນໍານັ້ນ ກໍຄືການລົດອັດຕາ
ພາສີ ສໍາລັບພວກວັດຖຸດ້ານ
ສະພາບແວດບ້ອມ ທີ່ອາດໂຮມ
ເອົາທັງພະລັງງານທີ່ນໍາມາໝຸນ
ໃຊ້ຄືນໃໝ່ໄດ້ ແລະການນໍາເອົາ
ຂີ້ເຫຍື້ອສິ່ງເສດເຫລືອ ມາຣີໄຊ
ເກິ້ລ ຫລືຜະລິດໃໝ່ເພື່ອໝຸນ
ວຽນໃຊ້ຄືນ. ທ່ານຫວູກ່າວຕໍ່ໄປ
ວ່າ ນອກນັ້ນແລ້ວ ກໍຍັງມີຄວາມ
ເປັນຫ່ວງ ກ່ຽວກັບການລົດເປົ້າ
ໝາຍລະດັບການໃຊ້ພະລັງງານ
ຊຶ່ງວັດແທກການຊົມໃຊ້ພະລັງ
ງານຂອງປະເທດ ສົມທຽບກັບ
ຜົນຜະລິດທາງເສດຖະກິດຂອງປະເທດ
ພວກເຈົ້າໜ້າທີ່ສະຫະລັດໄດ້ເນັ້ນຍໍ້າວ່າ ກຸ່ມເອເພັກເປັນເວທີເພື່ອຊຸກຍູ້ສົ່ງເສີມຄວາມສໍາພັນ
ທາງເສດຖະກິດພາຍໃນພວກປະເທດສະມາຊິກທັງ ຫລາຍນັ້ນ.
ແຕ່ທ່ານ Yu Jianhua ລັດຖະມົນຕີຊ່ວຍກະຊວງການເງິນຂອງຈີນ ຊີ້ອອກວ່າ ກຸ່ມເອເພັກ
ເປັນເວທີທີ່ບໍ່ມີອໍານາດຜູກມັດໃດໆ ແລະດັ່ງນັ້ນເປົ້າໝາຍຕ່າງໆທີ່ຕັ້ງໄວ້ ກໍຄວນຈະອະນຸ
ໂລມໄປຕາມລະດັບຄວາມສະບາຍໃຈ ແລະຄວາມພ້ອມຂອງພວກປະເທດສະມາຊິກທັງໝົດ
ນັ້ນ ຫລາຍກວ່າ.
ເຈົ້າໜ້າທີ່ຈີນທ່ານນີ້ ຍັງໄດ້ສະແດງຄວາມຄາງແຄງໃຈຂອງຈີນ ກ່ຽວກັບພາຄີຂ້າມປາຊິຟິກ
ຫລື TPP ອັນເປັນສັນຍາການຄ້າ ທີ່ກໍາລັງເຈລະຈາຕໍ່ຮອງກັນຢູ່ນອກກອງປະຊຸມ ໂດຍ
ສະມາຊິກເກົ້າປະເທດຂອງກຸ່ມເອເພັກນັ້ນ.
ທ່ານຢູ ໄດ້ຮຽກຮ້ອງໃຫ້ພວກສະມາຊິກກຸ່ມເອເພັກ ຈົ່ງຈັດໃຫ້ມີຄວາມສົມດຸນກັນລະຫວ່າງ
ສັນຍາ TPP ແລະ ພວກກົນໄກດ້ານການຄ້າຫລາຍຝ່າຍທີ່ມີຢູ່ແລ້ວນັ້ນ. ທ່ານຢູ ກ່າວວ່າ
ທ່ານຄິດວ່າ ພວກລະບົບທີ່ມີຫລາຍຝ່າຍນັ້ນຄວນເປັນຊ່ອງຫລັກ ແລະພວກກົນໄກແຫ່ງ
ຂົງເຂດນັ້ນ ຄວນຈະເປັນຊ່ອງເສີມ ບໍ່ແມ່ນເອົາມາສັບປ່ຽນ ຫລືແທນທີ່ກັນ.
ສະຫະລັດໄດ້ມີບົດບາດສໍາຄັນ ໃນການຊຸກຍູ້ໃຫ້ສັນຍາພາຄີ TPP ເປັນຕົວຕົນຂຶ້ນມາ
ຊຶ່ງມີເປົ້າໝາຍແນໃສ່ການຍົກເລີກອັດຕາພາສີ ລະຫວ່າງພວກປະເທດສະມາຊິກພາຍໃນ
10 ປີ. ໃນຕອນກ່າວເຖິງສັນຍາດັ່ງກ່າວ ເມື່ອອາທິດຜ່ານມານີ້ ທ່ານ William Burns
ຮອງລັດຖະມົນຕີຕ່າງປະເທດສະຫະລັດກ່າວວ່າ ເປົ້າໝາຍກໍແມ່ນເພື່ອຫລໍ່ຫລອມສາຍພົວ
ພັນທີ່ເຂັ້ມແຂງຂຶ້ນກວ່າເກົ່າ ລະຫວ່າງຂົງເຂດອາເມຣິກາແລະເອເຊຍ. ທ່ານ Burns ເວົ້າວ່າ:
“ເປົ້າໝາຍຫລັກຂອງຂໍ້ຕົກລົງທີ່ທັນສະໄໝທີ່ສຸດ TPP ນັ້ນ ກໍຄືທ້ອນໂຮມເອົາ
ປະເທດ ເປຣູ ຊີເລ ແລະສະຫະລັດ ມາເຂົ້າກັບນີວຊີແລນ ອອສເຕຣເລຍ ບຣູໄນ
ມາເລເຊຍ ຫວຽດນາມ ສິງຄະໂປ ແລະພວກປະເທດສະມາຊິກໃນອະນາຄົດ
ເພື່ອເປັນປະຊາຄົມການຄ້ານຶ່ງດຽວ ທີ່ຊົມໃຊ້ມາດຕະຖານທີ່ສູງທີ່ສຸດ.”
ສ່ວນຈີນນັ້ນ ເວລາຖືກຊັກຖາມເມື່ອວັນຈັນຜ່ານມານີ້ ວ່າ ປັກກິ່ງຈະເຂົ້າຮ່ວມໃນຂໍ້ຕົກລົງ
ການຄ້າແຫ່ງຂົງເຂດທີ່ວ່ານີ້ຫລືບໍ່ ພວກເຈົ້າໜ້າທີ່ຈີນເວົ້າວ່າ ຈີນຍັງບໍ່ໄດ້ຮັບການເຊື້ອ
ເຊີນເທື່ອ.
